រាជធានីភ្នំពេញ ៖ នៅក្នុងឆ្នាំ១៩៩៨ ចំនួនអ្នកឆ្លងមេរោគអេដស៍មានចំនួន១០០នាក់ក្នុងមួយថ្ងៃ ប៉ុនន្តែបច្ចុប្បន្ននៅក្នុងប្រទេសកម្ពុជាយើងមានអ្នកឆ្លងមេរោគអេដស៍តែ៣នាក់ប៉ុណ្ណោះក្នុងមួយថ្ងៃ ។ នេះបើតាមការអះអាងរបស់លោក មាន ឈីវុន ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ ។
លោកវេជ្ជបណ្ឌិត មាន ឈីវុន បានថ្លែងបែបនេះនៅក្នុងវគ្គបំផុសស្មារតីស្តីពីគម្រោង សហគមន៍ស្វែងរកការគាំទ្រសម្រាប់កាត់បន្ថយគ្រោះថ្នាក់ពីមេរោគអេដស៍ និងជំងឺអេដស៍ ការ ប្រើប្រាស់គ្រឿងញៀន ជួញដូរមនុស្ស និងការការពារអនិតិជន កាលពីថ្ងៃទី១២ កក្កដា នៅសណ្ឋាគារសាន់វេ ។ លោកវេជ្ជបណ្ឌិតបន្តថា នៅឆ្នាំ១៩៩៨ យើងមានអ្នកឆ្លងមេរោគអេដស៍ជិត១០០នាក់ក្នុង១ថ្ងៃៗ ចំណែកបច្ចុប្បន្ននេះយើងមានអ្នកឆ្លងជំងឺអេដស៍ចំនួន៣នាក់ក្នុងមួយថ្ងៃ ។ ជាគោលដៅ នៅឆ្នាំ២០២០យើងកាត់បន្ថយចំនួនអ្នកឆ្លងមេរោគអេដស៍ក្នុង៣ថ្ងៃមានចំនួន១នាក់ និងឈានដល់អ្នកឆ្លងជំងឺអេដស៍មានក្រោម៣០០នាក់ ក្នុងមួយឆ្នាំ ។
លោក វេជ្ជបណ្ឌិតមាន ឈីវុន បន្ថែមថា ដើម្បីកាត់បន្ថយយើងត្រូវធ្វើការថែរក្សាអ្នកជំងឺអេដស៍ដោយយកឱសថប្រឆំាងនឹងមេរោគអេដស៍ទៅប្រើប្រាស់បង្ការកុំឱ្យឆ្លងព្រោះថា អ្នកវិទ្យាសាស្ត្របានរកឃើញថាអ្នកដែលទទួលបានថ្នាំពន្យារអាចពន្យារពេលនៃការឆ្លងមេរោគអេដស៍ ប៉ុន្តែការប្រើប្រាស់ថ្នាំពន្យារនេះមិនអាចមិនឲ្យឆ្លងបានទេ គឺវានៅតែឆ្លងគ្រាន់តែវាមានរយៈពេលយូរជាងយើងមិនបានប្រើប្រាស់ ។ លោកវេជ្ជបណ្ឌិតបន្តថា ខែកក្កដា នៅឆ្នាំ២០០១ យើងបានចាប់ផ្តើមព្យាបាលជំងឺអេដស៍ ហើយការព្យាបាលដោយប្រើប្រាស់ឱសថប្រឆំាងនេះ ប៉ុន្តែការប្រើប្រាស់នេះមានការពិបាកព្រោះកាលយើងចំណាយប្រាក់ជិត១ម៉ឺនដុល្លារហើយពេលនោះយើងបានព្យាបាលបានតែ៧១នាក់ទេ ។ អ្នកទាំង៧១នាក់នោះមានអ្នកខ្លះក៏បានស្លាប់ និងអ្នកខ្លះទៀតក៏នៅមានជីវិតរស់នៅរហូតមកដល់សព្វថ្ងៃនេះ ។
លោកឧត្តមសេនីយ៍ទោ ប៉ែន វិបុល ប្រធានលេខាធិការដ្ឋានអេដស៍នៃក្រសួងមហាផ្ទៃ មានប្រសាសន៍ថា គម្រោងសហគមន៍ស្វែងរកការគាំទ្រសម្រាប់កាត់បន្ថយគ្រោះថ្នាក់ពីមេរោគអេដស៍ និងជំងឺអេដស៍ ការប្រើប្រាស់គ្រឿងញៀន និងការជួញដូរមនុស្សនិងការពារអនីតិជននេះ ជាផែនការយុទ្ធសាស្ត្រគូសបញ្ជាក់បង្ហាញយ៉ាងច្បាស់ដល់មន្ត្រីនគរបាល ដើម្បីក្លាយជាកម្លាំងចលកររបស់សហគមន៍ក្នុងការគាំទ្រដល់ការឆ្លើយតបនឹងជំងឺអេដស៍ និងមេរោគអេដស៍ ។ ការបង្កើត និងការអនុវត្តនូវវេទិការួមគោលនយោបាយរួម និងផែនការប្រតិបត្តិ ក៏ដូចជា ពង្រីកសមត្ថភាពមន្ត្រីនគរបាលក្នុងការចូលរួមក្នុងសហគមន៍ និងសមត្ថភាពក្នុងការឆ្លើយតបទៅនឹងមេរោគអេដស៍ និងជំងឺអេដស៍ ដូចដែលបានគូសបញ្ជាក់ក្នុងទិសដៅរបស់ផែនការ ។
លោកឧត្តមសេនីយ៍ទោបន្តថា មន្ត្រីនគរបាលដើរតួជាកម្លាំងចលករក្នុងសហគមន៍ដូចជា នៅក្នុងខេត្តបន្ទាយមានជ័យបានអនុវត្តសាកល្បងជាមួយសហគមន៍ ដើម្បីគាំទ្រដល់ការបង្ការមេរោគអេដស៍ ការថែទាំ និងការព្យាបាល ។ គំរូរបស់មន្ត្រីនគរបាល ដើរតួជាកម្លាំងចលកររបស់សហគមន៍ដែលត្រូវការចាំបាច់តាមតំបន់គោលដៅប្រឈមមុខខ្ពស់នឹងមេរោគអេដស៍ដែលក្រុមប្រជាជនកំពុងប្រឈមមុខខ្ពស់បានប្រមូលផ្តុំ ។
លោកឧត្តមសេនីយ៍ទោបន្ថែមទៀតថា អាស្រ័យលើភាពជោគជ័យនៃគម្រោងភាពជាដៃគូសហគមន៍ដើម្បីសុវត្ថិភាពក្នុងការឆ្លើយតបទៅនឹងមេរោគអេដស៍ និងជំងឺអេដស៍ ការប្រើប្រាស់គ្រឿងញៀន និងការជួញដូរមនុស្សនិងការពារអនីតិជនក្នុងខេត្តបន្ទាយមានជ័យ លេខាធិការដ្ឋានអេដស៍ក្រសួងមហាផ្ទៃបានយកគំរូរបស់គម្រោងនេះមកអនុវត្តនៅស្នងការដ្ឋាននគរបាលខេត្តព្រះសីហនុ ក្រោមជំនួយឧបត្ថមរបស់អង្គការសហប្រជាជាតិទទួលបន្ទុកកិច្ចការគ្រឿងញៀន និងបទឧក្រិដ្ឋកម្ម និងស្នងការដ្ឋានរាជធានីភ្នំពេញ។
សូមបញ្ជាក់ថា វគ្គបំផុសស្មារតីនេះមានការចូលរួមពីមន្ត្រីមានសមត្ថកិច្ចចំនួន៤ខណ្ឌ មាន ខណ្ឌសែនសុខ ខណ្ឌទួលគោក ខណ្ឌឫស្សីកែវ និងខណ្ឌដង្កោ និងមន្ត្រីពាក់ព័ន្ធសរុបប្រមាណជា១០០នាក់ ៕
ចែករំលែកព័តមាននេះ