ការប្រកួតជុំផ្តាច់ព្រ័ត្រយូហ្វាឆេមពានលីក២០១២-២០១៣ នៅយប់ថ្ងៃទី២៥ ឧសភា នេះកំពុងធ្វើឱ្យអ្នកនិយមទស្សនាបាល់ទាត់ភាគច្រើនចាប់អារម្មណ៍យ៉ាងខ្លាំង និងបានយកសត្វឱ្យធ្វើការទស្សន៍ទាយថា តើក្លិបណាមួយនឹងក្លាយជាជើងឯក ។ នៅវគ្គផ្តាច់ព្រ័ត្រនេះ ក្លិប២នៅក្របខ័ណ្ឌ Bundesliga អាល្លឺម៉ង់គឺក្លិប Bayern Munich និងក្លិប Dortmund នឹងជួបគ្នានៅឯទីលានប្រកួតវេមប្ល៊ី ស្ថិតក្នុងទីក្រុងឡុងដ៍ ចក្រភពអង់គ្លេស ។
ឧទ្យានសត្វមួយក្នុងទីក្រុងឡៃស៊ីក ប្រទេសអាល្លឺម៉ង់ បានយក«បារូ»ជាឈ្មោះដំរីដ៏សែនចេះ ធ្វើការជ្រើសរើសដោយឱ្យវាស៊ីស្ពៃក្តោបដែលមានលាបពណ៌តំណាងឱ្យក្លិបនីមួយៗ ឃើញថា បារ៉ូ បានជ្រើសយកស្ពៃក្តោបពណ៌លឿង-ខ្មៅជាពណ៌ប្រចាំក្លិប Dortmund ។ ស្របពេលជាមួយគ្នានេះត្រីមឹក«អីុឃ័រ» នៅក្នុងឧទ្យានសត្វទឹកមួយរបស់អាល្លឺម៉ង់ បានទស្សន៍ទាយថាក្លិប Dortmund នឹងក្លាយជាជើងឯកយូហ្វាឆេមពានលីក២០១២-២០១៣ ដោយត្រីមឹកបានហែលទៅតោងលើប្រអប់ដែលមានរូបឡូហ្គោក្លិប Dortmund ។
ស្របពេលនោះដែរ សត្វស្វាមួយក្បាលនៅឯសួនសត្វដតម៉ាន់ក៏ជ្រើសយកអាវពណ៌លឿង-ខ្មៅ តំណាងឱ្យក្លិបDortmund ច្រើនជាងការជ្រើសយកអាវពណ៌ក្រហមតំណាងឱ្យក្លិប Bayern Munich ។លទ្ធផលនៃការទស្សន៍ទាយរបស់សត្វខាងលើ ហាក់ខុសគ្នាទៅនឹងការរំពឹងទុករបស់អ្នកគាំទ្រនៅលើពិភពលោកដែលយល់ឃើញថា ក្លិប Bayern Munich នឹងឈ្នះក្លិបDortmund ក្លាយជាជើងឯកយូហ្វាឆេមពានលីក ក្នុងរដូវកាល២០១២-២០១៣នេះ ៕
ចែករំលែកព័តមាននេះ