រាជធានីភ្នំពេញ ៖ ដើម្បីលើកកម្ពស់នៃការប្រើប្រាស់ភាសាខ្មែរឱ្យកាន់តែទូលំទូលាយពីសំណាក់អតិថិជនលើទូរស័ព្ទដៃស៊េរីទំនើបស៊ីមពីរ Galaxy Grand ក្រុមហ៊ុន Samsung Electronic ក៏បានអភិវឌ្ឍបន្ថែមលើមុខងារប្រើប្រាស់ពីភាសាអង់គ្លេសទៅជាភាសាខ្មែរទាំងស្រុង ។ ពិធីប្រកាស Update ពីភាសាអង់គ្លេសទៅជាភាសាខ្មែរសម្រាប់ Smartphone ស៊ីមពីរ Galaxy Grand នេះត្រូវបានរៀបចំឡើងយ៉ាងមហោឡារិកនៅតំណាងចែកចាយបន្តផលិតផល Samsung សៀង លីន កាលពីព្រឹកថ្ងៃទី៣ មិថុនា ដោយមានវត្តមានចូលរួមពីសំណាក់ភ្ញៀវជាតិ អន្តរជាតិ និងតំណាងសារព័ត៌មានយ៉ាងច្រើនកុះករ ។
ការបន្ថែមមុខងារជាភាសាខ្មែរទាំងស្រុង ជំនួសភាសាអង់គ្លេសនេះដែរ នាយកគ្រប់គ្រងផ្នែកទូរស័ព្ទ និងបច្ចេកវិទ្យានៃក្រុមហ៊ុនSamsung Electronic សាខាថៃប្រចាំកម្ពុជា លោក វ៉ាត ឡាំផេង បានឱ្យដឹងថា ដើម្បីលើកកម្ពស់ភាសាខ្មែរ ក៏ដូចជាបង្កលក្ខណៈងាយស្រួលក្នុងការប្រើប្រាស់ឧបករណ៍ទំនើបជាភាសាជាតិ ។ បន្ថែមពីលើនេះលោកបានបន្តថា Samsung បានចាប់ដៃសហការជាមួយ Developer ខ្មែរមួយក្រុមមានឈ្មោះថា «KhmerUI Developer» ក្នុងការអភិវឌ្ឍន៍ និងលើកកម្ពស់ភាសាជាតិ ។
រួមចំណែកក្នុងការចូលរួមអភិវឌ្ឍន៍ និងរចនាពុម្ពអក្សរខ្មែរទាំងស្រុង ដំណើរការលើទូរស័ព្ទស៊ីមពីរ Galaxy Grand លោក ដាញ់ ហុង បានលើកឡើងថា លោកស្រលាញ់ទាំងបច្ចេកវិទ្យា និងអក្សរសាស្ត្រខ្មែរ ។ Developer រូបនេះបានឱ្យដឹងថា រូបលោក និងក្រុមការងាររចនាពុម្ពអក្សរខ្មែរ «Khmer UI Developer» ទាំងអស់សង្ឃឹមយ៉ាងមុតមាំថា បងប្អូនប្រជាពលរដ្ឋមិត្តយុវវ័យទាំងអស់នឹងគាំទ្រការខិតខំប្រឹងប្រែងរបស់លោក ក៏ដូចជាចូលរួមអភិរក្ស និងជំរុញឱ្យភាសាជាតិ អក្សរសាស្ត្រជាតិប្រើប្រាស់ឱ្យបានទូលំទូលាយលើបណ្ដាឧបករណ៍អេឡិចត្រូនិកឆ្លាតវៃទំនើបៗ (Smart Device) ជំនួសឱ្យភាសាបរទេសដែលកំពុងចរាចរយ៉ាងទូលំទូលាយលើទីផ្សារសព្វថ្ងៃ ។
លោកក៏បានបង្ហាញពីរបៀបផ្លាស់ប្ដូរភាសា ពីបរទេសទៅជាភាសាខ្មែរលើ Galaxy Grand ជំហានទី១របៀប Download ភាសា ដោយលោកអ្នកគ្រាន់តែចូលទៅកាន់ Setting==> About Device==> Software Update==> Download==>Install បន្ទាប់ពីទូរស័ព្ទReboot ។ ជំហានទី២របៀបផ្លាស់ប្តូរភាសា អតិថិជនទាំងអស់គ្រាន់តែចូលទៅ Setting==> Languages and Input ជ្រើសរើសយកខ្មែរ (កម្ពុជា) នោះលោកអ្នកអាចរីករាយជាមួយភាសាខ្មែរក្នុង Galaxy Grand បានហើយ ។
ជួបជាមួយអតិថិជនចូលរួមធ្វើតេស្ដសាកល្បងទូរស័ព្ទ Galaxy Grand នាថ្ងៃបើកសម្ពោធទំព័រថ្មីនៃការ Update ពីភាសាបរទេស ទៅជាភាសាខ្មែរទាំងស្រុងមួយចំនួនបានបញ្ចេញទស្សនៈដូចៗគ្នាថា ពួកគេសូមកោតសរសើរដល់ក្រុមហ៊ុន Samsung ក្រៅពីផលិត និងនាំចូលផលិតផលដែលមានគុណភាពប្រកបដោយបច្ចេកវិទ្យាខ្ពស់ហើយនោះ នៅមានគំនិតលើកកម្ពស់ភាសាខ្មែរទៀត ។ និយាយដូច្នេះ យុវជនតារាក្នុងចំណោមមិត្តភក្ដិដែលចូលរួមកម្មវិធីអះអាងថា ៖ «ខ្ញុំសង្កេតមើលSmartphone ស្ទើរតែទាំងស្រុងមានខ្លះប្រើអក្សរខ្មែរបាន ខ្លះគ្រាន់តែមើលបាន ហើយខ្លះទៀតមើលអត់ឃើញ ប៉ុន្តែសម្រាប់ Galaxy Grand វិញដំណើរការជាភាសាខ្មែរទាំងស្រុងតែម្ដង ។ អុីចឹងមិនយូរទេ យុវវ័យជាអ្នកប្រើប្រាស់ប្រាកដជាគាំទ្រ និងឱ្យតម្លៃភាសាអក្សរជាតិខ្ពស់ជាងភាសាបរទេសជាមិនខាន» ។
លោក វ៉ាត ឡាំផេង ក៏បានបង្ហាញពីគោលជំហររបស់ក្រុមហ៊ុនបច្ចេកវិទ្យាកំពូលទាំងលើពិភពលោក និងនៅកម្ពុជាថា Samsung នឹងបន្តឆន្ទៈបង្កើតថ្មី ឧបករណ៍ទំនើបៗ ប្រកបដោយគុណភាពខ្ពស់ដល់អតិថិជន ក៏ដូចជាចូលរួមចែករំលែកផ្សព្វផ្សាយ អភិរក្ស និងលើកកម្ពស់ភាសាខ្មែរលើឆាកអន្តរជាតិ លើផលិតផលបន្តបន្ទាប់ ។កុំភ្លេច! ទទួលយកបទពិសោធន៍ដ៏សម្បូរបែបនៃការប្រើប្រាស់ក៏ដូចជាចូលរួមគាំទ្រភាសាខ្មែរពីទូរស័ព្ទស៊ីមពីរ Galaxy Grand ទាំងអស់គ្នា ៕
ចែករំលែកព័តមាននេះ