ខេត្តតាកែវ ៖ កាលពីព្រឹកថ្ងៃទី១៩ ឧសភា កន្លងទៅនេះ លោកបណ្ឌិត សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារថ្នាក់កណ្តាលចុះជួយស្រុកបាទី រួមដំណើរដោយលោកទូច ហេង អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារថ្នាក់កណ្តាលចុះជួយឃុំតាំងដូង អស់លោក លោកស្រីជាមន្ត្រី អ្នកមុខ អ្នកការជាច្រើនរូបទៀត បានអញ្ជើញចូលរួមក្នុងពិធីសំណេះសំណាលជាមួយសមាជិក សមាជិកាគណបក្សប្រជាជនកម្ពុជាសាខាបក្សភូមិព្រែកក្តី អង្គក្រឡាញ់ និងភូមិអំពែទុំ ឃុំតាំងដូង ស្រុកបាទី ។
ឮលោកទីវ វង់ ប្រធានគណៈកម្មាធិការគណបក្សប្រជាជនកម្ពុជាឃុំតាំងដូងថ្លែងថា ឃុំតាំងដូងមានប្រជាពលរដ្ឋរស់នៅសរុបចំនួន១.១៥៩គ្រួសារ ស្មើនឹងចំនួនមនុស្ស៥.៥៣៥នាក់ អាយុចាប់ពី១៨ឆ្នាំឡើងមានចំនួន៣.៦៣៩នាក់ ។ ដោយឡែក សមាជិក សមាជិកាគណបក្សប្រជាជនកម្ពុជាមានចំនួន៩១៧គ្រួសារស្មើនឹងចំនួន២.៧៣១នាក់ ក្នុងនោះស្រីមានចំនួន១.៦០៤នាក់ ដោយចែកចេញជា២៤៤ក្រុមបក្ស។
លោកបណ្ឌិត សូរ ឃុន បានពាំនាំនូវប្រសាសន៍ផ្តាំផ្ញើសាកសួរសុខទុក្ខ និងការកោតសរសើរពីសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអនុប្រធានគណបក្សប្រជាជនកម្ពុជា ចំពោះសមាជិក សមាជិកាគណបក្សប្រជាជនកម្ពុជាសាខាបក្សភូមិព្រែកក្តី អង្គក្រឡាញ់ និងភូមិអំពែទុំ ដែលបានគាំទ្រដោយឥតងាករេចំពោះមាគ៌ាដឹកនាំដ៏ត្រឹមត្រូវរបស់គណបក្សប្រជាជនកម្ពុជា ក្នុងកិច្ចការពារ កសាង និងអភិវឌ្ឍន៍ប្រទេសជាតិ មានការរីកចម្រើនលូតលាស់ដូចសព្វថ្ងៃនេះ ។
លោករដ្ឋមន្ត្រីមានប្រសាសន៍ទៀតថា នៅថ្ងៃអាទិត្យ ទី២៨ ខែកក្កដា ឆ្នាំ២០១៣ ខាងមុខនេះ ប្រទេសជាតិយើងនឹងរៀបចំការបោះឆ្នោតជ្រើសតាំងអ្នកតំណាងរាស្ត្រសម្រាប់នីតិកាលទី៥ ដូចនេះលោកសូមផ្តាំផ្ញើដល់សមាជិក សមាជិកាគណបក្សប្រជាជនកម្ពុជាភូមិព្រែកក្តី អង្គក្រឡាញ់ និងភូមិអំពែទុំ សូមអញ្ជើញទៅបោះឆ្នោតឱ្យបានគ្រប់ៗគ្នាជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា ដើម្បីបានសម្តេចតេជោ ហ៊ុន សែន ធ្វើជានាយករដ្ឋមន្ត្រី និងបន្តដឹកនាំនាវាកម្ពុជាឆ្ពោះទៅដល់ត្រើយសុខសន្តិភាព និងភាពសម្បូររុងរឿងដូចអារ្យប្រទេសរីកចម្រើនជឿនលឿននានានៅក្នុងតំបន់ និងក្នុងពិភពលោក ។
ក្នុងឱកាសនោះ លោកបណ្ឌិត សូរ ឃុន ក៏បានចែកអំណោយជូនសមាជិក សមាជិកាគណបក្សប្រជាជនកម្ពុជាសាខាបក្សភូមិព្រែកក្តី អង្គក្រឡាញ់ និងភូមិអំពែទុំ សរុបចំនួន៦៨៧នាក់ ក្នុងនោះបុរសទទួលបានក្រមា១ រីឯស្ត្រីទទួលបានសារុង១ ។ ផ្តល់ថវិកាចំនួន៥៦ម៉ឺនរៀលជូនគណៈកម្មការរៀបចំពិធី និងផ្តល់ថវិកាចំនួន៣០ម៉ឺនរៀលជូនគ្រួសារប្រជាពលរដ្ឋរងគ្រោះដោយរន្ទះបាញ់ និងមានជំងឺផងដែរ ៕
ចែករំលែកព័តមាននេះ