ខេត្តកំពង់ឆ្នាំង ៖ សាកសពបុរសម្នាក់ដែលត្រូវជនពុំស្គាល់មុខសម្លាប់ ហើយយកទៅប្លុងចោលនោះ ត្រូវបានស្គាល់អត្តសញ្ញាណហើយ បន្ទាប់ពីក្រុមគ្រួសារអះអាងថា ពិតជាសមាជិកគ្រួសារដែលបានបាត់ខ្លួនកាលពីកន្លះខែមុន ។
សូមរំឮកថា កាលពីថ្ងៃទី១៧ ឧសភា ២០១៣ មានការភ្ញាក់ផ្អើលមួយបានកើតឡើងដោយសារតែប្រជាពលរដ្ឋអ្នកបោចវល្លិ៍ បានប្រទះឃើញសាកសពបុរសម្នាក់ហើមរលួយ ដែលគេយកទៅប្លុងចោលនៅចម្ងាយប្រមាណ ៣០ម៉ែត្រ ពីថ្នល់ជាតិលេខ៥ ស្ថិតក្នុងភូមិត្រពាំងអំពិល ឃុំប្រស្និប ស្រុលរលាប្អៀរ ។ ក្រោយប្រទះឃើញសមត្ថកិច្ចបានត្រួតពិនិត្យ និងវាយតម្លៃជំហានដំបូងថា ជាសាកសពត្រូវគេសម្លាប់ ហើយយកមកប្លុងចោល ដោយសពនេះ មិនមែនជាអ្នកជិតៗនេះទេ គឺមកពីឆ្ងាយ ។
កាលពីថ្ងៃទី ២៥ ឧសភា ២០១៣ តាមបុរសឈ្មោះ ហ៊ាន សុផាត អាយុ ៣០ឆ្នាំ និងស្រ្តីឈ្មោះ ហ៊ាន សុភាព អាយុ ៣៣ឆ្នាំ ដែលជាកូនបង្កើត បានឱ្យដឹងថា សពឳពុកខ្លួនមានឈ្មោះ សុក ផន អាយុ ៥៩ឆ្នាំ ជាយោធា និងជាមន្រ្តីហិរញ្ញវត្ថុក្នុងអង្គភាពកងប្រតិបត្តិការសឹករងស្រុកមេមត់ មានប្រពន្ធ និងកូន ៣នាក់ ។
ប្រភពបន្តថា ជារៀងរាល់ខែគាត់តែងតែទៅបើកលុយពីមន្ទីរហិរញ្ញវត្ថុខេត្ត ដែលមានទឹកប្រាក់ប្រមាណជាង ១ម៉ឺនដុល្លារ ដើម្បីយកទៅបើកបន្តឱ្យមន្រ្តីយោធានៅកងប្រតិបត្តិការសឹករងស្រុកមេមត់ ។ នៅវេលាម៉ោង ៩ ព្រឹកថ្ងៃទី១០ ឧសភា គាត់បានចេញពីផ្ទះនៅភូមិបឹងបាសាក់ ទៅខេត្តកំពង់ចាម ដើម្បីបើកប្រាក់ ហើយក៏បាត់ខ្លួនរហូត ដល់ពេលក្រុមគ្រួសារបានអានកាសែតកោះសន្តិភាព ហើយមានការសង្ស័យក៏បានមកពិនិត្យសព ទើបស្គាល់ច្បាស់ថាជាឳពុករបស់ខ្លួនមែន ។
សពជនរងគ្រោះខាងលើ ត្រូវបានក្រុមគ្រួសារបូជានៅនឹងកន្លែង ដើម្បីយកធាតុទៅធ្វើបុណ្យតាមប្រពៃណីនៅលំនៅឋានឯខេត្តកំពង់ចាម ៕
ចែករំលែកព័តមាននេះ