ប្រធានាធិបតីចិន លោកស៊ីជីនពីញ បានទៅដល់កាលីហ្វ័រនីញ៉ាកាលពីថ្ងៃទី៧ មិថុនា ដើម្បីជួបគ្នាកំពូលជាមួយប្រធានាធិបតីអាមេរិក លោកបារ៉ាក់អូបាម៉ា ដែលការជួបគ្នានោះអាចជួយដល់ការពង្រឹងទំនាក់ទំនងចិន-អាមេរិក ។ប្រមុខរដ្ឋទាំង២ត្រូវជួបគ្នានារសៀលថ្ងៃទី៧ មិថុនា នៅ SUNNYLAND ស្ថិតនៅចម្ងាយ១៦០គីឡូម៉ែត្រ ខាងកើតក្រុងឡូសអេនចឺឡេស។ ក្នុងការជួបគ្នាកំពូលចិន-អាមេរិកនោះជាលើកដំបូងចាប់តាំងពីលោកស៊ីចូលកាន់តំណែងកាលពីខែមីនាមក លោកស៊ី និងលោកអូបាម៉ា ត្រូវផ្លាស់ប្តូរទស្សនៈគ្នាលើនយោបាយជាតិ និងអន្តរជាតិ ព្រមទាំងលើបណ្តាសំណុំរឿងតំបន់ និងអន្តរជាតិ ដែលមានផលប្រយោជន៍រួម។ នេះបើយោងតាមបណ្តាអ្នកទទួលខុសត្រូវចិន ។
ពេលជួបជាមួយទីប្រឹក្សាសន្តិសុខជាតិអាមេរិក លោក THOMAS DONILON នៅក្រុងប៉េកាំង កាលពីថ្ងៃទី២៧ ឧសភាកន្លងមកនេះ លោកស៊ីថ្លែងថា ទំនាក់ទំនងចិន-អាមេរិក ស្ថិតក្នុងដំណាក់កាលសំខាន់មួយដែលភ្ជាប់រវាងអតីតកាល និងអនាគតកាល ។ លោកស៊ីអំពាវនាវដល់ភាគីទាំង២ឱ្យគិតទៅដល់ផលប្រយោជន៍ជាមូលដ្ឋានទាំងឡាយរបស់ប្រទេសទាំង២ និងរបស់ពិភពលោកទាំងមូល ហើយបន្តដើររួមគ្នាលើផ្លូវមួយពុំធ្លាប់មានពីមុន ដែលនឹងជាបំណងប្រាថ្នារបស់មនុស្សជំនាន់ក្រោយៗទៀត ។
អំពីកិច្ចប្រជុំកំពូលចិន-អាមេរិក លោកស៊ីគូសបញ្ជាក់ថា លោកនឹងពិភាក្សាគ្នាដោយទូលំទូលាយ និងដោយស៊ីជម្រៅជាមួយលោកអូបាម៉ាលើបញ្ហាយុទ្ធសាស្ត្រសំខាន់ទាំងឡាយដែលមានផលប្រយោជន៍រួម ដើម្បីបង្កើនការយោគយល់គ្នា ពង្រឹងទំនុកចិត្តគ្នាទៅវិញទៅមក ឱ្យមានកុងសង់ស៊ុសមួយ ហើយជំរុញកិច្ចសហប្រតិបត្តិការ ៕
ចែករំលែកព័តមាននេះ