ខេត្តតាកែវ ៖ សិស្សានុសិស្សថ្នាក់ទី១ចំនួន១២៣នាក់ នៅសាលាបឋមសិក្សាព្រៃសណ្តែកក្នុងខេត្តតាកែវបានទទួលអំណោយមួកសុវត្ថិភាពបន្ថែមដើម្បីប្រែក្លាយសិស្សឱ្យមានទម្លាប់ពាក់មួកសុវត្ថិភាពដូចជាពាក់ឯកសណ្ឋានសាលា ហើយសកម្មភាពនេះជាផ្នែកមួយនៃកម្មវិធីមួកសុវត្ថិភាពសម្រាប់កុមាររបស់អង្គការមូលនិធិបង្ការរបួសអាស៊ី ដោយបានគាំទ្រដោយក្លឹបអ្នកជិះទោចក្រយានយន្តធុនធំនៅកម្ពុជា ។
សម្រាប់ឆ្នាំទី២នេះ ក្លឹបអ្នកជិះម៉ូតូធំនៅកម្ពុជា (CBC) បានរៀបចំការជិះដើម្បីសកម្មភាពមនុស្សធម៌ក្នុងគោលបំណងរៃអង្គាសថវិកាពីបណ្តាអាជីវកម្មធំៗ ក្នុងប្រទេស និងក្រៅប្រទេស រួមមានពីធនាគារ MayBank មើសឡាញ (Maersk Line) ដាមកូ (Damco) អឹមស៊ីស៊ីត្រេនស៉្បត (MCC Transport) ក្រុមហ៊ុនប្រេងម៉ាស៊ីនថបវ័ន (Top1 Oil) ហាង Sawasdee Massage និងហាងម៉ៃប៊ឺហ្គឺហៅស៍ ដើម្បីផ្តល់អំណោយមួកសុវត្ថិភាពដល់សិស្សសាលាបឋមសិក្សា ព្រៃសណ្តែក ។
មានអ្នកជិះម៉ូតូចំនួន៥០នាក់ ចេញពីមជ្ឈមណ្ឌលកោះពេជ្រ ទៅសណ្ឋាគារសាន់វ៉េ ក្នុងរាជធានីភ្នំពេញ កាលពីថ្ងៃទី៣១ មីនា ឆ្នាំ២០១៣ ដើម្បីបង្ហាញពីការគាំទ្រដល់ការជិះម៉ូតូធុនធំដើម្បីសកម្មភាពមនុស្សធម៌ដែលសកម្មភាពនេះធ្វើឡើងស្របពេលនៃការប្រារព្ធសប្តាហ៍ទោចក្រយានយន្តនៅរាជធានីភ្នំពេញ លើកទីពីរក្រោមប្រធានបទ «ជិះទោចក្រយានយន្តដើម្បីបុព្វហេតុមនុស្សធម៌»។
លោក Tommy Christensen តំណាងក្លិបអ្នកជិះទោចក្រយានយន្តធុនធំនៅកម្ពុជា (CBC) និងជានាយកគ្រប់គ្រងក្រុមហ៊ុន Go4 Intelligent Bunkering Solutions បានថ្លែងថា ការទទួលអំណោយមួកសុវត្ថិភាពកាលពីឆ្នាំមុនបានផ្តល់លទ្ធផលហួសពីការរំពឹងទុក និងបានជំរុញលើកទឹកចិត្តឱ្យខិតខំបន្តទៀត ។ លោកបន្ថែមថា អត្រាពាក់មួកសុវត្ថិភាពបានកើនឡើងពីចំណុចសូន្យ រហូតដល់៩៤ភាគរយ ។ ជាមួយនឹងលទ្ធផលដ៏គួរឱ្យភ្ញាក់ផ្អើលនេះ យើងពិតជាសប្បាយរីករាយណាស់ក្នុងការបន្តការជិះទោចក្រយានយន្តរបស់យើងដើម្បីរៃអង្គាសថវិកាសម្រាប់គាំទ្រដល់ការលើកកម្ពស់សុវត្ថិភាពចរាចរណ៍នៅលើដងផ្លូវរបស់កុមារទាំងនេះ ។
លោកឧត្តមសេនីយ៍ទោ គីម យីដេត អគ្គលេខាធិការរងគណៈកម្មាធិការជាតិសុវត្ថិភាពចរាចរណ៍ផ្លូវគោក និងជាអនុប្រធាននាយកដ្ឋានកណ្តាលសណ្តាប់ធ្នាប់សាធារណៈបានមានប្រសាសន៍ថា សាលាបឋមសិក្សាព្រៃសណ្តែកជាសាលាមួួយដែលស្ថិតនៅតាមបណ្តោយផ្លូវជាតិលេខ២ ប្រកបដោយចរាចរណ៍យ៉ាងមមាញឹក ដែលភ្ជាប់ពីរាជធានីភ្នំពេញមកកាន់ព្រំប្រទល់ប្រទេសវៀតណាម ។ ដោយសារភាពមមាញឹកនៃចរាចរណ៍បែបនេះ និងហេដ្ឋារចនាសម្ព័ន្ធនៅមានកម្រិតបាននាំឱ្យបរិស្ថាននៅជុំវិញសាលារៀនពោរពេញដោយការគ្រោះថ្នាក់ចរាចរណ៍សម្រាប់សិស្សានុសិស្ស ។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានបញ្ជាក់ថា ការគាំទ្រពីក្លឹបអ្នកជិះទោចក្រយានយន្តធុនធំនៅកម្ពុជា (CBC) មិនត្រឹមតែផ្តល់ជាអំណោយមួកសុវត្ថិភាពក្នុងការការពារកុមារពីការរងរបួសក្បាលធ្ងន់ធ្ងរ ដែលអាចឈានដល់ការស្លាប់ប៉ុណ្ណោះទេ ប៉ុន្តែថែមទាំងអាចផ្តល់លទ្ធភាពឱ្យយើងអាចបណ្តុះបណ្តាលលោកគ្រូ អ្នកគ្រូ រៀបចំសកម្មភាពអប់រំក្រៅថ្នាក់ និងការទំនាក់ទំនងជាមួយមាតាបិតាសិស្ស សំដៅពង្រឹងការយល់ដឹងរបស់ពួកគាត់អំពីការពាក់មួកសុវត្ថិភាព និងជំរុញឱ្យពួកគាត់ពាក់មួកសុវត្ថិភាពឱ្យកូនៗពួកគាត់ទៀតផង ។
លោក Benjamin Paul Wilson អ្នកចាត់ការទូទៅប្រចាំកម្ពុជានៃក្រុមហ៊ុន Maersk (Cambodia) Co., Ltd. បានមានប្រសាសន៍ថា សកម្មភាពដែលជំរុញការចូលរួមពីមាតាបិតា និងសហគមន៍បានដើរតួនាទីយ៉ាងសំខាន់ក្នុងការធ្វើឱ្យគម្រោងសកម្មភាព កាលពីឆ្នាំទី១ ទទួលបានជោគជ័យ ។ ក្នុងនាមជាលោកគ្រូ អ្នកគ្រូ មាតាបិតា ក្រុមអ្នកជិះទោចក្រយានយន្ត និងថ្នាក់ដឹកនាំអាជីវកម្មយើងត្រូវធ្វើជាគំរូដ៏ល្អសម្រាប់សិស្សានុសិស្ស និងកូនៗ ។ សូមចូលរួមបំពេញតួនាទីរបស់អ្នកដោយពាក់មួកសុវត្ថិភាពគ្រប់ពេលវេលាធ្វើដំណើរ ហើយត្រូវធានាថា កូនៗរបស់អ្នកទាំងអស់ក៏បានពាក់មួកសុវត្ថិភាពដូចអ្នកដែរ ។
លោក Lee TienPoh ប្រធាននាយកប្រតិបត្តិនៃធនាគារ Maybank បានមានប្រសាសន៍ថា ការសហការជាមួយអង្គការមូលនិធិបង្ការរបួសអាស៊ីនាពេលនេះក្នុងការផ្តល់ការអប់រំអំពីសុវត្ថិភាពចរាចរណ៍ និងការពាក់មួកសុវត្ថិភាពមានសារសំខាន់សម្រាប់ធានាថា អាកប្បកិរិយានៃការពាក់មួកសុវត្ថិភាពមានតាំងពីវ័យក្មេងទៅ ៕
ចែករំលែកព័តមាននេះ