រាជធានីភ្នំពេញ ៖ សាលាដំបូងរាជធានីភ្នំពេញ កាលពីវេលាម៉ោង២រសៀល ថ្ងៃទី១២ មិថុនា បានប្រកាសសាលក្រមផ្តន្ទាទោសលើសំណុំរឿងនិស្សិតស្រីវ័យក្មេង ដែលបើករថយន្តបុករះស្លាប់ក្មេង៣នាក់ និង៦នាក់រងរបួសធ្ងន់ នៅមុខក្រសួងមហាផ្ទៃ ក្នុងខណ្ឌចំការមន ។ ការប្រកាសសាលក្រមបានធ្វើឡើងដោយលោក កោ វណ្ឌី ចៅក្រមជំនុំជម្រះ ដោយតម្រូវផ្តន្ទាទោសលើនិស្សិតស្រីវ័យក្មេងនាង គាម ពិសិដ្ឋណារីតា អាយុ២៣ឆ្នាំ កំណត់៣ឆ្នាំ តែទោសនេះឱ្យអនុវត្តក្នុងពន្ធនាការ៣ខែ ១៥ថ្ងៃ និងនៅសល់ប៉ុន្មានព្យួរទាំងអស់ ហើយពិន័យជាប្រាក់ចូលថវិការដ្ឋចំនួន៦លានរៀល ។
សាលក្រមនេះក៏បានបញ្ជាក់ផងដែរថា នាងគាម ពិសិដ្ឋណារីតា ហាមមិនឱ្យកាន់ចង្កូតរថយន្តគ្រប់ប្រភេទ ដោយសារនាងមានជំងឺ២ប្រភេទ គឺជំងឺស្កន្ទ និងជំងឺភ្លឹក ។ ម៉្យាងវិញទៀត ក្រុមគ្រួសារនាង គាម ពិសិដ្ឋណារីតា បានសងជំងឺចិត្តដល់ជនរងគ្រោះគ្រប់គ្រាន់ ហើយជនរងគ្រោះក៏បានដកពាក្យបណ្តឹងវិញដែរ ។ មិនតែប៉ុណ្ណោះ ជនរងគ្រោះក៏បានទទូចសុំឱ្យតុលាការដោះលែងនាងដើម្បីបានទៅបន្តការសិក្សាវិញ ព្រមទាំងឱ្យមានការបន្ធូរបន្ថយទោសដល់នាងណារីតាទៀតផង ។ បន្ទាប់ពីសាលក្រមនេះបានប្រកាសចប់សព្វគ្រប់ នាងគាម ពិសិដ្ឋណារីតា តម្រូវឱ្យផ្តិតមេដៃ រួចអនុញ្ញាតឱ្យអនុរក្សនាំទៅកាន់ពន្ធនាគារវិញ ។
គួររំលឹកថា អង្គសវនាការលើសំណុំរឿងនេះ ត្រូវបានធ្វើឡើងកាលពីរសៀលថ្ងៃទី៦ មិថុនា ដោយមានលោក កោ វណ្ឌី ចៅក្រមជំនុំជម្រះ និងលោកស្រី ស៊ឺ វណ្ណី ព្រះរាជអាជ្ញារងអមសាលាដំបូងជាតំណាងអយ្យការ នៅចំពោះមុខមេធាវីការពារក្តីឱ្យជនត្រូវចោទ២រូប និងមានវត្តមានជនត្រូវចោទ គឺនាង គាម ពិសិដ្ឋណារីតា អាយុ២៣ឆ្នាំ និស្សិតឆ្នាំទី៦ នៃសាកលវិទ្យាល័យវិទ្យាសាស្ត្រ សុខាភិបាល មានទីលំនៅក្រុងតាខ្មៅ ខេត្តកណ្តាល ឈរនៅក្នុងរង្វង់ក្រចកសេះ ។ អង្គសវនាការបានធ្វើឡើងអស់រយៈពេលជាង២ម៉ោង ក្នុងការសាកសួរដេញដោលលើជនត្រូវចោទ ប៉ុន្តែអ្វីដែលគួរឱ្យកត់សម្គាល់នោះ ត្រង់ជនត្រូវចោទបានសារភាពនូវទោសកំហុសដែលខ្លួនបានប្រព្រឹត្តដោយអចេតនា ។
ចៅក្រមជំនុំជម្រះបានប្រកាសលើកពេលប្រកាសសាលក្រមទៅថ្ងៃទី១២ មិថុនា ឆ្នាំ២០១៣ ទើបជនត្រូវចោទត្រូវបានអនុរក្សដឹកទៅកាន់ពន្ធនាគារប៉េហ្សុីវិញ ដោយមានការបិទបាំងចំពោះម៉ាស៊ីនថតអ្នកកាសែតផង ។ ជនត្រូវចោទឈ្មោះ គាម ពិសិដ្ឋណារីតា ត្រូវបានតំណាងអយ្យការសាលាដំបូងរាជធានីភ្នំពេញ ចោទប្រកាន់ពីបទបើកបរបង្កឱ្យមានគ្រោះថ្នាក់ស្លាប់ និងរងរបួសដល់អ្នកដទៃ ដោយអចេតនា ប្រព្រឹត្តនៅលើដងមហាវិថីព្រះនរោត្តម មុខក្រសួងមហាផ្ទៃ ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីល្ងាចថ្ងៃទី១ មីនា ឆ្នាំ២០១៣ ។
ជនត្រូវចោទឈ្មោះ គាម ពិសិដ្ឋណារីតា អាយុ២៣ឆ្នាំ ជាកូនស្រីរបស់លោក គាម ពិសិដ្ឋ អនុប្រធានមន្ទីរសុខាភិបាលខេត្តកណ្តាល ។ នៅថ្ងៃកើតហេតុខាងលើ នាងបានបើកបររថយន្តម៉ាកកាមរីបាឡែនពណ៌ស្ករមួយគ្រឿង ដឹកប្អូនប្រុស២នាក់ចេញពីសាលាក្នុងគោលបំណងទៅផ្ទះនៅក្រុងតាខ្មៅ លុះដល់ភ្លើងស្តុបក្បែរក្រសួងមហាផ្ទៃ បានរេចង្កូតទៅប៉ះម៉ូតូអ្នកដំណើរចំនួន២គ្រឿងបណ្តាលឱ្យដួល និងម្ចាស់រងរបួស ។ ពេលបើកប៉ះម៉ូូតូអ្នកដំណើរចំនួន២គ្រឿងនោះ នាងមិនបានឈប់មើលគេទេ និងក្នុងអាការៈភ័យស្លន់ស្លោបើកបន្ថែមល្បឿនទៅមុខទៀត រហូតដល់មុខខ្លោងទ្វារក្រសួងមហាផ្ទៃ ក៏ទៅបុកក្មេង៣នាក់ស្លាប់ភ្លាមនៅកន្លែងកើតហេតុ គួរឱ្យអាណោចអាធ័មបំផុត និង៦នាក់ទៀតរងរបួសជាទម្ងន់ ហើយរថយន្តបានជ្រុលចង្កូតទៅបុករបងក្រសួងមហាផ្ទៃជាប់ទើបទៅមុខលែងរួច ។
ពេលនោះនាង និងប្អូនមិនបានចុះពីក្នុងរថយន្តឡើយ ខណៈអ្នកដំណើរបានទៅចោមរោមជុំជិតដោយកំហឹង ។ ដោយខ្លាចកើតមានអំពើហិង្សា បន្តិចក្រោយមកសមត្ថកិច្ចក៏នាំនាងចូលទៅក្នុងក្រសួង ដើម្បីការពារសន្តិសុខដល់នាង ។ ក្នុងហេតុការណ៍នេះ នាងពិសិដ្ឋណារីតា មានសភាពស្លេកស្លាំងដោយរន្ធត់ និងបន្ទាប់មកត្រូវបានសមត្ថកិច្ចនាំខ្លួនទាំងមនុស្សទាំងរថយន្តទៅកាន់ការិយាល័យចរាចរណ៍ជើងគោករាជធានីភ្នំពេញ ដើម្បីចាត់ការតាមច្បាប់ ។ នាងគាម ពិសិដ្ឋណារីតា ត្រូវបានតុលាការសម្រេចឃុំខ្លួនដាក់ពន្ធនាគារប៉េហ្សីជាបណ្តោះអាសន្នចាប់តាំងពីពេលនោះមក ដោយរង់ចាំសវនាការផ្តន្ទាទោសតាមច្បាប់កំណត់ ៕
ចែករំលែកព័តមាននេះ