រាជធានីភ្នំពេញ ៖ ការប្រកួតជុំទី៤ ក្នុងពូលB នៅសង្វៀនបាយ័នស្ទឹងមានជ័យ បានរកឃើញហើយថា អ្នកណាជាអ្នកមានពិន្ទុកំពូល និងមានពិន្ទុលំដាប់ទី២ ដែលមានទឹកមាត់លេបក្នុងវគ្គប្រកួតខ្វែង ។ បើទោះជាពិន្ទុនេះ ស្ថិតក្នុងកាលៈទេសៈបណ្ដោះអាសន្ន ប៉ុន្តែគេមើលឃើញថា ជើងខ្លាំងទាំងពីរទំនងជាមិនរបូតឡើយ សម្រាប់តំណែងឈានទៅដណ្ដើមខ្សែក្រវាត់របស់ក្រុមហ៊ុនសេង ហុងហេង តាមការគ្រោងទុកជាមួយអ្នកឈ្នះ២រូបទៀតក្នុងពូល A ។
កីឡាករដែលទទួលពិន្ទុកំពូលក្នុងការប្រកួតនោះ គឺកីឡាករនូវ ស៊ីថា ជើងខ្លាំងមកពីក្លិបតាឡីដំរីមានឫទ្ធិ ដែលប្រកួត៤លើកមិនដែលចាញ់ទាល់តែសោះ ហើយកំពុងក្ដាប់១២ពិន្ទុនៅក្នុងដៃ ។ ដោយឡែកកីឡាករមួយរូបទៀត ដែលទទួលពិន្ទុខ្ពស់លំដាប់ទី២ គឺកីឡាករថៃ ប៊ុនហាន មកពីក្លិបបូរីនាគរាជ ដែលកំពុងក្ដាប់១០ពិន្ទុក្នុងដៃ ខណៈដែលកីឡាករចំនួន៤រូបទៀតមានតែ៨ពិន្ទុ ៦ពិន្ទុ និង៤ពិន្ទុ ដែលត្រូវគេមើលឃើញ ហាក់មានសង្ឃឹមតិច បើមិនមានសំណាងហុចឲ្យបន្ថែមនៅជុំទី៥ ។
យ៉ាងណាមិញ អ្នកមានពិន្ទុលំដាប់ទី២នៅមិនទាន់ដឹងថា អាចឆ្លងផុតការប្រកួតជុំ ឬយ៉ាងណានៅឡើយទេ បើគេបណ្ដោយចាញ់ក្នុងជុំចុងក្រោយក្នុងពេលដែលអ្នកមាន៨ពិន្ទុពីររូបបែរជាមានម្នាក់ឈ្នះលើគូប្រកួតហើយមានពិន្ទុប្រទាញប្រទង់គ្នា គឺ១១ពិន្ទុនោះ ។ រំលឹកដល់ការប្រកួតកាលពីថ្ងៃសុក្រទី១៤ មិថុនា នោះវិញ គេឃើញកីឡាករថៃ ប៊ុនហាន ឈ្នះកីឡាករសុខ វិរៈ ដែលចាញ់ទាំង៣ប្រកួតកាលមុនទាំងវេទនាបំផុត ។ កីឡាករសុខ វិរៈ មកពីក្លិបសំរោងកោង ខេត្តបាត់ដំបង ត្រូវគេមើលឃើញថា បានធ្វើឲ្យជើងចាស់ថៃ ប៊ុនហាន ឈ្នះទាំងប្រឹង ដែលលទ្ធផលបែបនេះ គឺផ្ទុយស្រឡះបើធៀបនឹងពេលដែលគេប្រកួតចាញ់ កីឡាករយ៉ាម ពិសិដ្ឋ មកពីក្លិបរស្មីកុមារកំព្រា ចាញ់កីឡាករហ៊ុន គីរី មកពីក្លិបតាព្រហ្មមានជ័យបង្រ្កាបគ្រឿងញៀន និងចាញ់កីឡាករ ស៊ូ វណ្ណៈ មកពីក្លិបយុវកីឡាខេត្តកណ្ដាលនោះ ។
ចំពោះកីឡាករមាឌល្អិត នូវ ស៊ីថា វិញ គឺពិតជាមិនខុសពីម្ទេសខ្មាំងឡើយ បន្ទាប់ពីគេអាចផ្ដួលគូប្រកួតមាឌធំឲ្យចាញ់ដោយផុយស្រួយបំផុត ខណៈដែលជ័យជម្នះលើកចុងក្រោយរបស់គេក្នុងជុំទី៤ គឺគេបានឈ្នះកីឡាករស៊ូ វណ្ណៈ ដោយផ្ដួលកីឡាកររូបនោះឲ្យសន្លប់នៅក្នុងទឹកទី២ ។ លទ្ធផលឈ្នះពិន្ទុរបស់ថៃ ប៊ុនហាន និងលទ្ធផលផ្ដួលស៊ូ វណ្ណៈ ឲ្យសន្លប់ក្នុងទឹកទី២បានក្លាយជាឱកាសជួយឲ្យ នូវ ស៊ីថា ក្លាយជាអ្នកឡើងទៅប្រកួតខ្វែងដោយស្វ័យប្រវត្តិ ខណៈដែលកីឡាករថៃ ប៊ុនហាន កំពុងស្ថិតនៅលើផ្លូវសង្ឃឹមជាបណ្ដោះអាសន្ននៅឡើយ ។
ចំពោះគូដណ្ដើមខ្សែក្រវាត់ពូលនេះមួយគូទៀតកីឡាករ យ៉ាម ពិសិដ្ឋ ឈ្នះកីឡាករហ៊ុន គីរី ដោយពិន្ទុ ទទួលបាន៨ពិន្ទុស្មើកីឡាករស៊ូ វណ្ណៈ ដែលក្នុង៣ជុំដំបូងគេមាន៧ពិន្ទុរួចហើយ ។ រវាងកីឡាករទាំងពីរ នឹងមានម្នាក់ក្លាយជាឧបសគ្គរបស់ថៃ ប៊ុនហាន បើថៃ ប៊ុនហាន ភ្លាត់ឲ្យចាញ់នៅជុំទី៥ ហើយមានម្នាក់ក្នុងចំណោមពួកគេអាចផ្ដួលគូប្រកួតឲ្យសន្លប់ ឬចាញ់ពិន្ទុ ៕
ចែករំលែកព័តមាននេះ