រាជធានីភ្នំពេញ ៖ ស្ត្រីមានផ្ទៃពោះម្នាក់បានឈឺពោះឆ្លងទន្លេនៅមុខសំយ៉ាបផ្ទះគេបង្កឱ្យមានការភ្ញាក់ផ្អើលដល់ប្រជាពលរដ្ឋដែលនៅជិតនោះជួយអន្តរាគមន៍ហៅរថយន្តសង្គ្រោះដឹកទៅកាន់មន្ទីរពេទ្យភ្លាមៗ កាលពីវេលាម៉ោង៦ និង៣០នាទីព្រឹក ថ្ងៃទី២៦ ឧសភា ២០១៣ នេះ នៅប្លុកក្រសាំងផ្អែម ភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរូបនោះឈ្មោះថន តី អាយុ៣៤ឆ្នាំ ជាកសិករ មានទីលំនៅភូមិស្វាយឆ្អេះ ឃុំស្វាយឆ្អេះ ស្រុកថ្មគោល ខេត្តបាត់ដំបង និងមានប្តីឈ្មោះជា ផល អាយុ២៨ឆ្នាំ ។
ស្ត្រីរងគ្រោះបានឱ្យដឹងថា នាងបានលែងលះគ្នាអស់រយៈពេល៦ខែហើយ គឺតាំងពីនាងមានផ្ទៃពោះបាន៣ខែម្ល៉េះដោយសារឪពុកម្តាយខាងប្តីរបស់នាងបំបែក ហើយថ្មីៗនេះដោយសារបញ្ហាជីវភាព នាងបានចាកចេញពីស្រុកកំណើតបំណងដើររកការងារធ្វើដោយគ្មានគោលដៅ និងដេកតាមសំយ៉ាបផ្ទះគេ ។ លុះដល់វេលាម៉ោង៦ និង៣០នាទីព្រឹកនេះក៏បែកទឹកភ្លោះឈឺពោះឆ្លងទន្លេបង្កឱ្យមានការភ្ញាក់ផ្អើល ហើយត្រូវប្រជាពលរដ្ឋនៅជិតនោះជួយអន្តរាគន៍ហៅរថយន្តសង្គ្រោះ៧១១ នៃមន្ទីរពេទ្យកងពលតូចលេខ៧០ដឹកយកទៅមន្ទីរពេទ្យបង្អែកពោធិ៍ចិនតុងដើម្បីសង្គ្រោះ តែដោយសារសម្ពាធឈាមរបស់នាងឡើងខ្ពស់ពេក ខាងមន្ទីរពេទ្យបង្អែកក៏បញ្ជូនបន្តទៅកាន់មន្ទីរពេទ្យជប៉ុន៕
ចែករំលែកព័តមាននេះ