ខេត្តកំពង់ធំ ៖ ជនដើរឆបោកតែងប្រើប្រាស់គ្រប់រូបភាពគ្រប់ល្បិចកល ដើម្បីបញ្ឆោតយកប្រាក់ពីប្រជាពលរដ្ឋ តាមរយៈការត្រូវរង្វាន់ជាម៉ូតូ និងបានប្រាប់ឱ្យផ្ញើលុយឱ្យពួកគេតាមសេវាផ្ទេរប្រាក់ដើម្បីជាសោហ៊ុយក្នុងការដឹកមកឱ្យជាដើម ។ សកម្មភាពរបស់ជនខិលខូចទាំងនេះកំពុងបង្កឱ្យប៉ះពាល់ដល់កិត្តិយសមន្ត្រី និងសេវាវេរប្រាក់ ។
ប្រភពព័ត៌មានបានឱ្យដឹងថា កាលពីថ្ងៃទី២១ ឧសភា ជនមិនស្គាល់អត្តសញ្ញាណបានទូរស័ព្ទមកលោកដួង យុន មានឋានៈក្រុមប្រឹក្សាសង្កាត់កំពង់ធំ លោកជៀប ប៉ោឡេង ជាមេភូមិទី៧ (សង្កាត់កំពង់ធំ) អ្នកស្រីមាន ស៊ីហ៊ន ឋានៈចៅសង្កាត់រងទី១ កំពង់ធំនិងលោកសេង វ័ន្ដគី ឋានៈចៅសង្កាត់រងទី១ អូរកន្ធរ ក្នុងពេលផ្សេងៗគ្នា ដោយប្រាប់ថា ខ្លួនជាទីប្រឹក្សារបស់ លោកប៊ុន សម្ផស្ស និងប្រាប់បន្តថា ដោយសារថ្នាក់លើមើលឃើញអំពីការងាររបស់អស់លោកធ្វើការងារបានល្អក្នុងការបម្រើប្រជាពលរដ្ឋនោះហេតុដូច្នេះហើយថ្នាក់លើ នឹងជូនរង្វាន់ម៉ូតូម្នាក់១គ្រឿង និងសារុង១០០សារុង ។
នៅថ្ងៃស្អែកដោយរូបគេនឹងដឹកយកមកប្រគល់ឱ្យដល់កន្លែង ។ ប៉ុន្ដែនៅថ្ងៃនេះសូមឱ្យជួយវេរលុយចំនួន១០០ដុល្លារតាមវីងមកឱ្យគេសិនដើម្បីធ្វើជាសោហ៊ុយក្នុងការដឹកជញ្ជូនម៉ូតូយកទៅឱ្យ ។ ប្រភពព័ត៌មានបានឱ្យដឹងទៀតថា បន្ទាប់ពីជនមិនស្គាល់អត្ដសញ្ញាណនោះទូរស័ព្ទមកបែបនេះធ្វើឱ្យមានការសង្ស័យ ទើបអ្នកស្រីមាន ស៊ីហ៊ន បានរាយកាណ៍ទៅសមត្ថកិច្ចនគរបាលជាមុន ព្រោះដឹងថា អាចមានបញ្ហានិងប្រាប់ទៅវិញថា ឱ្យពួកគេដឹកម៉ូតូមកចុះ ចាំយកលុយនៅកន្លែង ស្រាប់តែបាត់ដំណឹងឈឹងតែម្ដង ។ ចំណែកលោកជីវ គឹមអុនចៅសង្កាត់អូរកន្ធរ និងលោកសេង វ័ន្ដគី ចៅសង្កាត់រងទី១បានប្រាប់ថា លេខទូរសព្ទ័ដែលបានហៅមកមាន៤ខ្សែ ។
នៅពេលទូរស័ព្ទមកម្ដងៗ ពួកនោះបិទបើកៗផ្លាស់ប្ដូរគ្នារហូត ហើយរូបលោកក៏ធ្លាប់បានចាញ់បោកអស់១០០ដុល្លារម្តងដែរ ទើបដឹងពីល្បិចនេះ ។
លោកវរសេនីយ៍ត្រីយ៉េង សារ៉េន អធិការស្រុកប្រាសាទសំបូរបានឱ្យដឹងដែរថា មានគេទូរស័ព្ទមកលោកដោយទូរស័ព្ទនោះមើលមិនឃើញលេខទេហើយប្រាប់ថា រូបលោកបានឈ្នះរង្វាន់ម៉ូតូ១គ្រឿង ។ ជនមិនស្គាល់អត្តសញ្ញាណនោះបានប្រាប់ទៀតថា គេបានទូរស័ព្ទពីស្ថានីយទូរទស្សន៍ស៊ីធីអីុន សូមកុំឱ្យបិទទូរស័ព្ទ និងឱ្យទិញកាតទូរស័ព្ទឱ្យគេតម្លៃ៥ដុល្លារចំនួន៦សន្លឹកកោសឱ្យគេដើម្បីទាក់ទងគ្នា ។
ដោយសារមានការសង្ស័យ រូបលោកក៏បានបិទទូរស័ព្ទ១ភ្លែត រួចទូរស័ព្ទទៅសួរក្រុមហ៊ុនថា តើលេខទូរស័ព្ទរបស់លោកមានត្រូវរង្វាន់ម៉ូតូពិតមែនដូចពាក្សគេប្រាប់ទេ ។ ពេលនោះខាងក្រុមហ៊ុនឆ្លើយមកវិញថា លេខទូរស័ព្ទរបស់លោកមិនមានឈ្នះរង្វាន់ម៉ូតូនោះទេ ។ សូមកុំឱ្យចាញ់បោកគេ ដំណឹងនេះគឺជាការក្រើនរំលឹក និងពញ្ញាក់ស្មារតីដល់ប្រជាពលរដ្ឋ និងមន្ដ្រីរាជការត្រូវប្រយ័ត្នចាញ់បោកជនខិលខូច ។ ប្រជាពលរដ្ឋ ដែលបានដឹងរឿងរា៉វទាំងអស់នេះ បានសំណូមពរទៅដល់ក្រសួងមហាផ្ទៃសូមឱ្យធ្វើការស្រាវជ្រាវរកលេខទូរស័ព្ទទាំង៤ខ្សែខាងលើឱ្យខាងតែបាន ដើម្បីយកជនខិលខូចមកផ្ដនា្ទទោសចំពោះមុខច្បាប់ បើរកមិនឃើញទេនោះ ពួកនេះនឹងបន្តការឆបោកទៀតមិនខាន ។
មុននេះអ្នកប្រកាសលក់ដីម្នាក់ក៏បានចាញ់បោកជនខិលខូចក្លែងខ្លួនជាសង្ឃនិងអួតថាគេជាជំនួយការសម្តេចសង្ឃរាជចង់ទាក់ទងទិញដីដើម្បីធ្វើអាស្រមសំណាក់ធម៌ ។ ទីបំផុតក្រោយពីសុំកាតទូរស័ព្ទតម្លៃ៥ដុល្លារបានហើយ ក៏ទាក់ទងលែងចូលតែម្តង ។ នេះសំណាងហើយចាញ់បោកត្រឹមតែ៥ដុល្លារ និងក៏មានការឆបោកជាច្រើនទៀតដោយយកឈ្មោះក្រុមហ៊ុននេះ ក្រុមហ៊ុននោះត្រូវរង្វាន់បានម៉ូតូឬរង្វាន់មានតម្លៃផ្សេងៗទៀត ដែលការបោកបែបនេះជនខិលខូចច្រើនតែឱ្យវេរលុយសម្រាប់ថ្លៃដឹកជញ្ជូន បើសិនជាវេរលុយទៅឱ្យ ពិតជាស៊យធំមិនខាន ៕
ចែករំលែកព័តមាននេះ