រាជធានីភ្នំពេញ ៖ នៅថ្ងៃព្រហស្បតិ៍ ទី២៣ ឧសភា ឆ្នាំ២០១៣ ក្រុមហ៊ុនធានារ៉ាប់រងអាយុជីវិតកម្ពុជា «កម្ពុជា ឡៃហ្វ» សហការជាមួយក្រសួងវប្បធម៌ និងវិចិត្រសិល្បៈ បានរៀបចំពិធីផ្សព្វផ្សាយស្តីពីផលិតផល និងគុណប្រយោជន៍នៃការធានារ៉ាប់រងអាយុជីវិត ក្រោមអធិបតីភាពដ៏ខ្ពង់ខ្ពស់របស់លោក អ៊ុន ទឹម អនុរដ្ឋលេខាធិការ តំណាងលោករដ្ឋមន្ត្រីក្រសួងវប្បធម៌ និងវិចិត្រសិល្បៈ ។
ក្រុមហ៊ុនធានារ៉ាប់រងអាយុជីវិតកម្ពុជា ហៅកាត់ថា «កម្ពុជា ឡៃហ្វ» បានដាក់សម្ពោធឱ្យប្រតិបត្តិការអាជីវកម្មជាផ្លូវការនៅថ្ងៃទី២១ ឧសភា ឆ្នាំ២០១២ ក្រោមអធិបតីភាពដ៏ខ្ពង់ខ្ពស់ លោកបណ្ឌិត អូន ព័ន្ធមុន្នីរ័ត្ន រដ្ឋមន្ត្រីប្រតិភូអមនាយករដ្ឋមន្ត្រី និងរដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ ។ ការដាក់ឱ្យប្រតិបត្តិការអាជីវកម្មក្រុមហ៊ុន «កម្ពុជា ឡៃហ្វ» ក្នុងទស្សនៈវិស័យជាអ្នកដើរតួយ៉ាងសំខាន់ក្នុងការអភិវឌ្ឍវិស័យហិរញ្ញវត្ថុ ជាមួយនឹងការបង្កើតទីផ្សារគំរូក្នុងទិសដៅលើកកម្ពស់ជីវភាព សុខុមាលភាពសង្គម និងផ្តល់សំណាញ់សុវត្ថិភាពដល់ប្រជាពលរដ្ឋកម្ពុជា ជាមួយនឹងការផ្តល់ជូននូវសេវាធានារ៉ាប់រងអាយុជីវិតប្រកបដោយគុណតម្លៃ គុណភាព និងតម្លាភាព ។
ការធានារ៉ាប់រងអាយុជីវិត គឺជាវិស័យថ្មីនៅកម្ពុជា ដែលចាំបាច់ត្រូវធ្វើការផ្សព្វផ្សាយអប់រំឱ្យបានទូលំទូលាយ និងតម្រូវឱ្យមានការចូលរួមពីសាធារណជនទូទៅ ។ ពិធីផ្សព្វផ្សាយក្នុងថ្ងៃនេះ ដែលរៀបចំដោយក្រុមហ៊ុនធានារ៉ាប់រងអាយុជីវិតកម្ពុជា «កម្ពុជា ឡៃហ្វ» ដែលជាក្រុមហ៊ុនជាតិទី១ គឺធ្វើឡើងក្នុងគោលបំណងដើម្បីបញ្ជ្រាបនូវចំណេះដឹងអំពីវិស័យធានារ៉ាប់រងអាយុជីវិតជូនដល់ថ្នាក់ដឹកនាំ និងមន្ត្រីក្រោមឱវាទនៃក្រសួងវប្បធម៌ និងវិចិត្រសិល្បៈ ។
ក្នុងឱកាសនោះដែរ លោក អុិន មាត្រា អគ្គនាយកក្រុុមហ៊ុនធានារ៉ាប់រងអាយុជីវិតកម្ពុជា បានធ្វើបទបង្ហាញពីសារប្រយោជន៍រួមនៃការធានារ៉ាប់រងអាយុជីវិត ក៏ដូចជាអត្ថប្រយោជន៍ដោយឡែក ដែលទទួលបានពីការប្រើប្រាស់ផលិតផលធានារ៉ាប់រងអាយុជីវិតនីមួយៗរបស់ «កម្ពុជា ឡៃហ្វ» ជូនដល់មន្ត្រីនៃក្រសួងវប្បធម៌ និងវិចិត្រសិល្បៈ ដើម្បីឱ្យមានការយល់ដឹងពីអត្ថប្រយោជន៍ និងតម្រូវការក្នុងការប្រើប្រាស់សេវាថ្មីនេះ ដើម្បីចូលរួមកាត់បន្ថយហានិភ័យនៅក្នុងគ្រួសារ និងស្ថាប័ននីមួយៗ ។ ម៉្យាងទៀត ដើម្បីជំរុញកំណើនសេដ្ឋកិច្ចជាតិ ជាពិសេសផ្តល់ភាពសុខសាន្ត និងសុវត្ថិភាពហិរញ្ញវត្ថុ ជាមួយនឹងការរៀបចំផែនការហិរញ្ញវត្ថុតាមលក្ខណៈវិទ្យាសាស្ត្រ សម្រាប់ការពារហានិភ័យដែលកើតមានឡើងនាពេលអនាគត ។
បច្ចុប្បន្ន ក្រុមហ៊ុន «កម្ពុជា ឡៃហ្វ» ផ្តល់ជូនអតិថិជននូវផលិតផលចំនួន៤ គឺមរតកអ្នកមានគុណ មូលធនជីវិតបវរ មរតកអមតៈ និងមរតកតបស្នង ។ ផលិតផលទាំងបួននេះ មានសារប្រយោជន៍ផ្សេងៗគ្នា ដែលបំពេញនូវតម្រូវការរបស់អតិថិជនទៅតាមស្ថានភាពរបស់ពួកគេនីមួយៗ ៕
ចែករំលែកព័តមាននេះ