រាជធានីភ្នំពេញ ៖ រូបថតជាច្រើនសន្លឹកដែលជាស្នាដៃរបស់ជនជាតិអូស្រ្ដាលី បង្ហាញពីសម័យកាលអ៊ុនតាក់បំពេញបេសកកម្មនៅកម្ពុជាអំឡុងឆ្នាំ១៩៩២ ដល់ឆ្នាំ១៩៩៣ បានដាក់តាំងបង្ហាញជាសាធារណៈនៅមជ្ឈមណ្ឌលវប្បធម៌អាល្លឺម៉ង់ កាលពីល្ងាចថ្ងៃទី២៣ ឧសភា ឆ្នាំ២០១៣ ។
លោក ដេវ ហ្គច លេខាទី១ និងជាអនុប្រធានទូតអូស្រ្ដាលីប្រចាំនៅកម្ពុជា មានប្រសាសន៍ថា ពិព័រណ៍រូបថតនេះបានប្រសិទ្ធនាមថា «អ៊ុនតាក់២០ឆ្នាំបន្ទាប់ និងទស្សនៈរបស់ប្រទេសអូស្រ្ដាលី» ។ ពិព័រណ៍នេះបង្ហាញឱ្យឃើញអំពីលក្ខណៈពិសេសនៃស្នាដៃការងាររបស់អ្នកថតរូបអូស្រ្ដាលី រួមមានលោក Heide Smith Tim Page និងលោក George Gittoes ក្នុងរយៈពេលបេសកកម្មរបស់អ៊ុនតាក់នៅប្រទេសកម្ពុជាក្នុងចន្លោះពីខែមីនា ១៩៩២ រហូតដល់ខែកញ្ញា ឆ្នាំ១៩៩៣ ។ បេសកកម្មរបស់អ៊ុនតាក់ រួមមានការឃ្លាំមើលបទឈប់បាញ់គ្នា និងការបញ្ឈប់ជំនួយកងទ័ពពីក្រៅ រៀបចំការបោះឆ្នោត និងធ្វើការជាមួយគណបក្សនយោបាយផ្សេងៗគ្នា ដើម្បីគ្រប់គ្រងកម្ពុជារហូតដល់ពេលបោះឆ្នោត ។
លោកដេវ ហ្គច បានបន្ថែមថា រូបថតដែលបានដាក់តាំងនៅទីនេះ បង្ហាញឱ្យឃើញពីសកម្មភាពមន្ដ្រីអ៊ុនតាក់បំពេញតួនាទីទាំងនោះ ដោយមានរូបថតរបស់មន្ដ្រីយោធាដើរល្បាត ឃ្លាំមើលបទឈប់បាញ់គ្នា និងការធ្វើឱ្យស្ថានភាពរបស់ប្រជាពលរដ្ឋកម្ពុជាមានភាពប្រាកដប្រជា ។
រូបថតផ្សេងទៀតបង្ហាញពីមន្ដ្រីសិទ្ធិមនុស្សកំពុងបង្កើនការយល់ដឹងពីសិទ្ធិមនុស្ស និងការឃ្លាំមើលការអនុវត្ដគោលការណ៍សិទ្ធិមនុស្សរបស់អាជ្ញាធរ ។ រូបភាពខ្លះទៀតបង្ហាញឱ្យឃើញពីការជួយសម្រួលរបស់អ៊ុនតាក់ដល់ការធ្វើមាតុភូមិនិវត្ដន៍នៃពលរដ្ឋកម្ពុជា រាប់ពាន់នាក់មកពីជំរំនៅតាមព្រំដែន តាមរយៈរថភ្លើង និងនាវា ។ រូបភាពមួយចំនួនទៀតបង្ហាញឱ្យឃើញមន្ដ្រីអ៊ុនតាក់កំពុងតែបណ្ដុះបណ្ដាលដល់ពលរដ្ឋកម្ពុជាលើជំនាញដោះមីន និងនគរបាល ។ រូបភាពខ្លះទៀតបង្ហាញឱ្យឃើញពីពលរដ្ឋកម្ពុជាកំពុងចូលរួមក្នុងដំណើរការបោះឆ្នោតលើកដំបូងក្នុងឆាកជីវិតរបស់ពួកគេ ។
លោក ដេវ ហ្គច បញ្ជាក់ថា ការចូលរួមយ៉ាងសកម្មជាមួយអាជ្ញាធរអ៊ុនតាក់នេះ ធ្វើឱ្យប្រទេសអូស្រ្ដាលីមានតួនាទីនាំមុខគេក្នុងដំណើរការសន្ដិភាពតាំងពីពាក់កណ្ដាលទសវត្សទី៨០មកម៉្លេះ ហើយបានបង្ហាញឱ្យឃើញពីការប្ដេជ្ញាចិត្ដរបស់យើងក្នុងនាមជាអ្នកចូលរួមចំណែកវិជ្ជមានមួយលើសន្ដិភាព និងស្ថិរភាពក្នុងតំបន់របស់យើង ។ ប្រទេសកម្ពុជាផ្លាស់ប្ដូរគួរឱ្យកត់សម្គាល់ក្នុងរយៈពេល២០ឆ្នាំកន្លងមកនេះ ប៉ុន្ដែការប្ដេជ្ញាចិត្ដជានិរន្ដរ៍ និងចំណងមិត្ដភាពរវាងកម្ពុជា និងអូស្រ្ដាលី មិនបានផ្លាស់ប្ដូរឡើយ ។ កងកម្លាំងយោធា និងនគរបាលរបស់យើងបន្ដកិច្ចសហប្រតិបត្ដិការបង្ក្រាបបទឧក្រិដ្ឋ និងភេរវកម្ម និងធ្វើឱ្យមានភាពប្រសើរឡើងផ្នែកសន្ដិសុខ ៕
ចែករំលែកព័តមាននេះ