បន្ទាប់ពីទទួលបានពានរង្វាន់ក្របខណ្ឌអាល្លឺប៊ុនដេស្លីហ្គាកាលពីសប្តាហ៍មុន មិនទាន់ទាំងអស់សប្បាយចិត្តផង ក្លិបបាល់ទាត់លំដាប់ពិភពលោក Bayern បានបើកទំព័រប្រវត្តិសាស្ត្រថ្មីមួយទៀតគឺដណ្តើមបានពានរង្វាន់បាល់ទាត់យូហ្វាឆេមពានលីក មួយបន្ថែមទៀតបន្ទាប់ពីយកឈ្នះប្អូនបង្កើត Dortmund ដោយលទ្ធផល 2-1 កាលពីរាត្រីថ្ងៃសៅរ៍ទី២៥ ឧសភា ឆ្នាំ២០១៣ នៅក្នុងពហុកីឡដ្ឋាន Wembley ទីក្រុងឡុង ។
ជ័យជម្នះ 2-1 នេះបានធ្វើឱ្យក្លិប Bayern ក្លាយទៅជាម្ចាស់ជើងឯកពានរង្វាន់យូហ្វាឆេមពានលីកលើកទី៥ក្នុងប្រវតិ្តសាស្ត្របាល់ទាត់របស់គេ បន្ទាប់ពីខកចិត្តកាលពីឆ្នាំទៅមិញលេងចាញ់ Chelsea 4-3 ដោយការទាត់បាល់ប៉េណាល់ទី ក្នុងវគ្គផ្តាច់ព្រ័ត្រ ។ ក្នុងរយៈពេល៣ឆ្នាំចុងក្រោយនេះក្លិប Bayern ធ្លាប់បរាជ័យ២លើកកន្លងមកហើយក្នុងវគ្គផ្តាច់ព្រ័ត្រ ។
គ្រាប់បាល់ពីគ្រាប់របស់ក្រុម Bayern បានមកពីកីឡាករខ្សែប្រយុទ្ធសញ្ជាតិក្រូអាស៊ីMandzukic នៅនាទី៦០និងកីឡាករខ្សែបម្រើប្រយុទ្ធសញ្ជាតិហូឡង់ Arjen Roben នៅនាទី៨៩ ។ ចំណែកឯក្រុម Dortmund វិញទទួលបានគ្រាប់បាល់សំណាងប៉េណាល់ទី ១ គ្រាប់នៅនាទី៦៨ ស៊ុតបាល់បានបញ្ចូលទី ដោយកីឡាករខ្សែបម្រើ Gundogan បន្ទាប់ពីកីឡាករប្រេស៊ីល Dante ក្លិប Bayern ធ្វើឱ្យមានកំហុសក្នុងតំបន់គ្រោះថ្នាក់ ។ នៅក្នុងដំណើរការប្រកួតក្រុម Dortmund បានវាយសង្គ្រប់ក្រុម Bayern នៅដើមតង់ទី១ ហើយមានឱកាសស៊ុតបាល់បញ្ចូលទីជាច្រើនលើកច្រើនសាតែពុំមានសំណាងធ្វើឱ្យចប់តង់ទី១ ក្រុមទាំងពីររក្សាបានលទ្ធផល 0-0 ។
ចូលមកដល់តង់ទី២ក្រុម Bayern បានប្តូរយុទ្ធសាស្ត្រវាយបកលឿនៗ ហើយជាលទ្ធផលនៅនាទី ៦០កីឡាករ Mandzukic ស៊ុតបាលបញ្ចូលទីសម្រេចបាន១គ្រាប់នាំមុខ ក៏ប៉ុន្តែនៅនាទី៦៨កីឡាករ Dante ធ្វើឱ្យមានកំហុសបាល់ប៉េណាល់ទី ធ្វើឱ្យក្រុម Dortmund តាមបានស្មើ 1-1 ស៊ុតបញ្ចូលទីដោយកីឡាករ Gundogan ។ ទោះជាយ៉ាងណាក្តីនៅនាទី៨៩ កីឡាករ Arjen Roben ស៊ុតបាល់បញ្ចូលទីបន្ថែមបាន១គ្រាប់ទៀតនាំមុខ 2-1 ហើយបានរក្សាលទ្ធផលនេះរហូតដល់ចប់ការប្រកួត៩០នាទី ធ្វើឱ្យក្រុម Bayern យកឈ្នះដោយលទ្ធផល 2-1 ។ កីឡាករក្លិប Bayern សប្បាយនឹងជ័យជម្នះពេញតារាង បន្សល់ទុក្ខឱ្យក្រុម Dortmund ទួញសោកពេញទីលានប្រកួត ៕
ចែករំលែកព័តមាននេះ