រាជធានីភ្នំពេញ ៖ការប្រកួតប្រដាល់ក្បាច់គុនបុរាណខ្មែរ ជាលក្ខណៈអន្តរជាតិ ឧបត្ថម្ភដោយណាហ្គាវើលនៅលើសង្វៀនស្ថានីយទូរទស្សន៍អប្សរា កាលពីរសៀលថ្ងៃសៅរ៍ទី២៩ មិថុនា កីឡាករកម្ពុជាឈ្នះ ១ ចាញ់១ និងស្មើ១ ។ កីឡាករទិត្យ សុវណ្ណគិរី មកពីសមាគមកីឡាប្រដាល់ក្រសួងកសិកម្មបានធ្វើឱ្យអ្នកគំាទ្ររបស់ខ្លួនមានការរីករាយក្នុងចិត្តយ៉ាងខ្លាំងបន្ទាប់ពីប្រកួតឈ្នះកីឡាករថៃ THNOU NOY KEATHA KOR ដោយពិន្ទុ ។ ចំណែកកីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិបានធ្វើឱ្យអ្នកគាំទ្រមានការខកចិត្តយ៉ាងខ្លាំងនៅពេលដែលរូបគេបណ្តោយឱ្យកីឡាករថៃ LOUK NAM KEAT KOR វាយសន្លប់នៅក្នុងទឹកទី៤ ។
ដោយឡែក កីឡាករសៀវ សំណាង មកពីសមាគមកីឡាប្រដាល់ក្រសួងកសិកម្ម ដែលបានប្រកួតជាមួយកីឡាករថៃTHAI KAY PAKEAT THUN MAK បានត្រឹមស្មើពិន្ទុគ្នាប៉ុណ្ណោះដោយសារសន្ទុះនៃការវាយគ្នាទៅវិញទៅមករបស់កីឡាករទាំង២ប្រដំប្រសងគ្នាគ្មាននរណាលើសនរណាឡើយ។ សុវណ្ណគិរី មានប្រវត្តិប្រកួតរហូតដល់ទៅ៤៩លើក ក្នុងនោះឈ្នះ៣៥ ចាញ់៩ ស្មើ៥ ច្រើនជាងកីឡាករថៃ THNOU NOY ដែលទើបតែប្រកួតបាន៣០ដងក្នុងនោះឈ្នះ២៥ ចាញ់៥ ។ ក្នុងពេលប្រកួតសុវណ្ណគិរី ហាក់មានការកោតញញើត THNOU NOY បន្តិច ដោយគេមិនហា៊នចូលកៀកគូប្រកួតនៅទឹកដំបូងឡើយ ។
លុះចូលទឹកទី២ទើបគេចាប់ផ្តើមធ្វើការវាយលុក ខណៈពេលដែលTHNOU NOY មិនទាន់មានការប្រុងប្រយ័ត្ន ។ ចាប់ពីទឹកទី៣រហូតទៅគេឃើញ THNOU NOY ព្យាយាមវាយបកសងវិញមិនបន្ធូរដៃឡើយ ជាមួយនឹងការទាត់ចេញដូចព្យុះ ប៉ុន្តែមិនទទួលបានលទ្ធផលទេ ។ សុវណ្ណគិរីបានសម្រុកចូលកៀកវាយកែងសំដៅសៀតផ្កា និងប្រើជង្គង់អុកទៅលើពោះទឹកចូលពេញៗធ្វើឱ្យ THNOU NOY ស្ទើរមិនមានឱកាសតដៃបាន ទើបបញ្ចប់ទឹកទី៥ ទិត្យ សុវណ្ណគិរី ឈ្នះដោយពិន្ទុ ។
សារឹម ង៉ា ចាញ់ Louk Nam នៅក្នុងទឹកទី៤យ៉ាងអស់ចិត្តបំផុត ។ នៅត្រឹមទឹកទី១ និងទី២ សារឹម ង៉ា ព្យាយាមដើរចូលវាយសម្រុកលើកីឡាករថៃរូបនេះ ប៉ុន្តែរាល់លើកត្រូវ Louk Nam ទាត់ឱ្យដួលទាំងជំហរតែម្តង ។ សារឹម ង៉ា បានព្យាយាមប្រើស្នៀតកែង វាយបកសងវិញមិនបង្អង់ឡើយ ប៉ុន្តែមិនទទួលបានផលទេ ព្រោះរាល់ការវាយចេញត្រូវ Louk Nam គេចផុតរហូត ។ ចូលដល់ទឹកទី៣ និងទី៤ សារឹម ង៉ា ហាក់បីដូចជាមានការរារែកក្នុងចិត្តបន្តិចមិនសូវជាហា៊នចូលកៀកដូចមុនទៀតឡើយ ។ ម្យ៉ាងវិញទៀតកម្លាំងរបស់គេក៏មានការស្រុតចុះជាងមុនជាបណ្តើរៗទៅហើយដែរ ទើបក្នុងទឹកទី៣គេត្រូវ Louk Nam វាយឱ្យរាប់៨ម្តង ។
ចូលដល់ទឹកទី៤ មិនទាន់បានពាក់កណ្តាលទឹកស្រួលបួលផង Louk Nam បានវាយសម្រុកទៅលើសារឹម ង៉ា រហូតដល់ថ្នាក់តដៃលែងរួច ក៏ត្រូវអាជ្ញាកណ្តាលបញ្ឈប់លែងឱ្យប្រកួតតែម្តង ។ ក្រៅពីគូអន្តរជាតិ៣គូនេះទៅនៅលើសង្វៀនដដែលកីឡាករអេ នីសសាន់ មកពីក្លិបអេភូថងកីឡា ផ្តួលកីឡាករម៉ាត់ សម្បត្តិ មកពីក្លិបបាត់ដំបងពាយ័ព្យនៅត្រឹមទឹកទី៣ ខណៈកីឡាករលួន សុខេង មកពីក្លិបសិង្ហកីឡា ផ្តួលកីឡាករលាង ស៊ីប៉ិច មកពីសមាគមកីឡាប្រដាល់ខេត្តកោះកុងនៅទឹកទី៤ ៕
ចែករំលែកព័តមាននេះ