រាជធានីភ្នំពេញ ៖ បុរសជនជាតិអាមេរិកាំងម្នាក់ត្រូវកម្លាំងនគរបាលមន្ទីរប្រឆាំងគ្រឿងញៀនក្រសួងមហាផ្ទៃសហការជាមួយមន្ត្រីអនុវត្តច្បាប់គ្រឿងញៀនសហរដ្ឋអាមេរិក(DEA) តំណាងស្ថានទូតអាមេរិកប្រចាំកម្ពុជា និងព្រះរាជអាជ្ញាអមសាលាដំបូងរាជធានីភ្នំពេញចាប់ឃាត់ខ្លួននៅមុខផ្ទះលេខ៣៦Eo ផ្លូវលេខ១០៨ ភូមិ៥ សង្កាត់វត្តភ្នំ ខណ្ឌដូនពេញ កាលពីវេលាម៉ោង១១ និង១៥នាទីព្រឹក ថ្ងៃទី៨ សីហា ២០១៣ ខណៈពេលជននោះកំពុងឈរជាមួយប្រពន្ធ ។
សមត្ថកិច្ចបានឱ្យដឹងថា បុរសជនជាតិអាមេរិកនេះត្រូវបានឃាត់ខ្លួនតាមដីការបស់តុលាការសហរដ្ឋអាមេរិកពាក់ព័ន្ធបទល្មើសគ្រឿងញៀននៅសហរដ្ឋអាមេរិក និងឆ្លងដែនខុសច្បាប់មកកម្ពុជា។ ជនសង្ស័យឈ្មោះ PETERSEN CHRI STOPHER JAMES ភេទប្រុស អាយុ៣៨ឆ្នាំ ជនជាតិអាមេរិក កាន់លិខិតឆ្លងដែនលេខ៥០៤៥៥២៤១១ ស្នាក់នៅអាសយដ្ឋានដូចបានរៀបរាប់ខាងលើ។
នគរបាលមូលដ្ឋានបានឱ្យដឹងថា ជនជាតិអាមេរិកដែលឃាត់ខ្លួនខាងលើបានមកជួលផ្ទះស្នាក់នៅទើបតែបានរយៈពេល២ខែប៉ុណ្ណោះ ហើយមានប្រពន្ធជាជនជាតិអាមេរិកដែរ តែមិនត្រូវបានឃាត់ខ្លួនទេ។ បន្ទាប់ពីសួរចម្លើយអស់រយៈពេលជាង២ម៉ោង ជនសង្ស័យត្រូវបានសមត្ថកិច្ចដកហូតសម្ភារមួយចំនួន រួចបញ្ជូនទៅកាន់មន្ទីរប្រឆាំងគ្រឿងញៀនក្រសួងមហាផ្ទៃ ។
ទាក់ទិននឹងការឃាត់ខ្លួនជនសង្ស័យជាជនជាតិអាមេរិកខាងលើនេះមិនត្រូវបានមន្ត្រីក្រសួងមហាផ្ទៃបញ្ជាក់មូលហេតុលំអិតនោះទេ គ្រាន់តែប្រាប់ថា អនុវត្តតាមដីកាតុលាការសហរដ្ឋអាមេរិក ហើយជននេះនឹងត្រូវបញ្ជូនទៅប្រទេសអាមេរិកវិញនៅពេលណាមានបញ្ជាពីថ្នាក់លើ៕
ចែករំលែកព័តមាននេះ