សម្តេចនាយករដ្ឋមន្រ្តី ហ៊ុន សែន បានមានប្រសាសន៏ថា គណបក្សប្រជាជនកម្ពុជា បានបង្កើតគណៈកម្មការមួយដឹកនំាដោយលោកឧបនាយករដ្ឋមន្រ្តី ស ខេង និង លោក សាយ ឈុំ អគ្គលេខាធិការគណបក្សប្រជាជនកម្ពុជា ដើម្បីចរចានយោបាយជាមួយគណបក្សសង្គ្រោះជាតិ ហើយថា បើចំាបាច់សម្តេចនឹងចរចាផ្ទាល់ជាមួយលោកសមរង្ស៊ី ។
ប្រសាសន៏របស់សម្តេចនាយករដ្ឋមន្រ្តី ហ៊ុន សែន យ៉ាងដូច្នេះបានធ្វើឡើងនៅរសៀលថ្ងៃទី៣១កក្កដា ២០១៣នេះ ក្នុងឱកាសដែលសម្តេចបានបង្ហាញមុខជាសាធារណៈ នៅក្នុងការចុះពិនិត្យការដ្ឋានសាងសង់ស្ពានអាកាសស្ទឹងមានជ័យ ។
កោះសន្តិភាពនៅមិនទាន់អាចទាក់ទង ដើម្បីសុំសេចក្តីអត្ថាធិប្បាយបានភ្លាមៗនៅឡើយទេ ពីតំណាងគណបក្សសង្គ្រោះជាតិនៅរសៀលថ្ងៃពុធនេះ ។ ជាមួយគ្នានេះដែរ សម្តេចនាយករដ្ឋមន្រ្តី ហ៊ុន សែន ក៏បានស្វាគមន៏ចំពោះសំណើឲ្យមានអន្តរជាតិចូលរួមពិនិត្យភាពមិនប្រក្រតីនៅក្នុងការបោះឆ្នោតនោះផងដែរ ។
ការលើកឡើងស្វាគមន៏របស់សម្តេចនាយករដ្ឋមន្រ្តី ហ៊ុន សែន នៅរសៀលនេះ បានធ្វើឡើង បន្ទាប់ពីលោកសមរង្ស៊ី ប្រធានគណបក្សសង្គ្រោះជាតិកាលពីព្រឹកថ្ងៃទី២៩កក្កដាកន្លងមកនេះ បានប្រកាសមិនទទួលយកលទ្ឋផលនៃការបោះឆ្នោត និង បានស្នើសុំឲ្យមានការបង្កើតគណៈកម្មការចម្រុះមួយ ដើម្បីស៊ើបអង្កេតនូវភាពមិនប្រក្រតីនៃការបោះឆ្នោត ។
បើតាមមេបក្សប្រឆាំង គណៈកម្មការចម្រុះនេះមានសមាសភាពមកពី គណបក្សប្រជាជនកម្ពុជា គណបក្សសង្គ្រោះជាតិ តំណាង គជប អង្គការសង្គមស៊ីវិលជាតិ និងអង្គការអន្តរជាតិនានា ដែលធ្វើការងារពាក់ព័ន្ឋនឹងការបោះឆ្នោត ៕
ចែករំលែកព័តមាននេះ