រាជធានីភ្នំពេញ ៖ បុរសពិការជើងទាំងពីរម្នាក់បើកបរម៉ូតូវ៉េវ ពណ៌ស កែច្នៃធ្វើជាម៉ូតូកង់បី ត្រូវរថយន្តទ្រុងដឹកទំនិញមិនចាំម៉ាក បានបើកទៅបុកបាក់កង់ម៉ូតូមួយចំហៀង ធ្វើឱ្យជនរងគ្រោះខ្ទាតចេញពីម៉ូតូរងរបួសធ្ងន់ ចំណែករថយន្តបង្កបើករត់គេចបាត់ស្រមោល ។ គ្រោះថ្នាក់នេះ បានកើតឡើងកាលពីវេលាម៉ោង ៧ និង ៣០នាទីយប់ ថ្ងៃទី២៦ ឧសភា ២០១៣ តាមបណ្តោយផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ។
ប្រភព័ត៌មានពីសមត្ថកិច្ចបានឱ្យដឹងថា រថយន្តបង្កដឹកទំនិញបើកពីលិចទៅកើត ទៅបុកម៉ូតូកង់បីកែច្នៃ ដែលបើកបរដោយបុរសពិការជើងទាំងពីរ ខណៈដែលបើកពីកើតទៅលិចក្នុងទិសដៅបញ្ច្រាសទិសគ្នា ដោយកិនកង់មួយចំហៀងបាក់ខ្ទេច និងបណ្តាលឱ្យជនរងគ្រោះខ្ទាតចេញពីម៉ូតូរងរបួសធ្ងន់ ចំណែករថយន្តបង្កបើករត់គេចបាត់ ។
ជនរងគ្រោះឈ្មោះ យឹម សុខុម ភេទប្រុស អាយុ ៣០ឆ្នាំ ពិការជើងទាំងពីរ ត្រូវក្រុមគ្រួសារឱ្យដឹងថា គាត់ទើបនឹងត្រលប់មកពីផ្សារទំនើបទៅទិញឥវ៉ាន់ ខណៈពេលជិះម៉ូតូមកដល់ចំណុចខាងលើក៏ត្រូវរថយន្តដឹកទំនិញបើកបុកតែម្តង ។ ជនរងគ្រោះត្រូវបានសាច់ញាតិបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត ចំណែកម៉ូតូកែច្នៃត្រូវក្រុមគ្រួសារសុំយកទៅរក្សាទុកវិញ ដោយសាររថយន្តបង្ករត់បាត់ទៅហើយ ៕
ចែករំលែកព័តមាននេះ