ខេត្តស្វាយរៀង ៖ ស្ត្រីម្នាក់បានត្រូវប្តីកំណាចចាក់ចំនួន៣កាំបិត និងអារ.កសម្លាប់យ៉ាងព្រៃផ្សៃ ហើយចាប់សម្រាតឱ្យអាក្រាត និងស្រាតខោអាវខ្លួនឯងឱ្យនៅអាក្រាតដែរ រួចយកច្រវាក់ចាក់សោដៃជាប់ទៅនឹងជើងគ្រែ ក្បែរសពប្រពន្ធដែលមើលទៅគួរឱ្យសង្វេគ ។ ការរៀបចំខាងលើនេះ ក្នុងចេតនាគេចពីទោសកំហុស ហើយបានឆ្លើយថា ចោរប្លន់រំលោភរួចសម្លាប់ប្រពន្ធរបស់ខ្លួន ។
ទាក់ទិននឹងហេតុការណ៍គួរឱ្យភ្ញាក់ផ្អើលនេះ ត្រូវបានមន្ត្រីសមត្ថកិច្ចឱ្យដឹងថា បានកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី២៩ ឧសភា នៅភូមិស្រម៉ ឃុំខ្សែត្រ ស្រុកកំពង់រោទ៍ ។ ស្ត្រីរងគ្រោះជាប្រពន្ធឈ្មោះ ណោ ស្រីមុំ អាយុ២៤ឆ្នាំ រីឯប្តីកំណាចរូបនេះឈ្មោះ ឆោម សុខា អាយុ២៦ឆ្នាំ មានមុខរបរជួសជុលម៉ូតូនៅក្នុងភូមិ ។ មន្ត្រីសមត្ថកិច្ចបានកត់សម្គាល់ថា ប្តីប្រពន្ធ១គូនេះស្រឡាញ់គ្នាណាស់ មិនដែលមានរឿងរឱស្ឋាននឹងគ្នានោះទេ ហើយពួកគេមានកូនប្រុសម្នាក់ឈ្មោះឆោម ម៉េត ហៅជែម អាយុ៣ឆ្នាំ ។
បើតាមលោកយាយ ពិន សារឿន អាយុ៦៥ឆ្នាំ ជាជីដូនខាងស្ត្រីរងគ្រោះ មានប្រសាសន៍ថា នៅវេលាម៉ោង៦ល្ងាចថ្ងៃទី២៨ ឧសភា ចៅប្រុសនេះបានយកត្រីកន្លះគីឡូក្រាមឱ្យគាត់ ហើយនៅវេលាម៉ោង៧យប់បានដើរទៅលេងផ្ទះឪពុកក្មេកឈ្មោះ នង ញូង រហូតដល់ម៉ោង៨យប់ទើបត្រឡប់ទៅផ្ទះវិញ ហើយនិយាយប្រាប់ឪពុកក្មេកថា ខ្លួនបាត់មេ៉មូរីចម្រៀង លុះក្រោយមកក៏ស្រាប់តែកើតហេតុអកុសលនេះឡើង ។ ប្រជាពលរដ្ឋជិតខាងនិយាយថា ពួកគាត់ក៏មិននឹកស្មានដល់ថា ប្តីប្រពន្ធដែលស្រឡាញ់គ្នាចាក់ទឹកមិនលេចនេះ ដាច់ចិត្តលើកដៃចាក់ប្រពន្ធ រួចអារ.កសម្លាប់ដូច្នេះសោះ ព្រោះបុរសជាប្តីស្លូតមិនដែលឈ្លោះគ្នាប្តីប្រពន្ធ ឬក៏បង្កហេតុប៉ះពាល់ដល់អ្នកជិតខាងឡើយ ។
ប្រភពព័ត៌មានពីអ្នកភូមិនិយាយថា កាលពីថ្ងៃទី២៧ ឧសភា ឪពុកបង្កើតរបស់បុរសជាប្តីបានបូមស្រះចាប់ត្រី និងចាប់បានកន្ធាយ១ក្បាលយកទៅធ្វើម្ហូបក្លែមផឹកស៊ីផង លុះស្អែកឡើងថ្ងៃទី២៨ ឧសភា ក៏ឮថាប្តីបាត់មេ៉មូរីបទចម្រៀង និងមានការទាស់សម្តីគ្នាបន្តិចបន្តួចជាមួយប្រពន្ធ ។ នៅល្ងាចនោះដែរប្តីក៏យកត្រីទៅឱ្យជីដូនខាងប្រពន្ធ រួចដើរទៅលេងផ្ទះឪពុកក្មេក ហើយរហូតដល់ម៉ោងប្រមាណជា៩យប់ ក៏ស្ងាត់ពុំមានឮសូរឈ្លោះប្រកែកគ្នាអ្វីទេ ស្រាប់តែនៅវេលាម៉ោង៦ព្រឹកថ្ងៃទី២៩ ឧសភា ក៏បានសំឡេងប្តីស្ត្រីរងគ្រោះស្រែកហៅឱ្យជួយ ។ ពេលអ្នកភូមិទៅដល់ឃើញស្ត្រីជាប្រពន្ធស្លាប់ទាំងអាក្រាតកាយនៅលើគ្រែ រីឯបុរសជាប្តីជាប់ច្រវាក់ដៃចាក់ជាប់នឹងជើងគ្រែ ចំណែកកូនប្រុសអាយុ៣ឆ្នាំប្រឡាក់សុទ្ធតែឈាម ។ អ្នកភូមិនិយាយថា ពេលសាកសួរទាំងស្លុតចិត្ត ខណៈឃើញហេតុការណ៍បែបនេះ ត្រូវបានបុរសជាប្តីប្រាប់ថា ចោរប្លន់ពីយប់បានរំលោភប្រពន្ធរួចអារ.កសម្លាប់ចោលទៀត ទើបមានការប្តឹងសមត្ថកិច្ចភ្លាមៗ ។
ពេលសមត្ថកិច្ចទៅដល់ពិនិត្យសពស្ត្រីរងគ្រោះឃើញមានស្នាមរបួសបំពង់ក២កាំបិត អារផ្តាច់បំពង់ក ចាក់ក្រោមក្លៀក១កាំបិត និងស្នាមរបួសចាប់កាំបិតរយះប្រអប់ដៃ ស្លាប់ទាំងអាក្រាតកាយ ។ មន្ត្រីសមត្ថកិច្ចផ្នែកបច្ចេកទេសបានសន្និដ្ឋានជំហានដំបូងថា ពុំមែនជាអំពើប្លន់រំលោភសម្លាប់ទេ គឺបុរសជាប្តីជាអ្នកធ្វើឃាតប្រពន្ធខ្លួនឯង ។ បើតាមការពិនិត្យភស្តុតាង គឺបុរសជាប្តីចាក់សោច្រវាក់ដៃភ្ជាប់ទៅនឹងជើងគ្រែខ្លួនឯង ឯរាងកាយគ្មានរបួសស្នាមបន្តិចសោះ តែអ្វីដែលគួរឱ្យហួសចិត្តគឺទាំង២នាក់ប្តីប្រពន្ធសុទ្ធតែស្រាតអាក្រាតកាយដែលនេះគ្រាន់តែជាល្បិចរបស់បុរសជាប្តីប្រឌិតឡើង ដើម្បីបិទបាំងអំពើរបស់ខ្លួន ។
អ្វីដែលគួរឱ្យកត់សម្គាល់គឺ ពេលចាប់ខ្លួនទៅសាកសួរ ស្រាប់តែបុរសជាប្តីនេះធ្វើជាឆ្កួតសរសៃប្រសាទ និយាយលែងដឹងខុសត្រូវ និងយំសោកស្រណោះជីវិតប្រពន្ធគួរឱ្យសង្វេគ ។ ទោះបីជាយ៉ាងណា សមត្ថកិច្ចបានកសាងសំណុំរឿងបញ្ជូនបុរសជាប្តីទៅសាលាដំបូងខេត្ត ដើម្បីចាត់ការបន្ត រីឯសពស្ត្រីរងគ្រោះប្រគល់ឱ្យក្រុមគ្រួសាររៀបចំធ្វើបុណ្យតាមប្រពៃណី ៕
ចែករំលែកព័តមាននេះ