រាជធានីភ្នំពេញ ៖ សម្តេចនាយករដ្ឋមន្រ្តី ហ៊ុន សែន បានអំពាវនាវឲ្យតំណាងរាស្រ្តគណបក្សប្រជាជនកម្ពុជា និងហ៊្វុនស៊ិនប៉ិច បង្កើតច្បាប់ដាក់ទោសទណ្ឌចំពោះអ្នកដែលនិយាយថា កម្ពុជាគ្មានរបបប្រល័យពូជសាសន៍ និងកន្លែងធ្វើទារុណកម្ម ដូចជាគុកទួលស្លែង និងជើងឯក ។
ការអំពាវនាវរបស់សម្តេចតេជោយ៉ាងដូច្នេះ បានធ្វើឡើងបន្ទាប់ពីប្រធានស្តីទីគណបក្សសង្គ្រោះជាតិ លោក កឹម សុខា ធ្លាប់បាននិយាយថា គុកទួលស្លែងជាកន្លែងសិប្បនិម្មិត ដែលធ្វើឲ្យ លោក ជុំ មី និង លោក ប៊ូ ម៉េង អតីតជនរងគ្រោះរួចពីស្លាប់នៅគុកទួលស្លែង ប្រតិកម្ម និងស្នើឲ្យ លោក កឹម សុខា សូមទោសដល់ព្រលឹងជនរងគ្រោះទំាងអស់ដែលស្លាប់ និងអ្នកឆ្លងកាត់ការធ្វើទារុណកម្មនៅគុកទួលស្លែង ។
ថ្លែងជាសាធារណៈនៅព្រឹកថ្ងៃទី២៧ ឧសភា ២០១៣ ក្នុងពិធីសម្ពោធមហាកុដិ នៅវត្តលង្ការ រាជធានីភ្នំពេញ សម្តេចប្រមុខរាជរដ្ឋាភិបាលកម្ពុជា បានបញ្ជាក់ទៀតថា នៅអឺរ៉ុប អ្នកដែលនិយាយថា របបហ៊ីត្លែរ មិនសម្លាប់មនុស្សត្រូវតែមានទោស ។ សម្តេចបន្តថា គេថាគុកទួលស្លែងជាកន្លែងសិប្បនិម្មិត ការនិយាយបែបនេះ វាមិនត្រឹមតែធ្វើឲ្យប៉ះពាល់ដល់ លោកជុំ មី និង លោក ប៊ូ ម៉េង នោះទេ ប៉ុន្តែធ្វើឲ្យប៉ះពាល់ព្រលឹងប្រជាពលរដ្ឋជាង ១ម៉ឺននាក់ ដែលស្លាប់ដោយការធ្វើទារុណកម្មនៅក្នុងគុកទួលស្លែង និងប៉ះពាល់ដល់ប្រជាពលរដ្ឋទូទំាងប្រទេស ជាពិសេសអ្នកដែលឆ្លងកាត់របបប្រល័យពូជសាសន៍ ៕
ចែករំលែកព័តមាននេះ