ក្រុមចម្រុះប្រឆាំងស៊ីរីចាប់ផ្តើមកាលពីថ្ងៃទី២៣ ឧសភា ក្នុងក្រុងអីុស្តង់ប៊ុល នូវកិច្ចប្រជុំរយៈពេល៣ថ្ងៃ ដើម្បីពិភាក្សាគ្នាលើការចូលរួមជាយថាហេតុរបស់ខ្លួនក្នុងសន្និសីទសន្តិភាពអន្តរជាតិ«ហ្សឺណែវ២» ខណៈដែលរបបលោកប្រធានាធិបតីបាចា អាល់អាសាដ អះអាងពីការប្តេជ្ញាចិត្តយកឈ្នះលើពួកឧទ្ទាម ។
យោងតាមអ្នកទទួលខុសត្រូវម្នាក់របស់ក្រុមប្រឆាំងស៊ីរីថា កិច្ចប្រជុំនៅក្រុងអីុស្តង់ប៊ុលនោះគឺវាយតម្លៃសភាពការណ៍នៅលើទីលាន ដែលពេលនេះរបបក្រុងដាម៉ាស់កំពុងបើកធ្វើការវាយលុកធំមួយប្រឆាំងទីក្រុងយុទ្ធសាស្ត្រ QOUSSEIR ។ ពួកប្រឆាំងក៏ចាប់ផ្តើមពិភាក្សាគ្នាដែរ ពីការចូលរួមរបស់សមាជិកថ្មីៗក្នុងក្រុមចម្រុះនេះ។ ទោះជាយ៉ាងណា ការជជែកពិភាក្សាគ្នាសំខាន់បំផុតដែលត្រូវចាប់ផ្តើមនាថ្ងៃទី២៤ ឧសភា ផ្តោតលើការចូលរួម ឬអត់របស់ក្រុមចម្រុះនេះ ក្នុងការចរចាជាមួយរបបលោកអាសាដ ដើម្បីស្វែងរកដំណោះស្រាយនយោបាយមួយនៃជម្លោះយ៉ាងបង្ហូរឈាមនៅស៊ីរី ចាប់តាំងពីជាង២ឆ្នាំមកហើយ ។
គំនិតនៃសន្និសីទសន្តិភាពអន្តរជាតិនោះហៅ«ហ្សឺណែវ២» ត្រូវបានលើកឡើងដោយសហរដ្ឋអាមេរិក និងរុស្ស៊ី ព្រមទាំងមានការគាំទ្ររបស់បណ្តាប្រទេសលោកខាងលិច និងបណ្តាប្រទេសអារ៉ាប់ ដែលជាការបង្កើនការគាបសង្កត់លើក្រុមចម្រុះប្រឆាំង ដើម្បីឱ្យក្រុមនេះចូលរួមក្នុងសន្និសីទនោះ ។
ប្រទេសចំនួន១១ដែលគាំទ្រពួកប្រឆាំង ក្នុងនោះមានសហរដ្ឋអាមេរិកដែរ ប៉ុនប៉ងធានាដល់ក្រុមចម្រុះដោយអះអាងនៅក្រុងអាមម៉ង់កាលពីថ្ងៃទី២២ ឧសភាថា លោកបាចាអាល់អាសាដ របបរបស់លោក ព្រមទាំងបណ្តាមនុស្សជំនិតដែលមានដៃប្រឡាក់ឈាម នឹងពុំមានតួនាទីណាមួយនាពេលអនាគតនៅស៊ីរីឡើយ ។ ក្រុមមិត្តរបស់ស៊ីរីនោះក៏ប្រកាសផងដែរថា នឹងបន្តជួយពួកប្រឆាំងរហូតដល់លោកអាសាដចាកចេញពីអំណាច ៕
ចែករំលែកព័តមាននេះ