រាជធានីភ្នំពេញ៖ រថយន្តកូរ៉េចំណុះ១តោនកន្លះកូរ៉េមួយគ្រឿងដឹកកម្មកររោងចក្រកាត់ដេរជាង៣០នាក់បានបើកបរធ្វើដំណើរក្នុងល្បឿនយ៉ាងលឿនហើយប៉ះចំថ្ងៃស៊យបានដាច់រ៉ូទីលចង្កូតធ្វើឲ្យរេចុះឡើងៗពេញផ្លូវបន្ទាប់មកបានជ្រុលធ្លាក់ចូលទៅក្នុងប្រឡាយទឹកមួយកន្លែងទាំងព្រឹកប៉ុន្តែសំណាងល្អមិនក្រឡាប់ហើយគ្មានអ្នកស្លាប់និងរបួសធ្ងន់ធ្ងរឡើយគ្រាន់តែមានកម្មការិនី៣នាក់របួសស្រាលប៉ុណ្ណោះ។
ឧប្បត្តិហេតុខាងលើនោះបានធ្វើឲ្យកម្មករកម្មការិនីមានការជ្រួលច្របល់យ៉ាងខ្លាំងហើយដែលបានកើតឡើងកាលពីវេលាម៉ោង០៦និង១០នាទីព្រឹកថ្ងៃទី២៥ខែឧសភាឆ្នាំ២០១៣នៅលើកំណាត់ផ្លូវជាតិលេខ៣ត្រង់ចំណុចក្បែរសួនឧស្សាហកម្មវឌ្ឍនៈ២ស្ថិតក្នុងភូមិទឹកថ្លាសង្កាត់ក្រាំងពង្រ ខណ្ឌដង្កោ ។
រថយន្តកូរ៉េមួយគ្រឿងនោះម៉ាកហ៊ីយ៉ាន់ដាយចំណុះ១តោនកន្លះ ពណ៌ស ពាក់ស្លាកលេខ ភ្នំពេញ 2A-2144 បើកបរដោយបុរសម្នាក់ ឈ្មោះគង់ សំអាងអាយុ៣២ឆ្នាំ មានទីលំនៅភូមិព្រៃល្ង សង្កាត់ចោមចៅ ខណ្ឌពោធិសែនជ័យ។ អ្នកបើកបររថយន្តរូបនោះបាននិយាយថានៅមុនពេលកើតហេតុ ខ្លួនបានបើករថយម្តដឹកកម្មករចេញពីតាមបណ្ដាភូមិនានា ក្នុងភូមិសាស្ត្រ ស្រុកកណ្ដាលស្ទឹង ខេត្តកណ្ដាល និងខេត្តកំពង់ស្ពឺ ក្នុងបំណងទៅដាក់តាមរោងចក្រកាត់ដេរដោយបើកបរធ្វើដំណើរតាមផ្លូវជាតិលេខ៣ ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុខាងលើ ស្រាប់តែរថយន្តបានដាច់រ៉ូទីលចង្កូត ធ្វើឲ្យបញ្ជាលែងបាន ហើយរេចុះឡើងៗ រួចក៏បានធ្លាក់ចូលប្រឡាយទឹកតាមសម្រួលសំណាងល្អមិនក្រឡាប់បណ្ដាលឲ្យកម្មករណាម្នាក់រងរបួសធ្ងន់ឬក៍ស្លាប់។
នៅក្នុងខណៈនោះបានធ្វើឲ្យកម្មករកម្មការិនីមានការជ្រួលច្របល់ និងភិតភ័យយ៉ាងខ្លាំង ខ្លះភ័យរហូតដល់សន្លប់ថែមទៀតផង ចំណែកឯសមត្ថកិច្ចមូលដ្ឋានបានចុះទៅកន្លែងកើតហេតុ ដឹកបញ្ជូនអ្នករបួសស្រាលទៅកាន់មន្ទីរពេទ្យនឹងមិនបាននាំយករថយន្តនោះទៅទុកនៅអធិការដ្ឋានខណ្ឌនោះទេ ដោយសារមិនមានកម្មករណាម្នាក់ប្តឹងផ្តល់នោះឡើយ៕ យន់ស៊ីថា
ចែករំលែកព័តមាននេះ