រាជធានីភ្នំពេញ ៖ តារាកំប្លែង ដែលរងការចោទប្រកាន់ពីបទឆបោកប្រាក់គេអស់ច្រើនពាន់ដុល្លារ នាង ជួន ចាន់រតនា ហៅក្អយ បានបាត់ស្រមោលសូន្យឈឹងតែម្តងបន្ទាប់ពីម្ចាស់បំណុលជាច្រើនបានចោទពីករណីជំពាក់បំណុលគេរុំកោះរើខ្លួនលែងរួច ។ នាងក្អយ ក៏ត្រូវគេគិតថា ប្រហែលជាក្លាយជារំដួលដូរដីទៅហើយ ព្រោះបំណុលវ័នកដោះមិនចេញ រីឯអាជីពសិល្បៈរបស់នាងក៏អាចថាបិទទំព័រទាំងស្រុងទៀតផង ។
ទើបតែនៅក្នុងពិធីជួបជុំអតីតសិស្សវិទ្យាល័យព្រះស៊ីសុវត្ថិ ដែលប្រមូលផ្តុំដោយភ្ញៀវកិត្តិយសគ្រប់ឋានៈ និងមានសិល្បករល្បីៗ ចូលរួម ស្រាប់តែគេឃើញនាងក្អយបង្ហាញវត្តមាននៅទីនោះយ៉ាងក្រឡឺមទាំងក្តីសប្បាយរីករាយ ជាមួយនិងរូបសម្រស់ស្រស់សោភាដូចជាគ្មានរឿងអ្វីកើតឡើងសោះ ។
នាងក្អយ ដែលគ្រងសម្លៀកបំពាក់រូបខ្មៅមួយឈុត និងក្រមាបង់ក គិតតែសំពះរាក់ទាក់ដាក់អ្នកសិល្ប ជាមួយភាពស្រស់ស្អាត ពិសេសគេឃើញនាងបានកែខ្ទង់ច្រមុះ ដែលជួយឱ្យសម្រស់នាងលេចធ្លោមិនតិចទេ ។ ដើម្បីចង់ដឹងពីបញ្ហាដែលបានកើតឡើងកន្លងមក កោះសន្តិភាពបានសុំការបកស្រាយដោយផ្ទាល់ពីនាង ជួន ចាន់រតនា ហៅក្អយ ហើយត្រូវបានតារាកំប្លែងមានប្រភពចេញពីខេត្តតាកែវ រូបនេះប្រាប់ថា ការពិតនាងមិនដែលចង់ចេញមុខបកស្រាយរឿងរ៉ាវនាពេលនេះទេ ព្រោះតែនាងកំពុងដោះស្រាយបញ្ហារបស់នាងមិនទាន់ចប់ចុងចប់ដើមដាច់ស្រលះនៅឡើយ ។
នាងបន្តថា តាំងពីមានរឿងហ្នឹងមក នាងមិនដែលគិតថារត់ចោលស្រុកឡើយ ពោលគឺនៅតែគិតថានឹងចូលមកដោះស្រាយឱ្យម្ចាស់បំណុលឱ្យទាល់តែអស់ ៕
ចែករំលែកព័តមាននេះ