ខេត្តកំពង់ឆ្នាំង ៖ ក្មេងប្រុសម្នាក់បានស្លាប់ និងស្ត្រីម្នាក់ទៀតរងរបួសធ្ងន់ធ្ងរ ដោយសារតែបុរសម្នាក់មិនចេះបើកបរទាល់តែសោះ ហើយបានទៅបញ្ឆេះរថយន្តគេដែលមានសោរស្រាប់ បណ្តាលឱ្យស្ទុះទៅបុកជនរងគ្រោះ២នាក់ផ្ទប់នឹងជង្រុកស្រូវ បណ្តាលឱ្យស្លាប់និងរបួស ។ ហេតុការណ៍នេះកើតឡើងនៅវេលាម៉ោង៥និង៣០នាទីល្ងាច ថ្ងៃទី២៣ ឧសភា ក្នុងភូមិក្រាំងស្រម៉ ឃុំស្វាយជុក ស្រុកសាមគ្គីមានជ័យ ។
លោក អៀរ ប៊ុនធឿន នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តនិយាយថា បុរសឈ្មោះ ហេង ប៊ុនហុង អាយុ៣០ឆ្នាំ មានលំនៅភូមិតាំងក្រង ឃុំស្វាយជុក ស្រុកសាមគ្គីមានជ័យ ជាអ្នកបញ្ឆេះរថយន្ត ជ្រុលទៅបុកក្មេងប្រុសរងគ្រោះឈ្មោះ ហ៊ូ ឈីយូ អាយុ១ឆ្នាំ និងស្ត្រីរងគ្រោះរបួសធ្ងន់ឈ្មោះ ម៉ៅ ទីន អាយុ៣៤ឆ្នាំ ទាំងពីរនាក់ជាមីងនិងក្មួយមានលំនៅភូមិ-ឃុំកន្លែងកើតហេតុ ។
លោកនាយការិយាល័យបន្តថា មុនពេលកើតហេតុបុរសឈ្មោះ ហេង ប៊ុនហុង ត្រឡប់ពីហូបការស្រវឹងជោកជាំ បានឡើងដេកក្នុងកាប៊ីនឡានមា៉កហ៊ីយ៉ាន់ដាយ ដែលម្ចាស់ឡានគេចត ចោល ។ លុះពេលងើបពីដេកឃើញសោរឡានដែលម្ចាស់គេទុកចោល ភ្លាមនោះបុរសខាងលើបានកាច់កុងតាក់បញ្ឆេះ មិនដឹងថារថយន្តជាប់លេខ ក៏ស្ទុះទៅបុកជនរងគ្រោះទាំង២នាក់មីងក្មួយផ្ទប់នឹងជង្រុកស្រូវ បណ្តាលឱ្យក្មួយប្រុសអាយុ១ឆ្នាំ ស្លាប់នៅនឹងកន្លែង ចំណែកម្តាយមីងរបួសជាទម្ងន់ ត្រូវដឹកទៅសង្គ្រោះនៅមន្ទីរ ពេទ្យ ។
ក្រោយពេលកើតហេតុឈ្មោះ ហេង ប៊ុនហុង ត្រូវប៉ូលិសមូលដ្ឋានឃាត់ខ្លួនភ្លាមៗ បញ្ជូនមកស្នងការដ្ឋាននគរបាលខេត្ត និងរថយន្តហ៊ីយា៉ន់ដាយពាក់ស្លាកលេខ ព.0275 ភព3 យកមករក្សាទុកនៅអធិការដ្ឋានស្រុកសាមគ្គីមានជ័យជាបណ្តោះអាសន្ន ៕
ចែករំលែកព័តមាននេះ