សហភាពអឺរ៉ុបក្នុងសេចក្ដីថ្លែងការណ៍របស់ខ្លួនចុះថ្ងៃទី២៦ មិថុនា ឆ្នាំ២០១៣ បានសរសេរថា កម្ពុជានឹងចាប់ផ្ដើមដំណាក់កាលយុទ្ធការឃោសនាបោះឆ្នោតជាផ្លូវការសម្រាប់ការបោះឆ្នោតជ្រើសតាំងតំណាងរាស្ត្រក្នុងពេលឆាប់ៗខាងមុខនេះ ។ ការបោះឆ្នោតមួយដែលប្រកបដោយតម្លាភាព និងគួរឱ្យជឿទុកចិត្តបានគឺជាកាលានុវត្តភាពដ៏សំខាន់មួយ ដើម្បីពង្រឹងប្រជាធិបតេយ្យ និងធានាឱ្យមានការអភិវឌ្ឍប្រទេសកម្ពុជា នាពេលអនាគត ។
ប្រតិភូនៃសហភាពអឺរ៉ុបប្រចាំនៅព្រះរាជាណាចក្រកម្ពុជា សូមធ្វើការគូសបញ្ជាក់អំពីសារសំខាន់ចំពោះគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងការអនុវត្តអនុសាសន៍ដែលនៅសេសសល់របស់បេសកកម្មសង្កេតការណ៍បោះឆ្នោតឆ្នាំ២០០៨ របស់សហភាពអឺរ៉ុប ។ ក្នុងនោះរួមមានដូចដែលមានចែងក្នុងច្បាប់របស់កម្ពុជានាពេលបច្ចុប្បន្ននេះ សេចក្ដីត្រូវការឱ្យមានការផ្ដល់លទ្ធភាពប្រើប្រាស់ប្រព័ន្ធផ្សព្វផ្សាយដោយសមធម៌ និងការទប់ស្កាត់ការប្រើប្រាស់ធនធានរបស់រដ្ឋក្នុងអំឡុងពេលនៃយុទ្ធនាការឃោសនាបោះឆ្នោត ។
សហភាពអឺរ៉ុប ស្វាគមន៍ចំពោះការធ្វើឱ្យប្រសើរឡើងជាវិជ្ជមានលើការងារបច្ចេកទេសមួយចំនួនដែលបង្ហាញឱ្យឃើញរួចមកហើយ ក្នុងនីតិវិធីរបស់គណៈកម្មាធិការជាតិរៀបចំការបោះឆ្នោត និងលើកទឹកចិត្តឱ្យមានវិធានការបន្ថែមទៀត ដើម្បីកែលម្អឱ្យមានភាពត្រឹមត្រូវនៃបញ្ជីឈ្មោះអ្នកបោះឆ្នោត ។ សហភាពអឺរ៉ុប ស្វាគមន៍ចំពោះរាល់ការប៉ុនប៉ងសម្រេចឱ្យបាននូវដំណើរការបោះឆ្នោតមួយប្រកបដោយសន្តិវិធី ។ វាជាផលប្រយោជន៍របស់ប្រជាពលរដ្ឋកម្ពុជាទាំងអស់ ដែលយុទ្ធនាការបោះឆ្នោតលើកតម្កើងឱ្យមានការពិភាក្សាវែកញែកតាមបែបប្រជាធិបតេយ្យក្នុងន័យស្ថាបនា ដោយផ្តោតទៅលើបញ្ហាគោលនយោបាយដែលមានសារសំខាន់ ។
ក្នុងន័យនេះសហភាពអឺរ៉ុបសង្ឃឹមថា គណបក្សនយោបាយនឹងបញ្ឈប់ការប្រើប្រាស់វោហារសាស្ត្រដែលមានលក្ខណៈគំរាមកំហែង និងធ្វើឱ្យមានការចងកំហឹង ហើយនឹងចាប់ផ្តើមការពិភាក្សាជាចំហលើចក្ខុវិស័យសម្រាប់អនាគតរបស់ប្រទេសចាប់ពីពេលនេះតទៅ ៕
ចែករំលែកព័តមាននេះ