រាជធានីភ្នំពេញ ៖ របាំងដែកចែកទ្រូងផ្លូវ ចំនួន ៣ផ្ទាំង ដែលមានទីតាំងស្ថិតនៅតាមបណ្តោយផ្លូវសហព័ន្ធរុស្ស៊ី ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ ត្រូវរងនៅការខូចខាតទាំងស្រុង ខណៈបុរសម្នាក់វ័យជាង ៣០ ឆ្នាំ ងងុយដេកបើករថយន្តកូរ៉ូឡា លឿនរេចង្កូត បុករះកាលពីវេលាម៉ោង ១២ នឹង ២០ នាទីយប់ថ្ងៃទី២៥ ខែឧសភា ឆ្នាំ ២០១៣ ។
សមត្ថកិច្ចដែលចុះទៅពិនិត្យដល់កន្លែងកើតហេតុបានឲ្យដឹងថា នៅមុនពេលកើតហេតុគេសង្កេតឃើញបុរសម្នាក់បានបើករថយន្តមួយគ្រឿងម៉ាក កូរ៉ូឡា ពណ៌ស្ករ ពាក់ស្លាកលេខ ភ្នំពេញ 2T 1495 ធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ដោយបានបើកយ៉ាងលឿន លុះមកដល់ចំណុចកើតហេតុក៏ស្រាប់តែរេចង្កូតរថយន្តជ្រុលបុករបាំងដែកពុះទ្រូងផ្លូវតែម្តងទៅ ។
បុរសជាម្ចាស់រថយន្តបាននិយាយរៀបរាប់ប្រាប់សមត្ថកិច្ចថា ខ្លួនបានបើកបរថយន្តចេញពីខេត្តកំពង់ស្ពឺឆ្ពោះទៅសង្កាត់ព្រែកលាភ ខណ្ឌឬស្សីកែវ លុះពេលជិះមកដល់ចំណុចនេះដោយខ្លួនងងុយដេកខ្លាំងពេក ងកមួយផាំងក៏បង្កឲ្យមានគ្រោះថ្នាក់នេះកើតឡើងទៅ។
បន្ទាប់ពីកើតហេតុរថយន្តបង្កហេតុ ត្រូវបានសមត្ថកិច្ចជំនាញចុះមកអន្តរាគមន៍ធ្វើការវាស់វែងស្ទូចយកទៅរក្សាទុកនៅការិយាល័យចរាចណ៍ជើងគោករាជធានីភ្នំពេញរង់ចាំដោះស្រាយតាមផ្លូវច្បាប់៕
ចែករំលែកព័តមាននេះ