អាជ្ញាធរអូស្ត្រាលីមានចំណាត់ការគ្រប់គ្រងបរិមាណសត្វដោយបាញ់សម្លាប់សេះចំនួន១០.០០០ក្បាល ព្រោះលើកហេតុផលថា ពួកវាមានចំនួនច្រើនលើសការកំណត់ ធ្វើឱ្យប៉ះពាល់ដល់ទីប្រជុំជន ។តាមរបាយការណ៍ពីអូស្ត្រាលីបញ្ជាក់ថា អាជ្ញាធរបានបាញ់សម្លាប់សេះពីឧទ្ធម្ភាគចក្រ និងរំពឹងថា នៅដំណាច់ខែមិថុនា នឹងដាស់តឿនដល់ប្រជាជនឱ្យស្ថិតនៅឆ្ងាយពីភាគខាងលិចឆៀងខាងត្បូងតំបន់អាលីស ស្ព្រីង ក្នុងរយៈចម្ងាយ៣០០គីឡូម៉ែត្រ ព្រោះអាចមានមេរោគពីខ្មោចសត្វដែលងាប់ដ៏សន្ធឹកសន្ធាប់ ។
ព័ត៌មាននោះធ្វើឱ្យប្រជាជនដែលស្រឡាញ់សេះតវ៉ាប្រឆាំង ប៉ុន្តែអាជ្ញាធរបានផ្តល់ហេតុផលថា ចាំបាច់ត្រូវសម្លាប់ពួកវា និងគ្មាននរណាម្នាក់ចង់មើលឃើញពីការលំបាកវេទនាពីការឆ្លងជំងឺ បើបណ្តោយឱ្យពួកវាមានចំនួនច្រើនលើសការកំណត់ទេ ។លើសពីនេះជារឿងដ៏លំបាកមួយក្នុងការដឹកជញ្ជូនសេះទៅសម្លាប់នៅទីសត្តឃាតដែលមានរយៈចម្ងាយ១.៥០០គីឡូម៉ែត្រ ។ សត្វសេះធ្លាប់ប្រើប្រាស់ក្នុងកងទ័ពអង់គ្លេសនៅប្រទេសឥណ្ឌា និងអូស្ត្រាលី ធ្លាប់ប្រើប្រាស់សេះនៅក្នុងសង្គ្រាមលោកលើកទី១ ៕
ចែករំលែកព័តមាននេះ