រាជធានីភ្នំពេញ ៖ មុនពេលចាកចេញពីតំណែងជាអគ្គនាយកដឹកជញ្ជូននៃក្រសួងសាធារការ និងដឹកជញ្ជូន លោក អុឹង ជុនហួរ បានថ្លែងថា ការប្រលងយកប័ណ្ណបើកបរមានចំណុចខ្វះខាត និងអំពើពុករលួយ ធ្វើឱ្យមានមតិរិះគន់ច្រើនពីសាធារជន ដូច្នេះលោកគិតថា ដើម្បីឱ្យល្អជាងនេះ ត្រូវបង្កើតប្រព័ន្ធ IT នៅក្នុងទីលានប្រលងដៃចង្កូត ឱ្យដូចជានៅក្នុងប្រទេសជឿនលឿនអញ្ចឹងដែរ ។
លោក អុឹង ជុនហួរ ថ្លែងបែបនេះនៅក្នុងពិធីប្រកាសផ្ទេរតំណែងរបស់លោក ដែលត្រូវតែងតាំងឱ្យធ្វើជាទីប្រឹក្សាអមក្រសួងសាធារណការ និងដឹកជញ្ជូន ហើយលោក ចាន់ តារា ត្រូវបានតែងតាំងជាអគ្គនាយកថ្មី ជំនួសលោក អុឹង ជុនហួរ ។ ពិធីនេះធ្វើឡើងនៅក្រសួងសាធារណការ និងដឹកជញ្ជូន កាលពីថ្ងៃទី២៣ ឧសភា ក្រោមអធិបតីភាព លោក ត្រាំ អុីវតឹក រដ្ឋមន្ត្រីក្រសួងសាធារណការ និងដឹកជញ្ជូន។
មានមតិសំណេះសំណាលនៅក្នុងឱកាសនោះលោក ត្រាំ អុីវតឹក ទទួលស្គាល់ថា បច្ចុប្បន្នពិតជាមានការទិញប័ណ្ណបើកបរក្នុងតម្លៃ១៨០ដុល្លារមែននៅតាមខេត្ត ដោយសារតែអ្នកប្រលងគិតថា ប្រលងនៅភ្នំពេញ មិនងាយទទួលបានប័ណ្ណបើកបរ ហើយលោកសូមឱ្យចេញប័ណ្ណបើកបរឱ្យបានត្រឹមត្រូវ ពីព្រោះបច្ចុប្បន្នបញ្ហាកកស្ទះចរាចរណ៍ និងគ្រោះថ្នាក់ចរាចរណ៍កំពុងក្លាយជាកង្វល់ដ៏ធំធេង ។
លោក ត្រាំ អុីវតឹក សូមឱ្យអគ្គនាយកដឹកជញ្ជូនដែលនឹងឡើងកាន់តំណែងថ្មី គិតគូរធ្វើយ៉ាងណាឱ្យមានការចេញប័ណ្ណបើកបរ និងធ្វើស្លាកលេខឱ្យអតិថិជន សម្រាប់ម៉ូតូរយៈពេលតែ៣ថ្ងៃបានហើយ ហើយសម្រាប់រថយន្តគឺរយៈពេលតែមួយសប្តាហ៍ ពីព្រោះនៅប្រទេសវៀតណាម គេធ្វើរបៀបនេះ ។ ក្រៅពីនេះ ត្រូវគិតគូរធ្វើយ៉ាងណាឱ្យអាជីវករលក់ម៉ូតូ និងរថយន្តត្រូវស្ថិតនៅក្រោមការគ្រប់គ្រង របស់ក្រសួងសាធារណការ ដើម្បីងាយស្រួលឱ្យអាជីវករទាំងនោះចេញស្លាកលេខរថយន្ត ឬម៉ូតូទៅឱ្យអតិថិជន នៅពេលដែលគេទិញពីហាងលក់ទំនិញទាំងនោះតែម្តង ៕
ចែករំលែកព័តមាននេះ