បញ្ជីឈ្មោះឥស្សរជន និងបណ្តាតារាដែលស្លៀកពាក់ស្អាតបំផុតប្រចាំឆ្នាំ2010
ដោយ ៖ ប្រុសកោះ
ថ្ងៃព្រហស្បត្ត៏ ទី២៦ ខែសីហា ឆ្នាំ២០១០ ម៉ោង ០៩:៣៩
គេហទំព័របរទេស
ភរិយារបស់នាយករដ្ឋមន្រ្តីអង់គ្លេស និងភរិយារបស់ប្រធានាធិបតីបារាំង
ទស្សនាវដ្តី VANITY FAIR ទើបចេញផ្សាយនាពេលថ្មីៗនេះនូវបញ្ជីចំណាត់ថ្នាក់ឥស្សរជន និងតារាល្បីៗដែលស្លៀកពាក់ល្អសមសួនបំផុតប្រចាំឆ្នាំ២០១០ ដោយក្នុងបញ្ជីនេះគេអាចឃើញឈ្មោះឥស្សរជន៤៤រូបក្នុងផ្នែកផ្សេងៗគ្នាគិតតាំងពីនារីភរិយាមេដឹកនាំ ឬបណ្តាអ្នកនយោបាយ តារាចំរៀង និងតារាភាពយន្តរហូតដល់មនុស្សក្នុងខ្សែរាជវង្ស។ ស្ត្រីទីមួយអាមេរិកលោកស្រីមីសែល អូបាម៉ា ស្ត្រីទីមួយបារាំង លោកស្រីកាឡា ប្រូនីសាកូហ្ស៊ី ព្រមទាំងភរិយានាយករដ្ឋមន្ត្រីអង់គ្លេសលោកស្រី សាម៉ានថា កាមីរ៉ូន ស្ថិតក្នុងចំណាត់ថ្នាក់១០ដំបូងគេ។ នាង LADY GAGA ដែលនៅតែស្អាតបំផុតស្ថិតក្នុងលំដាប់ទី២៦ ខណៈដែលតារាបាល់ទាត់ដេវីដ បេកខាំ ស្ថិតដល់រហូតចំណាត់ថ្នាក់ចុងក្រោយគេ ព្រោះតែលោកអាយុកាន់តែច្រើន។ អ្នកជាប់ចំណាត់ថ្នាក់១០ដំបូងគេក្នុងចំណាត់ថ្នាក់របស់ទស្សនាវដ្តីនេះរួមមានភរិយាប្រធានាធិបតី ឬនាយករដ្ឋមន្ត្រី៣រូប។ លោកស្រីអូបាម៉ា ដែលកាលពីឆ្នាំទៅមិញជាប់លំដាប់ថ្នាក់លេខមួយបានធ្លាក់ដល់ចំណាត់ថ្នាក់ទី៦ តែលោកស្រីមានឈ្មោះក្នុងបញ្ជីចំណាត់ថ្នាក់នេះ៣ឆ្នាំ ជាប់គ្នាមកហើយ ខណៈដែលស្វាមីលោកស្រីពុំមានវាសនាដូចលោកស្រីឡើយ។ លោកបារ៉ាក់ អូបាម៉ា កាលពីឆ្នាំទៅមិញស្ថិតក្នុងចំណាត់ថ្នាក់ទី១៤ ឆ្នាំនេះអវត្តមានពុំមានឈ្មោះក្នុងបញ្ជីចំណាត់ថ្នាក់នេះទៀតទេ។ អតីតចំណាត់ថ្នាក់លេខ២ លោកស្រីកាឡាប្រូនី ឆ្នាំនេះស្ថិតក្នុងលំដាប់ទី៨ បន្ទាប់ពីភរិយារបស់នាយករដ្ឋមន្ត្រីអង់គ្លេស លោកស្រីសាម៉ានថា កាមីរ៉ូន។ ម៉្យាងទៀតនារីក្នុងខ្សែរាជវង្ស២រូបដែលមានម្ចាស់ក្សត្រី TATIANA SANTO DOMINGO មិត្តស្រីរបស់ព្រះអង្គម្ចាស់ស្រស់ស្អាត ប្រចាំអឺរ៉ុប ANDREA CASIRIGHI រាជទាយាទលំដាប់ទី២សំរាប់ស្នងរាជ្យម៉ូណាកូ និងម្ចាស់ក្សត្រីម៉ារីនៃប្រទេសដាណឺម៉ាកស្ថិតក្នុងចំណាត់ថ្នាក់១០ដំបូងគេដែរ។ ម្ចាស់ក្សត្រីម៉ារីស្ថិតក្នុងលំដាប់ថ្នាក់ទី៤៕
