ខេត្តបាត់ដំបង ៖ បុរសម្នាក់ដែលសមត្ថកិច្ចអះអាងថា ជាសកម្មជនគណបក្សសង្គ្រោះជាតិផងនោះបានត្រូវឃាត់ខ្លួនក្រោយពីសង្ស័យថា បានចាប់រំលោភក្មេងស្រីអាយុ១៦ឆ្នាំម្នាក់ កាលពីវេលាម៉ោង១រំលងអធ្រាត្រឈានចូលថ្ងៃទី២៧ សីហា នៅលើផ្ទះរបស់នាងក្នុងឃុំព្រៃតូច ស្រុកមោងឫស្សី ប៉ុន្តែបុរសរូបនេះបានបដិសេធការចោទប្រកាន់នេះ ។
លោក គិត ហ៊ាង អធិការនគរបាលស្រុកមោងឫស្សីនិយាយថា ជនសង្ស័យឈ្មោះចម សាវី ហៅសាយ អាយុ៤០ឆ្នាំ ជាសកម្មជនគណបក្សសង្គ្រោះជាតិនៅឃុំព្រៃតូច មានប្រពន្ធ និងកូន៦នាក់ ។ ជននេះបានត្រូវឃាត់ខ្លួនក្រោយពីសង្ស័យថា បានរំលោភបំពានផ្លូវភេទលើក្មេងស្រីម្នាក់អាយុ១៦ឆ្នាំ ខណៈនាងដេកជាមួយប្អូនតូចៗ២នាក់ទៀតនៅលើផ្ទះដែលជីដូនរវល់ទៅសីុឈ្នួលគេនៅក្រុងបាត់ដំបង ។ លោកបន្តថា ការឃាត់ខ្លួនជនសង្ស័យរូបនេះគឺយោងតាមការចង្អុលបង្ហាញរបស់ក្មេងស្រីរងគ្រោះដែលនាងបានស្គាល់ច្បាស់ និងឃើញផ្ទាល់ភ្នែកពេលនាងបំភ្លឺភ្លើងចង្កៀងមុនពេលកើតហេតុ ប៉ុន្តែជនសង្ស័យបានបដិសេធការចោទប្រកាន់នេះ ។
ជនជាប់ចោទឈ្មោះចម សាវី ហៅសាយ ដែលត្រូវឃាត់ខ្លួនមិនបានសារភាពអំពីកំហុសរបស់ខ្លួនទេ ចាប់តាំងពីត្រូវឃាត់ខ្លួនសួរនាំដំបូងនៅប៉ុស្ដិ៍រដ្ឋបាលមូលដ្ឋានរហូតដល់អធិការដ្ឋាននគរបាលស្រុក ។ ជននេះនិយាយនៅចំពោះមុខសមត្ថកិច្ចដដែលៗថា ខ្លួនមិនជាប់ពាក់ព័ន្ធនឹងការរំលោភបំពានផ្លូវភេទលើក្មេងស្រីនោះឡើយ ។
ប៉ុន្តែក្មេងស្រីរងគ្រោះបានប្រាប់សមត្ថកិច្ចថា កាលពីវេលាកើតហេតុពេលដែលនាងកំពុងដេកជាមួយប្អូនៗ២នាក់ទៀតនៅលើផ្ទះ ស្រាប់តែឈ្មោះសាយបានមកគោះទ្វារហៅនាងឲ្យបើកទ្វារដោយប្រាប់ថា គាត់យករបស់មកឲ្យតែនាងមិនដឹងរបស់អ្វីទេ ។ នាងប្រាប់ថា ដោយសារនាងស្គាល់គាត់ច្បាស់និងមានផ្ទះនៅជិតគ្នាផងក៏ងើបមកបើកទ្វារតែនាងបានអុជចង្កៀងបំភ្លឺដាក់នៅក្បែរទ្វារមុនពេលនាងបើកទ្វារដែលពេលនោះនាងមើលឃើញមុខឈ្មោះសាយយ៉ាងច្បាស់ ។ ក្មេងស្រីរងគ្រោះបន្តថា ពេលឈ្មោះសាយរុញទ្វារចូលគាត់ក៏ពន្លត់ភ្លើងចង្កៀងរួចចាប់ឱបនាងជាមួយនឹងការគំរាមរកសម្លាប់នាងទៀតបើនាងស្រែក ។ ពេលនោះគាត់ចាប់រំលោភនាងទាំងកំរោលតែម្ដងធ្វើឲ្យនាងមានការឈឺចាប់យ៉ាងខ្លាំង តែមិនហ៊ានស្រែកទេ ព្រោះខ្លាចជនតិរច្ឆាននេះសម្លាប់ លុះព្រឹកឡើងទើបនាងប្រាប់មេភូមិ និងសមត្ថកិច្ចឲ្យជួយអន្តរាគមន៍ ។ លោកអធិការនគរបាលស្រុកមោងឫស្សីបានបញ្ជាក់ដែរថា ក្មេងស្រីរងគ្រោះ៣នាក់បងប្អូននេះគឺរស់នៅជាមួយជីដូន ខណៈដែលម្ដាយមានប្ដីថ្មីស្នាក់នៅបែកពីពួកគេ ។ ប៉ុន្តែដោយជីវភាពគ្រួសារតោកយ៉ាក ជីដូនក៏បានចាកចោលផ្ទះនិងចៅតូចៗជាបណ្ដោះអាសន្នទៅស៊ីឈ្នូលបោកខោអាវឲ្យគេនៅឯក្រុងបាត់ដំបង ទើបបានកន្លះខែក៏មានរឿងនេះកើតឡើង ។
លោក គិត ហ៊ាង ប្រាប់ថា សមត្ថកិច្ចបានរកឃើញអាវរបស់ក្មេងស្រីដែលជនបង្កបានចាប់ហែកនិងខោរបស់នាងដែលប្រឡាក់ឈាម ។ ទោះជាមានការបដិសេធយ៉ាងណាក្ដីក៏លោកអធិការបញ្ជាក់ថា ដោយយោងលើចម្លើយនិងការចង្អុលបង្ហាញរបស់ជនរងគ្រោះទើបលោកស្នងការនគរបាលខេត្ត និងលោកព្រះរាជអាជ្ញាអមសាលាដំបូងខេត្ត សម្រេចបញ្ជាឲ្យឃាត់ខ្លួនជនសង្ស័យដើម្បីកសាងសំណុំរឿងបញ្ជូនទៅសាលាដំបូងសួរនាំបន្ត បើទោះជាមានមន្រ្តីគណបក្សប្រឆាំងជាច្រើនបានព្យាយាមអន្តរាគមន៍យ៉ាងណាក្ដី ។ សូមបញ្ជាក់ថា ករណីរំលោភសេពសន្ថវៈហាក់ដូចកំពុងមានសន្ទុះខ្លាំងសម្រាប់ខេត្តបាត់ដំបងដែលគ្រាន់តែរយៈពេល៣ថ្ងៃកើតមានបទល្មើសនេះលើក្មេងស្រីដែលជាអនីតិជនចំនួន៣ករណីទៅហើយ ។ លើកទី១ នាថ្ងៃទី២៥ សីហា នៅភូមិទួលកកោះ ឃុំបារាំងធ្លាក់ ស្រុកភ្នំព្រឹក បង្កឡើងដោយបុរសឈ្មោះញឹម ចាន់នឿន អាយុ៣៩ឆ្នាំ បានចាប់រំលោភក្មេងស្រីម្នាក់អាយុ៥ឆ្នាំ រហូតបានសម្រេចហើយត្រូវសមត្ថកិច្ចឃាត់ខ្លួន ។
លើកទី២ កើតឡើងនាថ្ងៃទី២៦សីហា នៅភូមិត្រពាំងព្រលិត ឃុំសន្តិភាព ស្រុកសំពៅលូន បង្កឡើងដោយឈ្មោះសាន់ សុធារ៉ាត់ អាយុ៣៣ឆ្នាំ បានចាប់រំលោភកូនស្រីបង្កើតអាយុ៧ឆ្នាំបានសម្រេចចំនួន៣ដង ហើយក៏ត្រូវបានឃាត់ខ្លួនដែរ ។ លុះលើកទី៣នេះគឺនៅវេលារំលងអធ្រាត្រឈានចូលថ្ងៃទី២៧សីហា នៅស្រុកមោងឫស្សី បង្កឡើងដោយសកម្មជនគណបក្សប្រឆាំងខាងលើនេះតែម្ដង ហើយក៏ត្រូវសមត្ថកិច្ចឃាត់ខ្លួន ៕
ចែករំលែកព័តមាននេះ