រាជធានីភ្នំពេញ៖ និស្សិតទាហានម្នាក់ រៀននៅសាលានៃទាហានសកម្ម ជំនាន់ទី១៤ បានជិះម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BS-5422 ដោយសារម៉ូតូបែកកង់ បុរសម្នាក់នោះក៏បានយកម៉ូតូទៅប៉ះកង់ រហូតដល់ពេលប៉ះរួចហើយ បែរជាមិនឲ្យលុយគេ ថែមទាំងរករឿងចង់វាយ និងជេរប្រមាថក្រុមអ្នកកាសែតដែលចុះទៅផ្តិតយករូបភាពថែមទៀតផង។ ហេតុការណ៍នេះបានកើតឡើងកាលពីវេលាម៉ោង ១១នឹង៤០នាទីយប់ ថ្ងៃទី២៤ ឧសភា ២០១៣ នៅតាមបណ្តោយផ្លូវ២៧១ ក្រោមស្ពានអាការ៧មករា ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
ជុំវិញករណីខាងលើនេះ ប្រជាពលរដ្ឋដែលនៅក្បែរកន្លែងកើតហេតុ បានរិះគន់ថា បុរសខាងលើនេះ អាងខ្លួនជានិស្សិតទាហានម្នាក់ ប្រើគេឲ្យប៉ះកង់ម៉ូតូរបស់ខ្លួនទាំងយប់ហើយ មិនឲ្យលុយគេថែមទៀត មិនតែប៉ុណ្ណោះ និស្សិតទំនើងម្នាក់នេះ មានចរិកកោងកាង មិនខ្លាច និងមានសីលធម៌ចំពោះក្រុមអ្នកកាសែតដែលបានចុះទៅថតរូបដើម្បីផ្តិតរូបភាពយកមកចុះផ្សាយទេ បែរជាជេរប្រមាថនិងមើលងាយក្រុមអ្នកកាសែតទៅវិញ។
ភ្នាក់ងារសារព័ត៌មានកោះសន្តិភាព ក៏ដូចជាប្រជាពលរដ្ឋដែលនៅកន្លែងកើតហេតុ បានសំណូមពរដល់និស្សិត ក៏ដូចជាយុវវ័យផ្សេងៗទៀត កុំយកតម្រាប់តាមនិស្សិតទាហានទំនើងខាងលើនេះឲ្យសោះ៕
ចែករំលែកព័តមាននេះ