អ៊ីរ៉ង់អះអាងពីការផ្អាកប្រហារជីវិតនាង SAKINEHម្តងទៀត
ដោយ ៖ ប្រុសកោះ
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៥:២០
គេហទំព័របរទេស
នារីអ៊ីរ៉ង់ដែលត្រូវកាត់ទោសប្រហារជីវិតដោយគប់នឹងដុំថ្ម
អាជ្ញាធរអ៊ីរ៉ង់អះអាងម្តងទៀតកាលពីថ្ងៃទី៨ កញ្ញា ពីការផ្អាកប្រហារជីវិតដោយគប់ដុំថ្មប្រឆាំងនារីអ៊ីរ៉ង់ម្នាក់ដែលទទួលការកាត់ទោសកាលពីឆ្នាំ២០០៨ ពីបទសហាយស្មន់។ សាលក្រមនេះកំពុងតែត្រូវពិនិត្យឡើងវិញ។ នេះជាការអះអាងរបស់រដ្ឋមន្ត្រីការបរទេសអ៊ីរ៉ង់។ នារីមានកូនអាយុ៤៣ឆ្នាំរូបនេះទទួលការចោទប្រកាន់ផងដែរពីបទចូលរួមក្នុងការធ្វើឃាតប្តីរបស់ខ្លួន ក៏ប៉ុន្តែព័ត៌មានទាំងឡាយអំពីការចោទប្រកាន់នេះហាក់ផ្ទុយគ្នា។ ប្រភពមួយចំនួនលើកឡើងពីការកាត់ទោសនេះ ក៏ប៉ុន្តែបើតាមរដ្ឋមន្ត្រីការបរទេសអ៊ីរ៉ង់ថា ការចោទប្រកាន់ទាំងឡាយកំពុងតែពិនិត្យសំរាប់សាលក្រមជាស្ថាពរមួយ។ យើងយល់ថា ករណីនាងSAKINEH ជារឿងធម្មតាដូចដែលកើតមានក្នុងប្រទេសដទៃៗទៀតជាច្រើន។ លោកពុំបាននិយាយពីពាក្យថា ប្រហារជីវិតដោយគប់ដុំថ្មឡើយ។
ដោយប្រកាសម្តងទៀតពីការផ្អាកប្រហារជីវិតស្ត្រីរូបនេះអ៊ីរ៉ង់អាចធ្វើការថ្លឹងថ្លែងពេលការគាបសង្កត់របស់អន្តរជាតិនៅតែមានខ្លាំង។ បុរីវ៉ាទីកង់ ព្រមទាំងប្រមុខរដ្ឋ និងប្រមុខរដ្ឋាភិបាលលោកខាងលិចជាច្រើនបានស្នើដល់ក្រុងតេហេរ៉ង់ឱ្យសំដែងកាយវិការសន្តោសប្រណីមួយ។ រដ្ឋមន្ត្រីការបរទេសបារាំងលោក BERNARD KOUC- HNER អះអាងថា លោកត្រៀមមកកាន់អ៊ីរ៉ង់ប៉ុនប៉ងឱ្យមានការដោះលែងនារីរូបនោះ។ ចំណែកលោកចូសេ ម៉ានុយអែល បារ៉ូសូប្រធានគណៈកម្មាធិការអឺរ៉ុបកាលពីថ្ងៃទី៧ កញ្ញា កន្លងមកនេះចាត់ទុកការប្រហារជីវិតដោយគប់ដុំថ្មថាជាវិធីដ៏សាហាវព្រៃផ្សៃបំផុត។ លោកមានប្រសាសន៍ថា យើងថ្កោលទោសអំពើបែបនេះដែលពុំអាចមានហេតុផលណាមកសំអាងទាំងខាងសីលធម៌ទាំងខាងសាសនា៕
