ខេត្តព្រះសីហនុ ៖ បុរសជនបរទេសវ័យចំណាស់ម្នាក់ស្រវឹងស្រាជោកជាំ បានរងរបួសបែកក្បាលហូរឈាមបន្ទាប់ពីបានបើករថយន្តបុកបង្គោលភ្លើង បណ្តាលឱ្យខូចខាតកាងរថយន្តផ្នែកខាងមុខស្ទើរទាំងស្រុង កាលពីវេលាម៉ោង ១២ និង ១០នាទី យប់រំលងអាធ្រាត្រឈានចូលថ្ងៃទី១៣ កញ្ញា ២០១៣ ត្រង់ចំណុចមុខប៉ុស្តិ៍ទេសចរណ៍ឆ្នេរអូរឈើទាល ស្ថិតក្នុងក្រុមទី១៤ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ។
តាមសមត្ថកិច្ចចរាចរណ៍ខេត្តព្រះសីហនុ បានប្រាប់អោយដឹងថា ជនបរទេសខាងលើឈ្មោះ KOPITCH JOHANN ជនជាតិអ៊ុយគ្រែន អាយុ ៦៤ឆ្នាំ កាន់លិខិតឆ្លងដែនលេខ P5588810 មុខរបរទេសចរណ៍ បើករថយន្តម៉ាកទីកូ ពណ៌ក្រហម ពាក់ស្លាកលេខ ភ្នំពេញ 2H-6313 បានបើកទៅបុកបង្គោលភ្លើងរងការខូចខាតមធ្យម និងបណ្តាលឱ្យរងរបួសបែកក្បាលផ្នែកខាងឆ្វេងហូរឈាមពេញផ្ទៃមុខ ។
អ្វីដែលគួរអោយញញើត និងរអើមនោះ គឺបន្ទាប់ពីបានបុកបង្គោលភ្លើងបែកក្បាលហូរឈាមពេញមុខហើយ បែរជាជនបរទេសរូបនោះ ជូតឈាមរបស់ខ្លួនមកលិត (ដាក់ក្នុងមាត់) ទៅវិញ ។
ក្រោយកើតហេតុ សមត្ថកិច្ចចរាចរណ៍ បាននាំមនុស្ស និងរថយន្ត ទៅកាន់ការិយាល័យចរាចរណ៍ខេត្ត រង់ចាំម្ចាស់ស្វាងស្រវឹងដោះស្រាយតាមផ្លូវច្បាប់ ៕
ចែករំលែកព័តមាននេះ