រាជធានីភ្នំពេញ ៖ ជាការប្រកួតប្រជែងដ៏ស្វិតស្វាញនៅលើទីផ្សារព័ត៌មាន (ដំណឹង) កោះសន្តិភាពបានពង្រីកខ្លួន និងអភិវឌ្ឍន៍ឥតឈប់ឈរទៅក្នុងសម័យកាលសាកលភាវូបនីយកម្ម ជាតឹកតាងដែលមិនអាចប្រកែកបានគឺការស្ថាបនានូវអគារថ្មីកំពស់១៥ជាន់ (ក្រោមដី៣ជាន់) ជាមជ្ឈមណ្ឌលព័ត៌មានលើផ្ទៃដីប្រមាណ១ហិកតា ដើម្បីស្តុកការិយាល័យដ៏មមាញឹក រួមមានការិយាល័យសំរាប់កាសែត ការិយាល័យសំរាប់គេហទំព័រ ការិយាល័យសំរាប់វិទ្យុ និងជាបន្តបន្ទាប់ឈានទៅបង្កើតការិយាល័យសំរាប់ទូរទស្សន៍។
អគារស្កឹមស្កៃដែលចាប់ផ្តើមសាងសង់នេះត្រូវបានរៀបចំធ្វើក្រុងពាលីកាលពីវេលាម៉ោង៦ព្រឹកថ្ងៃទី៥ វិច្ឆិកា ឆ្នាំ២០១០ នៅលើទីតាំងរបស់មជ្ឈមណ្ឌលព័ត៌មានកោះសន្តិភាពផ្ទាល់ (Nº240 ទំហំប្រមាណ១ហិកតា) ផ្លូវលេខ២៧១ សង្កាត់បឹងទំពុន ខណ្ឌមានជ័យ ក្រោមអធិបតីភាពលោកឧកញ៉ា ថុង អ៊ុយប៉ាង និងលោកជំទាវឧកញ៉ា យិន ផាន្នី ស្ថាបនិកមជ្ឈមណ្ឌលព័ត៌មានកោះសន្តិភាព និងមានការអញ្ជើញចូលរួមពីលោកស្រី ថុង សុវណ្ណរង្សី អភិបាលមជ្ឈមណ្ឌលព័ត៌មានកោះសន្តិភាពលោក ជា ហ្គារូដា នាយកប្រតិបត្តិ លោកនាយកការផ្សាយ ក្រុមអ្នកនិពន្ធ ព្រមទាំងបុគ្គលិក សហការីជាច្រើនរូបទៀត។
ជាមួយនឹងពិធីក្រុងពាលីនេះ គេសង្កេតឃើញសម្តេចព្រះឧត្តមវង្សា មួង រ៉ា លេខាធិការថេរសភាសង្ឃ ឧត្តមប្រឹក្សាសម្តេចព្រះអគ្គមហាសង្ឃរាជទទួលបន្ទុកក្រុមប្រឹក្សាព្រះវិន័យ និងរដ្ឋបាល និមន្តដឹកនាំព្រះសង្ឃជាច្រើនអង្គសូត្រធម៌ប្រោះព្រំលើករាសីចំរុងចំរើន លាយឡំនឹងការបង្កើនសម្លេងគ្រឿងចក្រខួង-បុកគ្រឹះយ៉ាងសកម្ម។ លោកឧកញ៉ាថុង អ៊ុងប៉ាង ស្ថាបនិកមជ្ឈមណ្ឌលព័ត៌មានកោះសន្តិភាពបានមានប្រសាសន៍ថា បន្ទាប់ពីដំណើរការកាសែតអស់រយៈពេលជាង១៧ឆ្នាំ នៃព្រះរាជាណាចក្រកម្ពុជាទី២រួចមក កោះសន្តិភាពបានពង្រីកខ្លួនចេញផ្សាយព័ត៌មានបែបអេឡិចត្រូនិក ឬហៅថា កាសែតអនឡាញ (On Line) ឬគេហទំព័រ (Website) ថ្មីទៀត។ ពាក់កណ្តាលឆ្នាំ២០១០ កោះសន្តិភាពបានពង្រីកស្ថានីយវិទ្យុថ្មីសន្លាងមួយទៀត គឺវិទ្យុសម្លេងកោះសន្តិភាព ដើម្បីបំពេញសេចក្តីត្រូវការដល់មិត្តអ្នកអាន-អ្នកស្តាប់ ជាពិសេសប្រជាពលរដ្ឋក្នុងព្រះរាជាណាចក្រកម្ពុជា និងនៅក្នុងពិភពលោក។
លោកឧកញ៉ា ថុង អ៊ុយប៉ាង មានប្រសាសន៍ឱ្យដឹងផងដែរថា ជាបន្តបន្ទាប់ទៀតនេះ យើងកំពុងតែគិតគូរអំពីការដំឡើងស្ថានីយទូរទស្សន៍មួយទៀតជាអ្វីដែលមជ្ឈមណ្ឌលព័ត៌មានកោះសន្តិភាពអភិវឌ្ឍន៍ឥតឈប់ឈរ។ យើងមានកាសែតអាន (បោះពុម្ព) កាសែតអនឡាញ (គេហទំព័រ=Website) វិទ្យុស្តាប់សម្លេង ហើយរយៈពេលខាងមុខដ៏ខ្លីនេះ យើងនឹងមានស្ថានីយទូរទស្សន៍សំរាប់ទស្សនាមួយទៀត…បណ្តាញផ្តល់-បញ្ជូនព័ត៌មានទាំងអស់នេះ គឺជាទីប្រឹក្សាដ៏ឆ្នើមរបស់លោកអ្នក វានឹងផ្តល់នូវចំណេះដឹងជាច្រើនដូចជា «អក្ខរាវិរុទ្ធ, ពាក្យពេចន៍, វោហាស័ព្ទ, ការយល់ដឹងផ្សេងៗនៅក្នុងសង្គម, ព្រឹត្តិការណ៍ព័ត៌មានរហ័សទាន់ចិត្ត និងបទពិសោធន៍ជាច្រើនទៀតដែលយើងមិនអាចគិតឃើញ…ដែលនេះគឺជាការប្រកួតប្រជែងផ្នែកព័ត៌មានដ៏ខ្លាំងក្លាមួយរកទីបញ្ចប់គ្មានរបស់មជ្ឈមណ្ឌលព័ត៌មានកោះសន្តិភាព ដើម្បីធ្វើសមាហរណកម្មទៅពិភពលោក៕
ចែករំលែកព័តមាននេះ