រាជធានីភ្នំពេញ ៖ រថយន្តតូយ៉ូតាពីគិបពាក់ស្លាកលេខភ្នំពេញ 2L-6561 ពណ៌ទឹកប្រាក់ ដែលសមត្ថកិច្ចអះអាងថា អ្នកបើកបរស្រវឹងជ្រុលបុកដើមអំពិលពេញទំហឹង នៅចំណុចក្រោយមន្ទីរពេទ្យកេតុមាលា ហៅពេទ្យយោធា១៧ តាមវិថីព្រះសីុសុវត្ថិ សង្កាត់ស្រះចក ខណ្ឌដូនពេញ កាលពីវេលាម៉ោង១រំលងអធ្រាត្រឈានចូលថ្ងៃទី២៤ ឧសភា បណ្តាលឱ្យអ្នកបើកបររងរបួសជើង ។
សមត្ថកិច្ចឱ្យដឹងថា នៅវេលាម៉ោងខាងលើរថយន្តម៉ាកតូយ៉ូតាពីគិប ពណ៌ទឹកប្រាក់ បើកតាមវិថីព្រះស៊ីសុវត្ថិ ពីជើងទៅត្បូងក្នុងល្បឿនលឿន លុះមកដល់ក្រោយមន្ទីរពេទ្យព្រះកេតុមាលា ស្ថិតក្នុងសង្កាត់ស្រះចក ខណ្ឌដូនពេញ ក៏រេចង្កូតជ្រុល ទៅបុកដើមអំពិលមួយដើមពេញទំហឹង បណ្តាលឱ្យកៀបជាប់ជើងអ្នកបើកបរ ប្រជាពលរដ្ឋឃើញហេតុការណ៍ជួយសង្គ្រោះ យកទៅព្យាបាលនៅមន្ទីរពេទ្យកាល់ម៉ែត ។
ម្ចាស់រថយន្តជាមន្ត្រីរាជការព្រោះមុនពេលឡើងរថយន្តពេទ្យ ប្រាប់សមត្ថកិច្ចថា បានបាត់កាំភ្លើងខ្លី១ដើម ។សមត្ថកិច្ចបញ្ជាក់ថា រថយន្តតូយ៉ូតាពីគិបបែកពោងសុវត្ថិភាព និងដាច់កង់ខាងស្តាំហើយខូចខាតផ្នែកខាងមុខធ្ងន់ ត្រូវស្ទូចយកទៅទុកនៅការិយាល័យនគរបាលចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ៕
ចែករំលែកព័តមាននេះ