តាមប្រភពព័ត៌មានពីបញ្ជាការកងរាជអាវុធលើផ្ទៃប្រទេសបានឱ្យដឹងថា លោកឧត្តមសេនីយ៍ឯក យ៉ា គឹមអីុ មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ត្រូវបានឈប់សម្រាកពីការងារបណ្តោះអាសន្ន ដោយសារលោកមានសុខភាពទ្រុឌទ្រោមមិនអាចបំពេញការងារនៅចំពោះមុខបាន ហើយអ្នកដែលមកជំនួសតំណែង និងការងាររបស់លោកមេបញ្ជាការរូបនេះ គឺលោកឧត្តមសេនីយ៍ឯក វង្ស ពិសេន មេបញ្ជាការរងកងរាជអាវុធហត្ថលើផ្ទៃប្រទេស នឹងត្រូវមកកាន់ការងារបន្ថែមថ្មីមួយទៀត គឺមេបញ្ជាការកងរាជអាវុធហត្ថរាជធានីភ្នំពេញ។
ពុំមានប្រភពព័ត៌មានច្បាស់ការណ៍ណាមួយអះអាងពីការឈប់សម្រាករបស់លោកយ៉ា គឹមអីុ ក្រៅពីបញ្ហាសុខភាពនោះទេ គឺមន្ត្រីភាគច្រើនតែងតែនិយាយថា លោកយ៉ា គឹមអីុ មានសុខភាពទ្រុឌទ្រោម ហើយត្រូវបានសុំសម្រាកពីការងារជាបណ្តោះអាសន្ន ។
ដោយឡែកលោកយ៉ា គឹមអីុ ពេលមើលឃើញព័ត៌មាននេះបានទូរស័ព្ទមកកាន់វែបសាយកោះសន្តិភាពបញ្ជាក់ថា តាមពិតរូបលោកនៅធ្វើការងារដដែលទេ មិនមានការឈប់សម្រាកអ្វីឡើយ… ចំណែកលោកវង្ស ពិសេន គឺពិតជាត្រូវថ្នាក់លើបញ្ជូនឱ្យមកកាន់ការងារនៅបញ្ជាការដ្ឋានរាជធានីភ្នំពេញមែន គឺជួយការងារដល់រូបលោក ។
ប្រភពព័ត៌មាននិយាយមិនចំចំណុចបែបនេះ ធ្វើឱ្យមតិសាធារណៈឆ្ងល់ថា តើលោកវង្ស ពិសេន មកជួយធ្វើការងារក្នុងនាមកូនចៅ ឬយ៉ាងណា? ប៉ុន្តែបើតាមមន្ត្រីប៉េអឹមបាននិយាយថា មកដល់បញ្ជាការដ្ឋានរាជធានីថ្ងៃដំបូងលោកវង្ស ពិសេន បានប្រជុំដាក់ផែនការការងារ និងប្រកាសចាត់ចែងទៅកាន់មេបញ្ជាការប៉េអឹមតាមខណ្ឌនីមួយៗឱ្យពង្រឹងការងាររួចរាល់អស់ទៅហើយ ប្រៀបដូចរូបលោកជាមេបញ្ជាការស្តីទីអញ្ចឹង ៕
ចែករំលែកព័តមាននេះ