រាជធានីភ្នំពេញ ៖ បញ្ហាការលើកលែងទោសដល់ទណ្ឌិតសម រង្ស៊ី ពីព្រះមហាក្សត្រ បានធ្វើឱ្យមានការដេញដោលគ្នាគួរឱ្យកត់សម្គាល់ បន្ទាប់ពីប្រភពព័ត៌មានខ្លះបាននិយាយពីការលើកលែងទោសគួរឱ្យភ្ញាក់ផ្អើលនៅព្រឹកថ្ងៃទី១២ កក្កដា ។ ទោះបីជាយ៉ាងនេះក្តី នារសៀលថ្ងៃដដែល ព្រះរាជក្រឹត្យលើកលែងទោសដល់លោកសម រង្ស៊ី ត្រូវបានផ្សព្វផ្សាយយ៉ាងច្បាស់ហើយ និងជាការបង្ហាញឱ្យឃើញពីរបត់ថ្មីនៃនយោបាយផងដែរ ។
មុននេះ ប្រភពពីគណបក្សសង្គ្រោះជាតិ ដែលស្និទ្ធនឹងព្រះអង្គម្ចាស់ធម្មិកោបានបង្ហើបថា ព្រះអង្គម្ចាស់បានទទួលព័ត៌មានថាព្រះមហាក្សត្របានឡាយព្រះហស្តលេខាលើព្រះរាជក្រឹត្យរួចហើយ ។ ប៉ុន្តែការអះអាងនោះនៅមិនទាន់មានប្រភពផ្លូវការណាមួយបញ្ជាក់ថាពិត ឬមិនពិតនោះទេ ខណៈពេលដែលមានការអះអាងផ្ទុយគ្នាក្នុងថ្នាក់ដឹកនាំគណបក្សសង្គ្រោះជាតិ ពីវត្តមានប្រធានគណបក្សគឺលោកសម រង្ស៊ី ។
គួរកត់សម្គាល់ថា លោកសម រង្ស៊ី បាននិរទេសចេញទៅក្រៅប្រទេសដោយខ្លួនឯងប្រមាណ៤ឆ្នាំមកហើយ តាំងពីចុងឆ្នាំ២០០៩ បន្ទាប់ពីតុលាការផ្តន្ទាទោសដាក់ពន្ធនាគារ១២ឆ្នាំ ។ មុននេះដែរ លោកសម រង្ស៊ី បានប្រកាសដោយខ្លួនឯងថា លោកនឹងមានវត្តមាននៅកម្ពុជាមុនថ្ងៃបោះឆ្នោតជាតិថ្ងៃទី២៨ កក្កដា ។
លោកប៉ុល ហំម គណៈកម្មការនាយកនៃគណបក្សសង្គ្រោះជាតិបានបញ្ជាក់ថា លោកបានឃើញសារព័ត៌មានចុះផ្សាយពីបញ្ហាដែលថាព្រះមហាក្សត្របានទ្រង់ឡាយព្រះហស្តលេខាលើព្រះរាជក្រឹត្យលើកលែងទោសដល់លោក សម រង្សុី ដែរ តែលោកនៅមិនទាន់បានទទួលព័ត៌មានផ្លូវការ និងបានឃើញព្រះរាជក្រឹត្យនោះនៅឡើយទេ រហូតមកដល់ពេលនេះ ។ ទោះយ៉ាងណាក៏ដោយលោកប៉ុល ហំម បានថ្លែងថា លោក សម រង្សុី នឹងមានវត្ដមាននៅកម្ពុជា មុនពេលបោះឆ្នោតជាតិថ្ងៃទី២៨ កក្កដា ឆ្នាំ២០១៣ ខាងមុខនេះ បើទោះបីជាមានព្រះរាជក្រឹត្យលើកលែងទោស ឬក៏គ្មានព្រះរាជក្រឹត្យក៏ដោយ ក៏លោក សម រង្សុី នៅតែមកកម្ពុជា ដើម្បីចូលរួមបោះឆ្នោតដែរ ។
ប្រភពមួយផ្សេងទៀតនិយាយថា កាលពីសប្ដាហ៍មុននេះ លោក សម រង្សុី បានផ្ញើលិខិតថ្វាយព្រះមហាក្សត្រផ្ទាល់ តាមរយៈសារអេឡិចត្រូនិក ដើម្បីសុំព្រះរាជទាននៃការលើកលែងទោសដល់គាត់ ប៉ុន្ដែខ្លឹមសារនៃលិខិតនោះយ៉ាងណាខ្លះ ទំនងជាគ្មាននរណាម្នាក់នៅក្នុងគណបក្សសង្គ្រោះជាតិបានដឹងទេ ។ ប្រភពដដែលអះអាងថា គេជឿថា ព្រះរាជក្រឹត្យលើកលែងទោសពិតជាមានមែន គ្រាន់តែថាព្រះរាជខុទ្ទកាល័យព្រះមហាក្សត្រផ្សព្វផ្សាយនៅពេលណាតែប៉ុណ្ណោះ ។
យោងតាមក្រុមអ្នកច្បាប់ថ្លែងថា លោក សម រង្សុី ជាទណ្ឌិតដែលត្រូវបានតុលាការចេញសាលក្រមកាត់ទោសកំបាំងមុខជាច្រើនលើកច្រើនសា និងបានផ្តន្ទាទោសសរុប១២ឆ្នាំ គិតពីពេលចាប់ខ្លួនដាក់ពន្ធនាគារ ។ ទោះបីជាបែបនេះក្តី មានតែព្រះរាជក្រឹត្យលើកលែងទោសតែមួយគត់ ដែលស្មើនឹងលិខិតឆ្លងដែនសម្រាប់ទណ្ឌិតរូបនេះមកកម្ពុជាបាន និងមិនមានការចាប់ខ្លួនដាក់ពន្ធនាគារ ហើយព្រះរាជក្រឹត្យនោះ លុះត្រាតែមានការស្នើសុំពីសម្តេចនាយករដ្ឋមន្ត្រី ។ ជុំវិញព័ត៌មានទាំងនេះនៅមិនទាន់ត្រូវបានទម្លាយជាសាធារណៈនោះទេ ។ លោក សម រង្សុី កាលពីពេលកន្លងមក ក៏ធ្លាប់ត្រូវបានតុលាការកាត់ទោសដែរ ហើយក្រោយមកក៏ត្រូវបានព្រះមហាក្សត្រចេញព្រះរាជក្រឹត្យលើកលែងទោសដែរ តាមការស្នើសុំពីសម្តេចតេជោ នាយករដ្ឋមន្ត្រី ។
ក្រុមអ្នកតាមដានព័ត៌មានជុំវិញករណីលោក សម រង្សុី បាននិយាយថា ការលើកលែងទោសដល់លោក សម រង្សុី គឺជាការឆ្លុះបញ្ចាំងឱ្យឃើញថា រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខ មិនបានភ័យខ្លាចសូម្បីតែបន្តិចចំពោះវត្តមានរបស់លោក សម រង្សុី នៅកម្ពុជា ព្រោះវាគ្មានអ្វីដែលប្រែប្រួលនោះទេ ហើយការគេចទៅក្រៅប្រទេសនោះគឺគេចដោយខ្លួនឯង គ្មាននរណាដេញឡើយ ។ រីឯការកំណត់ថាមានទោស ឬអត់ គឺតុលាការ ។
យោងតាមសារលិខិតថ្វាយព្រះមហាក្សត្រដើម្បីសុំលើកលែងទោសដល់លោក សម រង្សុី នេះ សម្តេចតេជោ ហ៊ុន សែន បានបញ្ជាក់ច្បាស់ថា ដោយយោងលើស្មារតីបង្រួបបង្រួមជាតិ ការផ្សះផ្សាជាតិ និងដើម្បីឱ្យការបោះឆ្នោតជ្រើសតាំងតំណាងរាស្ត្រនីតិកាលទី៥ប្រព្រឹត្តទៅតាមគោលការណ៍លទ្ធិប្រជាធិបតេយ្យសេរីពហុបក្ស ដោយមានគ្រប់ភាគីពាក់ព័ន្ធចូលរួម និងផ្អែកតាមលិខិតស្នើសុំព្រះរាជទានលើកលែងទោសរបស់លោក សម រង្សុី ទើបសម្តេចតេជោស្នើសុំព្រះរាជតម្រិះលើកលែងទោសដល់ទណ្ឌិតរូបនេះ ។
ក្រុមអ្នកវិភាគនិយាយថាទោះបីជាលោកសម រង្ស៊ី ទទួលបានការលើកលែងទោសក្តីក៏លោកសម រង្ស៊ើ មិនអាចចូលរួមការបោះឆ្នោតនៅថ្ងៃទី២៨ កក្កដា ខាងមុខនេះបានទេ ដោយសារមានឈ្មោះជាទណ្ឌិតត្រូវគ.ជ.ប សម្រេចលុបឈ្មោះទៅហើយ ។ ដោយកត្តាទាំងអស់នេះហើយលោកសម រង្ស៊ី ក៏គ្មានសិទ្ធិឈរឈ្មោះដែរ ។
តាមប្រភពព័ត៌មានចុងក្រោយបានឱ្យដឹងថា បន្ទាប់ពីការលើកលែងទោសនេះ លោកសម រង្ស៊ី មានគម្រោងវិលត្រឡប់មកប្រទេសវិញនៅថ្ងៃអាទិត្យទី១៤ កក្កដា ខាងមុខ ។ នេះបើតាមការអះអាងរបស់មន្ត្រីគណបក្សសង្គ្រោះជាតិ ។ មន្ត្រីដដែលបានឱ្យដឹងទៀតថា ការវិលត្រឡប់របស់លោកសម រង្ស៊ី នេះដែរ ក៏នឹងមានការហែក្បួនពីព្រលានយន្តហោះ ពីអ្នកគាំទ្រលោកច្រើនរយនាក់ផងដែរ ៕
ចែករំលែកព័តមាននេះ