ខេត្តព្រៃវែង ៖ កាលពីព្រឹកថ្ងៃទី១៤ សីហា លោកបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមជាមួយលោកហាស់ សារ៉េត អភិបាលខេត្ត បានដឹកនាំមន្ត្រីក្រោមឱវាទយ៉ាងច្រើនកុះករចុះទៅភូមិអ្នកលឿង ឃុំអ្នកលឿង ស្រុកពាមរក៍ និងឃុំព្រែកក្របៅ ស្រុកពាជរ ដើម្បីជួយបកពោតប្រជាកសិករ ដែលកំពុងប្រឈមទៅនឹងការខូចខាត ដោយសារគំនរពោតទាំងនោះនៅហាលក្តៅ ហាលភ្លៀងយូរពេក បន្ទាប់ពីការប្រមូលផលដណ្តើមពីទឹកដែលជន់លិចចម្ការ ។
លោក អ៊ុក សំណាង ប្រធានមន្ទីរកសិកម្មខេត្តថ្លែងថា ក្នុងយុទ្ធនាការជួយបកពោតប្រជាកសិករនៅពេលនេះ មាននិស្សិត និងសាស្ត្រាចារ្យមកពីសាកលវិទ្យាល័យភូមិន្ទកសិកម្មចំការដូង ចំនួន១០០នាក់ រួមនឹងមន្ត្រីមកពីអង្គភាពនានាជុំវិញខេត្ត ដែលដឹកនាំដោយលោកប្រធាន -អនុប្រធានមន្ទីរ លោកប្រធាន-អនុប្រធានការិយាល័យទាំងអស់សរុបជាង៥០០នាក់ បានចូលរួម ។ កម្លាំងទាំងអស់នោះ ត្រូវបានបែងចែកជាក្រុមតូចៗដាក់ពង្រាយតាមផ្ទះ ប្រជាពលរដ្ឋដែលមានពោតច្រើន ចាប់តាំងពីភូមិអ្នកលឿង ឃុំអ្នកលឿង ស្រុកពាមរក៍ រហូតដល់ឃុំព្រែកក្របៅ ស្រុកពាមជរ ដើម្បីជួយសម្រុកបកពោតឱ្យប្រជាពលរដ្ឋឱ្យអស់ ។
ប្រជាពលរដ្ឋជាច្រើននាក់ក្នុងទឹកមុខសប្បាយផង ក្រៀមក្រំផង បាននិយាយប្រាប់លោករដ្ឋមន្ត្រី និងលោកអភិបាលខេត្ត អំពីការជួបផលលំបាកផ្សេងៗរបស់ពួកគាត់ ។ ក្នុងនោះ ពួកគាត់បានសំណូមពរដល់លោករដ្ឋមន្ត្រីនិងលោកអភិបាលខេត្ត ឱ្យជួយបញ្ចុះតម្លៃពូជពោតសម្រាប់ដាំបន្តដែលបច្ចុប្បន្នពូជទិញពីវៀតណាមថ្លៃណាស់ ១គីឡូក្រាមថ្លៃ១២.០០០ រៀល ។ ជាមួយនេះ សុំឱ្យជួយរកឈ្មួញមកទិញពោតឱ្យបានថ្លៃសមរម្យបន្តិចព្រោះឈ្មួញក្នុងស្រុកកំពុងដើរទិញដោយទម្លាក់ថ្លៃពី៧៥០រៀលមក៧០០រៀលគត់ ហើយឥឡូវនេះធ្លាក់នៅត្រឹមតែ៦០០រៀល ក្នុង១គីឡូក្រាម ។
ឆ្លើយតបទៅនឹងសំណូមពររបស់ប្រជាពលរដ្ឋនេះ លោកបណ្ឌិត ច័ន្ទ សារុន ថ្លែងថា បញ្ហាទាំងនេះលោកបានដឹងតាមរយៈការផ្សព្វផ្សាយរបស់សារព័ត៌មានអស់ហើយ ហើយលោកកំពុងតែគិតគូររិះរកមធ្យោបាយដើម្បីជួយដោះស្រាយឱ្យពោតបានថ្លៃ ។ ប៉ុន្តែអ្វីដែលសំខាន់នៅពេលនេះ គឺលោកខិតខំកៀងគរប្រមែប្រមូលមន្ត្រីក្រោមឱវាទទាំងនៅក្រសួង ទាំងថ្នាក់ខេត្ត ទាំងនិស្សិត និងសាស្រ្តាចារ្យ ឱ្យមកទីនេះ ដើម្បីនាំគ្នាជួយសម្រុកបកពោតហាលឱ្យស្ងួតល្អ ទុកដាក់ឱ្យបានត្រឹមត្រូវ ចៀសវាងទុកនៅក្នុងគំនរធំៗយូរហាលភ្លៀងហាលក្តៅយ៉ាងនេះ ពោតរបស់ប្រជាពលរដ្ឋអាចខូច លក់អត់បានថ្លៃទេ ។
ដូច្នេះដើម្បីកុំឱ្យពោតខូច ត្រូវនាំគ្នា សម្រុកបកពោតឱ្យហើយអស់ទុកដាក់ឱ្យបានល្អ រង់ចាំពេលណាមានឈ្មួញ មកទិញហ៊ានឱ្យតម្លៃខ្ពស់ ដែលប្រជាពលរដ្ឋអាចលក់បាន ដើម្បីដោះស្រាយជីវភាពគ្រប់ក្រុមគ្រួសារ ។ លោករដ្ឋមន្ត្រីក៏បានថ្លែងដែរថា ការមកជួយនាពេលនេះ គឺមិនប្រកាន់និន្នាការនយោបាយណាមួយឡើយ ៕
ចែករំលែកព័តមាននេះ