ក្រុមគ្រូពេទ្យនៃមជ្ឈមណ្ឌលវេជ្ជសាស្ត្រ GLIWICE របស់ប៉ូឡូញប្រកាសពីថ្ងៃទី២២ ឧសភាកន្លងមកនេះថា បានធ្វើការវះកាត់ប៉ះមុខមនុស្សជាលើកដំបូងលើពិភពលោកក្នុងពេលសង្គ្រោះបន្ទាន់ ដើម្បីជួយស្រោចស្រង់ជីវិតបុរសម្នាក់ ។លោកស្រី ANNA URYGA អ្នកនាំពាក្យរបស់មជ្ឈមណ្ឌល GLIWICE ថ្លែងថា នេះជាការវះកាត់ផ្សាំ ឬប៉ះមុខលើកដំបូងនៅប៉ូឡូញ ហើយក៏ជាលើកដំបូងលើពិភពលោកធ្វើក្នុងពេលសង្គ្រោះបន្ទាន់សម្រាប់សង្គ្រោះជីវិតមនុស្សម្នាក់ ។
កាលពីថ្ងៃទី២៣ មេសា បុរសអាយុ៣៣ឆ្នាំម្នាក់ដែលមុខរបស់គេមួយផ្នែកធំត្រូវបកដោយម៉ាស៊ីនបំបែកថ្មមួយក្នុងគ្រោះថ្នាក់ចៃដន្យ ។ ការប៉ុនប៉ងប៉ះមុខដែលម៉ា៊ស៊ីនបកពុំទទួលបានជោគជ័យទាំងស្រុងឡើយ ក៏ប៉ុន្តែគ្រាន់តែជួយគេក្នុងគ្រាដំបូងឱ្យបុរសនោះអាចមើលឃើញ ហើយជួយប៉ះបានផ្នែកខាងក្រោមនៃមុខរបស់គេប៉ុណ្ណោះ ។ ទោះជាយ៉ាងណា ជីវិតរបស់បុរសនោះនៅតែមានគ្រោះថ្នាក់ ដោយសារទំហំមុខរបួសវាធំហើយជ្រៅ ។
ក្នុងការវះកាត់មួយមានរយៈពេលដល់២៧ម៉ោង ដែលធ្វើកាលពីថ្ងៃទី១៥ ឧសភា ក្រុមគ្រូពេទ្យដឹកនាំដោយលោក ADAM MACIEJEWSKI បានវះកាត់ប៉ះមុខពេញរបស់បុរសនោះ ហើយការវះកាត់នោះធ្វើដោយជោគជ័យ ។ ក្រោយការវះកាត់ប៉ះមុខបាន៧ថ្ងៃ លោក ADAM MACIEJEWSKI គូសបញ្ជាក់ថា ពេលនេះបុរសនោះអាចដកដង្ហើមបានដោយស្វយ័ត ។ គេមិនទាន់អាចនិយាយបាន តែអាចទាក់ទងតាមរយៈចលនាក្បាល ឬដៃ ។ បុរសអ្នកជំងឺអាចបរិភោគចំណីបានរួចរយៈពេល៨ខែទៀតគេនឹងបានមុខពេញវិញហើយ ៕
ចែករំលែកព័តមាននេះ