រាជធានីភ្នំពេញ ៖ បុរសជនជាតិអេស្ប៉ាញម្នាក់ត្រូវនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញសហការជាមួយនគរបាលប៉ុស្តិ៍រដ្ឋបាលផ្សារថ្មីទី៣ធ្វើការឃាត់ខ្លួន កាលពីវេលាម៉ោង១០ និង១០នាទីយប់ ថ្ងៃទី១១ សីហា ២០១៣ បន្ទាប់ពីនគរបាលជំនាញរកឃើញសាកសពបុរសជនជាតិអង់គ្លេសម្នាក់ដេកស្លាប់ស្អុយរលួយត្រូវគេរុំក្នុងតង់កៅស៊ូទុកក្នុងបន្ទប់លេខD3E4 នៃផ្ទះជួលលេខ១៦០ ផ្លូវលេខ៦៣ ភូមិទី១២ សង្កាត់ផ្សារថ្មីទី៣ ខណ្ឌដូនពេញ។
មន្ត្រីនគរបាលជំនាញបានឱ្យដឹងថា ជនសង្ស័យឈ្មោះ BLUNDELL PEREZ RI CARDO ភេទប្រុស អាយុ៤០ឆ្នាំ ជនជាតិអេស្ប៉ាញ កាន់លិខិតឆ្លងដែនលេខBA ៣០១៩៦០ ជាអ្នកទេសចរណ៍ ស្នាក់នៅផ្ទះជួលកើតហេតុខាងលើ ដោយឡែកជនរងគ្រោះដែលសមត្ថកិច្ចជំនាញដាក់ការសង្ស័យថាស្លាប់ដោយគេធ្វើឃាតឈ្មោះ JOHN CONNELL ភេទប្រុស អាយុ៤៣ឆ្នាំ ជនជាតិអង់គ្លេស ជាអ្នកទេសចរណ៍ កាន់លិខិតឆ្លងដែនលេខ៥១២១៥៩៦៨៣ ស្នាក់នៅជាមួយជនសង្ស័យខាងលើ។
នគរបាលជំនាញមួយរូបបានបង្ហើបឱ្យដឹងថា សពបុរសជនជាតិអង់គ្លេសនេះអាចស្លាប់២សប្តាហ៍មកហើយ ព្រោះសាច់បានរលេះរលួយឃើញឆ្អឹងដោយអន្លើ។ ការស្លាប់នេះសមត្ថកិច្ចដាក់ការសង្ស័យជារឿងឃាតកម្មច្រើនជាង តែទោះជាយ៉ាងណាសមត្ថកិច្ចកំពុងបន្តការស្រាវជ្រាវ។ ពេលនេះជនសង្ស័យខាងលើត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ៕
ចែករំលែកព័តមាននេះ