កម្មវិធីជួបជុំមិត្តចាស់ ឬអតីតសិស្សវិទ្យាល័យព្រះស៊ីសុវត្ថិ (អតីតវិទ្យាល័យភ្នំដូនពេញ) នឹងប្រព្រឹត្តធ្វើឡើងនៅថ្ងៃសៅរ៍ ទី២៥ ឧសភា ២០១៣ នៅវិទ្យាសល័យព្រះស៊ីសុវត្ថិ វេលាម៉ោង៥ល្ងាច ក្រោមគំនិតផ្តួចផ្តើមរៀបចំកម្មវិធីដោយលោកឧត្តមសេនីយ៍ទោ បណ្ឌិត ហ៊ុន ម៉ាណែត រួមជាមួយអតីតសិស្សវិទ្យាល័យព្រះស៊ីសុវត្ថិ (អតីតវិទ្យាល័យភ្នំដូនពេញ) ជាច្រើននាក់ ដើម្បីជួបជុំសំណេះសំណាល ពិសាអាហារសាមគ្គី និងបង្កើតកម្មវិធីសប្បុរសក្នុងគោលបំណងស្វែងរកថវិកាស្ម័គ្រចិត្តសម្រាប់រួមចំណែកជួសជុលអគារសិក្សាក្នុងបរិវេណវិទ្យាល័យ ព្រមទាំងសមិទ្ធផលផ្សេងៗ ។
អារម្មណ៍មួយដែលយើងចងចាំមិនដែលភ្លេចសោះក្នុងមួយជីវិតនេះ គឺអនុស្សាវរីយ៍ដែលបានសាងឡើងក្នុងគ្រាសិក្សាវ័យជំទង់នៅវិទ្យាល័យ ដូចជាទិដ្ឋភាពសំណើចកក្អាកក្អាយ ស្រស់ស្រាយលាយស្នាមញញឹមរបស់មិត្តភក្តិគ្រប់រូប។ ពាក្យពេចន៍ទូន្មានរបស់លោកគ្រូ-អ្នកគ្រូពេលពន្យល់មេរៀន និងការដើរកម្សាន្តជាក្រុម សុទ្ធសឹងជាសកម្មភាពដែលបានឆ្លាក់ទុកក្នុងស្នាមអនុស្សវរីយ៍យុវវ័យឱ្យចងចាំក្នុងចិត្ត ទោះមកដល់ពេលនេះលោកអ្នកមានវ័យចំណាស់ហើយក្តី ។ ការជួបជុំអតីតសិស្សវិទ្យាល័យព្រះស៊ីសុវត្ថិ នាពេលនេះរឹងរឹតតែញាំុងឱ្យកើតមានការចងចាំមួយថ្មីទៀតលេចត្រដែតឡើង ជាពិសេសបានជួបជុំមិត្តចាស់រីករាយប្តូរផ្លាស់បទពិសោធន៍ និងបង្កើនភាពស្និទ្ធស្នាលទ្វេដងកាន់តែធ្វើឱ្យអនុស្សាវរីយ៍កាលពីវ័យជំទង់ហាក់នៅថ្មីៗ ។ លើសពីនេះលោកអ្នកថែមទាំងបានចែករំលែកសណ្តានចិត្ត ប្រាក់កាសធនធានផ្ទាល់ខ្លួន ទោះក្នុងចំនួនតិចក្តី-ច្រើនក្តី ដើម្បីរួមចំណែកកសាងសមិទ្ធផលនានា ទុកជាអនុស្សាវរីយ៍បន្តដល់យុវជនជំនាន់ក្រោយ ដូចជាសាលារៀន បណ្ណាល័យ សួនច្បារក្នុងសាលាជាដើម ។
ការជួបជុំអតីតសិស្សវិទ្យាល័យព្រះស៊ីសុវត្ថិ នាពេលនេះទស្សនាវដ្តីមហាគ្រួសារ សូមរីករាយនាំយកមកជូនលោក-អ្នកនូវកាលវិភាគកម្មវិធីលំអិត ដូចខាងក្រោម ៖
-ម៉ោង៤រសៀល ជួបជុំក្រុមការងារ និងបុគ្គលិក
-ម៉ោង៥ល្ងាច អតីតសិស្សវិទ្យាល័យព្រះស៊ីសុវត្ថិអញ្ជើញដល់
-ម៉ោង៥និង៣០នាទីល្ងាច ភ្ញៀវកិត្តិយស និងគណៈអធិបតីអញ្ជើញដល់
-ម៉ោង៦ល្ងាច ចាប់ផ្តើមដំណើរការកម្មវិធីដូចតទៅ ៖
១-កិច្ចស្វាគមន៍ដោយពិធីករ ពិធីការិនី
២-ទស្សនាការសម្តែងរបាំជូនពរ
៣-របាយការណ៍សង្ខេបដោយលោកមូល ស៊ុយហេង នាយកវិទ្យាល័យ
៤-មតិស្វាគមន៍របស់លោកហ៊ុន ម៉ាណែត តំណាងអតីតសិស្សវិទ្យាល័យព្រះស៊ីសុវត្ថិ
៥-សុន្ទរកថា ចំណាប់អារម្មណ៍របស់លោកប្រធានគណៈអធិបតី
៦-ពិធីជូនវត្ថុអនុស្សាវរីយ៍ដល់លោកគ្រូ អ្នកគ្រូចូលនិវត្តន៍
៧-ពិសាភោជនាហារអមដោយការទស្សនារបាំសែនភ្លយ របាំនេសាទ គោះត្រឡោក និងសិល្បៈផ្សេងៗទៀត
៨-រាំលេងកម្សាន្តតាមប្រពៃណី និងចង្វាក់ផ្សេងៗរហូតចប់កម្មវិធី ។
នេះចាត់ទុកជាការអញ្ជើញឯកឧត្តម លោកជំទាវ អ្នកឧកញ៉ា លោក លោកស្រី អ្នកនាង កញ្ញាទាំងអស់ដែលជាអតីតសិស្សវិទ្យាល័យព្រះស៊ីសុវត្ថិ (អតីតវិទ្យាល័យភ្នំដូនពេញ) មេត្តាអញ្ជើញចូលរួមក្នុងកម្មវិធីខាងលើនេះ ឱ្យបានច្រើនកុះករ និងដោយក្តីរីករាយ។
សូមមេត្តាទំនាក់ទំនងព័ត៌មាន និងចុះឈ្មោះសម្រាប់ការចូលរួមកម្មវិធីនៅ «ទីចាត់ការ» នៃវិទ្យាល័យព្រះស៊ីសុវត្ថិ គិតពីថ្ងៃជូនដំណឹងនេះតទៅនៅរៀងរាល់ថ្ងៃចាប់ពីម៉ោង៧និង៣០នាទីព្រឹកដល់ម៉ោង៦ល្ងាច ឬសាកសួរព័ត៌មានតាមរយៈលេខទូរស័ព្ទ ៖ ០១២ ២៥៦ ៧៣៤/ ០១២ ២៥៦ ៧៣៥/ ០១២ ២៥៦ ៧៣៦/ ០១២ ២៥៦ ៧៣៧/ ០៩៧ ២៥៦ ៦៧១៣, អីុម៉ែល ៖ info@preahsisowath-alumni.com៕
ចែករំលែកព័តមាននេះ