គណៈប្រតិភូសារព័ត៌មានវៀតណាមដឹកនាំដោយលោក Hoang Huu Laong អគ្គនាយកអាជ្ញាធរសារព័ត៌មាននៃប្រទេសវៀតណាម និងសមាជិករបស់លោក៦រូប បានអញ្ជើញជួបសម្តែងការគួរសម សំណេះសំណាលអំពីសារព័ត៌មាន និងផ្លាស់ប្តូរយោបល់គ្នា នៅការិយាល័យធំរបស់សារព័ត៌មានកោះសន្តិភាពកាលពីរសៀលថ្ងៃទី២ កក្កដា ២០១៣ ដោយខាងភាគីសារព័ត៌មានកោះសន្តិ
គណៈប្រតិភូសារព័ត៌មានវៀតណាមដឹកនាំដោយលោក Hoang Huu Laong អគ្គនាយកអាជ្ញាធរសារព័ត៌មាននៃប្រទេសវៀតណាម និងសមាជិករបស់លោក៦រូប បានអញ្ជើញជួបសម្តែងការគួរសម សំណេះសំណាលអំពីសារព័ត៌មាន និងផ្លាស់ប្តូរយោបល់គ្នា នៅការិយាល័យធំរបស់សារព័ត៌មានកោះសន្តិភាពកាលពីរសៀលថ្ងៃទី២ កក្កដា ២០១៣ ដោយខាងភាគីសារព័ត៌មានកោះសន្តិភាពមានលោកយិន ពិសិដ្ឋ និពន្ធនាយករង និងសហការី៣រូបផងដែរ ។
ប្រតិភូសារព័ត៌មានវៀតណាម ដែលជួបសំណេះសំណាលជាមួយអ្នកកាសែតកោះសន្តិភាពនាពេលនេះ ភាគច្រើនជានិពន្ធនាយកប្រចាំខេត្តនីមួយៗដូចជាខេត្ត Lang Son, ខេត្ត Son La, ខេត្ត Hai Duong, ខេត្តតៃនិញ និងអ្នកយកព័ត៌មានរបស់ទូរទស្សន៍ Kien Giang ។ លោក Hoang Huu Luong អគ្គនាយកអាជ្ញាធរសារព័ត៌មានវៀតណាម បានថ្លែងកោតសរសើរចំពោះកាសែតកោះសន្តិភាព ដែលអាចធ្វើខ្លួនឱ្យពេញនិយមក្នុងស្រទាប់ប្រជាពលរដ្ឋ ព្រមទាំងចែកផ្សាយបានទូលំទូលាយនៅទូទាំងប្រទេស ។
ឆ្លើយតបនឹងសំណួរដែលថា តើការចាប់ផ្តើម និងការរីកចម្រើនរបស់កោះសន្តិភាពនាពេលបច្ចុប្បន្នតាមរយៈអ្វី? ការខំប្រឹងប្រែងផ្ទាល់ខ្លួន ឬជាក្រុមហ៊ុន? ឬជាជំនួយអង្គការ? ឬរដ្ឋាភិបាល?
លោកយិន ពិសិដ្ឋ និពន្ធនាយករងកោះសន្តិភាពបានលើកឡើងថា ការចាប់ផ្តើមដំបូងរបស់កោះសន្តិភាព គឺជាការខំប្រឹងប្រែងផ្ទាល់របស់លោកឧកញ៉ាថុង អ៊ុយប៉ាង និងលោកជំទាវយិន ផាន្នី ព្រមជាមួយសហការីនៅក្នុងឆ្នាំ១៩៩៣ ក្រោយពេលដែលកាសែតនេះ មានឈ្មោះបោះសំឡេងខ្លាំងនៅសម័យសង្គមរាស្ត្រនិយម និងបានផ្អាកការចេញផ្សាយមួយរយៈក្នុងស័យរបបខ្មែរក្រហម ។ មិនមានជំនួយអង្គការ ឬក៏រដ្ឋាភិបាលអ្វីទេ? គឺទទួលបានប្រភពចំណូលលើការលក់នៅលើទីផ្សារ និងពីការផ្សព្វផ្សាយពាណិជ្ជកម្មរបស់អតិថិជន ដោយសារតែគេពេញនិយមលើកោះសន្តិភាព ។
លោកយិន ពិសិដ្ឋ បន្តថា ប្រភពចំណូលដែលបានមកពីស្មារតីខំប្រឹងប្រែងផ្ទាល់បែបនេះហើយ ទើបធ្វើឱ្យកោះសន្តិភាពអភិវឌ្ឍទាំងធនធានបុគ្គលិក ធនធានហិរញ្ញវត្ថុ និងពង្រីកការផ្សព្វផ្សាយមានទាំងវិទ្យុផ្សាយសំឡេង , គេហទំព័រ (Website) និងទស្សនាវដ្តី (មហាគ្រួសារ)។
លោក Hoang Huu Luong បានឱ្យដឹងថា នៅប្រទេសវៀតណាម ស្ថាប័នកាសែតល្បីៗពេញនិយម ក៏រកប្រភពចំណូលដូចគ្នានេះដែរ គឺការលក់ និងផ្សាយពាណិជ្ជកម្មពីអតិថិជន ហើយចំណូលពីអាជីវកម្មកាសែតក្នុង១ឆ្នាំប្រហែល៤០លានដុល្លារ គឺ២៥លានដុល្លារពីការផ្សាយពាណិជ្ជកម្ម, ២០លានដុល្លារពីការលក់ និង៥លានដុល្លារពីចំណូលផ្សេងៗ ប៉ុន្តែប្រាក់ចំណូលទាំងនោះត្រូវបង់ពន្ធទៅឱ្យរដ្ឋាភិបាលប្រហែល១០% ។ លោកអគ្គនាយករូបនេះ បញ្ជាក់ថា លោករីករាយខ្លាំងណាស់ ចំពោះការសំណេះសំណាល និងផ្លាស់ប្តូរបទពិសោធន៍ស្តីពីវិជ្ជាជីវៈសារព័ត៌មាន និងអាជីវកម្មកាសែតជាមួយកោះសន្តិភាព ។
បន្ទាប់ពីសំណេះសំណាលប្រហែល១ម៉ោង ប្រតិភូសារព័ត៌មានវៀតណាមបានបញ្ចប់ការសន្ទនា និងបន្តទៅជួបសំណេះសំណាលជាមួយស្ថាប័នកាសែតផ្សេងទៀត ។ សូមបញ្ជាក់ថា ជំនួបពិភាក្សានេះ បានកើតឡើងបន្ទាប់ពីក្រសួងព័ត៌មាននៃព្រះរាជាណាចក្រកម្ពុជាចុះអនុស្សរណយោគយល់ស្តីពីការផ្លាស់ប្តូរបទពិសោធន៍ជាមួយស្ថាប័នព័ត៌មានរដ្ឋនៃប្រទេសវៀតណាមកាលពីប៉ុន្មានឆ្នាំមុននេះ ៕
ចែករំលែកព័តមាននេះ