ខែមិថុនា ១៩៨២ វរសេនីយ៍ត្រីគ្រីស្ទីយ៉ង់ ព្រូតង់ បន្ទាប់ពីសម្រេចស្នាដៃជាប់ៗគ្នា៩ឆ្នាំ ក្នុងការងារដឹកនាំអង្គភាព GIGN(កងចល័តឆ្មាំជាតិ) ក៏ត្រូវផ្លាស់ទៅបំពេញការងារថ្មីនៅវិមានអេលីហ្សេ ក្នុងនាមទីប្រឹក្សាបច្ចេកទេស ។ អាយុ៣៨ឆ្នាំ មេកងចល័តឆ្មាំជាតិរូបនេះ ដែលមានជីតា និងឪពុកជាឆ្មាំជាតិពីមុនដែរ តែងតែបោះឆ្នោតជូនគណបក្សស្ដាំនិយម ។ គាត់មិនដែលដឹងរឿងសម្ងាត់របស់រដ្ឋដែលខ្លួនត្រូវរ៉ាប់រងឡើយ ។
ពេលសុំយោបល់លោកប្រធានាធិបតី ដើម្បីឱ្យដឹងមនុស្សជិតស្និទ្ធរូបណាខ្លះរបស់លោកប្រធានាធិបតីដែលត្រូវការពារនោះ លោកប្រធានាធិបតីឆ្លើយត្រួសៗ «ពួកចៅខ្ញុំដែលនៅតូចៗត្រូវបានទទួលអាទិភាពការពារ ។ ចំណែកដានីញែលប្រពន្ធខ្ញុំ លោកមិនបាច់ព្រួយច្រើនពេកទេ។ ពួកកូនប្រុសខ្ញុំក៏មានសេរីភាពល្អជាមួយក្រុមប៉ូលិសផ្ទាល់ខ្លួនដែរ» ។
បន្ទាប់មកលោកប្រធានាធិបតីប្រាប់ គ្រីស្ទីយ៉ង់ ព្រូតង់ ជាមួយសំឡេងហាក់មានភាពអាថ៌កំបាំង «កិច្ចការផ្សេងទៀត លោកទៅជួបលោកអង់ដ្រេ រូស្សឺឡេ ប្រធានខុទ្ទកាល័យចុះ» ។ លោកប្រធានខុទ្ទកាល័យរូបនេះក៏អត់និយាយវែងឆ្ងាយ «ត្រូវហើយ! តាមពិតមានរឿងល្អិតល្អន់ទៀត ។ លោកទៅជួបលោក ហ្វ្រង់ស្វ៊័រ ដឺហ្គ្រោសស៊ូ ទីប្រឹក្សាជំនិតបំផុតរបស់លោកប្រធានាធិបតីទើបដឹងច្បាស់» ។ លោកទី ប្រឹក្សាដែលក្ដាប់ឯកសារសំខាន់ៗរូបនេះ ក៏អត់រៀបរាប់វែងឆ្ងាយ «រឿងអីុចេះណា៎ ,លោកប្រធានាធិបតីមានគ្រួសារក្រៅមួយទៀត ។ ជាមួយគ្រួសារនេះ គាត់មានកូនស្រីម្នាក់ឈ្មោះម៉ាសារីន ចូលដល់ខែធ្នូខាងមុខ នាងអាយុបាន៨ខួបហើយ ។ ខ្ញុំជាអ្នកចេញមុខទទួលខ្លួនជាឪពុកធម៌នាង ក្នុងពិធីលាងបាបឱ្យនាង ។ សព្វថ្ងៃនាងរស់នៅជាមួយម្ដាយនៅខណ្ឌទី៦»។
ប៉ុន្មានថ្ងៃក្រោយ ការជួបគ្នារបស់មេកងចល័តឆ្មាំជាតិរូបនេះ ប្រព្រឹត្ដទៅនៅគេហដ្ឋានមុខសញ្ញាដែលត្រូវការពារនាផ្លូវJacob ។ នាងម៉ាសារីន «ទទួលភ្ញៀវ» ជាមួយម្ដាយក្នុងបរិយាកាសរីករាយ ។ លោកស្រីអាន ប៉័ងសូ ម្ដាយនាងតូចនិយាយបង្ការមុន «ខ្ញុំដឹងរួចហើយថាម្ដាយកូនខ្ញុំបានទទួលការការពារសុវត្ថិភាព ប៉ុន្ដែខ្ញុំសូមជម្រាបមុនថា ម្ដាយកូនខ្ញុំមិនធ្លាប់ប្ដូររបៀបរស់នៅទេ» ។
ដើម្បីអនុវត្ដភារកិច្ចសម្ងាត់នេះឱ្យបានល្អបំផុត គ្រីស្ទីយ៉ង់ ព្រូតង់ ជ្រើសរើសអ្នកមានថ្វីដៃ៨នាក់ពីកង GSPR (កងការពារសន្ដិសុខវិមានប្រធានាធិបតី) សម្រាប់ការពារនាងម៉ាសារីន ។ ពួកគេទាំង៨រូបជាអតីត GIGN ធ្លាប់ឆ្លងកាត់ក្លិនរំសេវក្នុងការប្រយុទ្ធរាប់មិនអស់ ,មានជំនាញខ្ពស់ដូចគ្នាក្នុងការប្រើអាវុធគ្រប់ប្រភេទ និងក្បាច់គុន ។ តាំងពីពេលនោះ រហូតដល់អាយុ២១ឆ្នាំ នាងម៉ាសារីន ទៅណាមកណាមួយជំហានក៏មានអង្គរក្ស២នាក់ដើរអម ។
នៅទីក្រុងប៉ារីស ដើម្បីឱ្យកងការពារមានកន្លែងស្នាក់នៅសមរម្យ ផ្ទះល្វែងមួយខ្នងត្រូវបានវិមានអេលីហ្សេ ជួលនៅលើគេហដ្ឋានលោកស្រីអានប៉័ងសូតែម្ដង ។ ក្រោយមកលោកស្រីអានប៉័ងសូ និងកូនស្រីរើទៅនៅភូមិគ្រឹះ Alma ផ្លូវប្រង់លី ជាទ្រព្យសម្បត្ដិវិមានអេលីហ្សេដែរ ដែលនៅក្បែរៗនោះ លោកប្រធានាធិបតី មីតតេរ៉ង់មានផ្ទះដោយឡែកមួយជិតផ្ទះលោកទីប្រឹក្សាហ្វ្រង់ស្វ៊័រ ដឺហ្គ្រោសស៊ូ ។
បន្ទាប់មកទៀត ដោយយល់ថាលោកប្រធានាធិបតីគួរមានទីតាំងដោយឡែកមួយសម្រាប់ជាកន្លែងងាយស្រួលជួបគ្រួសារសម្ងាត់ផ្ទាល់ខ្លួន គេសម្រេចចិត្ដរៀបចំកន្លែងសម្រាកលម្ហែកាយមួយសម្រាប់គាត់ក្នុងតំបន់ Essone ខាងត្បូងទីក្រុងប៉ារីសប្រហែល៤០គីឡូម៉ែត្រ ។ ទីនោះផ្ទៃដីធំទូលាយ មានភូមិគ្រឹះនៅកណ្ដាលអមដោយសួនផ្កាកុលាបស្រស់បំព្រង មានប្រព័ន្ធស្រោចស្រពល្អ ជាសម្បត្ដិដែលអ្នកមេម៉ាយរបស់អតីតប្រធានធនាគារម្នាក់ផ្ទេរជូនរដ្ឋឆ្នាំ១៩៧២ ។
លោកហ្សិល មេណា អនុប្រធានខុទ្ទកាល័យវិមានអេលីហ្សេ ជាអ្នកទទួលភារកិច្ចចាត់ចែងលម្អទីនោះ ព្រមទាំងកសាងកំពែងខ្ពស់ព័ទ្ធជុំវិញ។ ចាប់ពីខែធ្នូ ១៩៨២ នៅកន្លែងសម្រាកលម្ហែកាយថ្មីរបស់ឪពុកខ្លួន នាងម៉ាសារីនរៀបចំពិធីបុណ្យខួបកំណើតយ៉ាងសប្បាយរីករាយ ហើយលោកប្រធានាធិបតីក៏បានរស់នៅយ៉ាងកក់ក្ដៅម្ដងម្កាលនៅទីនោះជាមួយកូនស្រីសំឡាញ់ ដោយមានមិត្ដភក្ដិ និងសហការីមួយចំនួនតូចគាំពារ ក្នុងនោះមានលោកអង់ដ្រេ រូស្សឺឡេ អ្នកដែលអាចចេញ-ចូលទីតាំងសម្ងាត់នោះថ្មើរណាក៏បានដែរ ។
អតីតអង្គរក្សម្នាក់និយាយរំលឹករឿងនេះតាមការចងចាំរបស់ខ្លួន «លោកប្រធានាធិបតីតែងទៅទីនោះល្ងាចថ្ងៃសៅរ៍ចុងសប្តាហ៍ ហើយរស់នៅយ៉ាងមានសេចក្ដីសុខជាមួយកូនស្រី និងម្ដាយនាងរហូតដល់ម៉ោង៨យប់ថ្ងៃអាទិត្យ ទើបវិលត្រឡប់ទៅទីលំនៅផ្លូវការជួបជុំភរិយាដើមវិញ»។
លោកប្រធានាធិបតីហ្វ្រង់ស្វ៊័រ មីតតេរ៉ង់ រាល់លើកធ្វើដំណើរកម្សាន្ដទៅ Venise ប្រទេសអីុតាលី ចូលចិត្ដទៅជាមួយកូនស្រីម៉ាសារីន ។ សូម្បីក្នុងឱកាសបុណ្យណូអែលចុងក្រោយរបស់គាត់នាខែធ្នូ១៩៩៥ គឺ៨ថ្ងៃមុនពេលគាត់អនិច្ចកម្ម ក៏គាត់ប្រារព្ធពិធីបុណ្យណូអែលជាមួយកូនស្រីម៉ាសារីន នៅប្រទេសអេហ្សុីប ដែលជាប្រទេសមួយក្នុងចំណោមប្រទេសដែលគាត់ចូលចិត្ដដែរ ។
ក្រោយឆ្នាំ១៩៨៨ ដែលលោកហ្វ្រង់ស្វ៊័រ មីតតេរ៉ង់ ជាប់ឆ្នោតប្រធានាធិបតីម្ដងទៀត សកម្មភាពការពារ «នាងតូច» កាន់តែល្អិតល្អន់ជាងមុន ។ មេកងចល័តឆ្មាំជាតិគ្រីស្ទីយ៉ង់ ព្រូតូ ដែលបានទទួលការតែងតាំងជាប្រធានស្នងការប៉ូលិសទីក្រុងប៉ារីស ឆ្នាំ១៩៨៥ និយាយរំលឹកថា «ពេលម៉ាសារីននៅតូចស្រួលការពារ ព្រោះនាងនៅតែជាមួយម្ដាយ ។ លុះពេញក្រមុំ នាងមានអារម្មណ៍ស្រេកឃ្លានសេរីភាពក្នុងការដើរហើរ ។ នេះហើយជាការពិបាក» ។
ពេលវេលាកន្លងពីមួយឆ្នាំទៅមួយឆ្នាំ អ្នកដឹងរឿងសម្ងាត់នេះចាប់ផ្ដើមមានថែមមួយចំនួនទៀត ដែលដំបូងបំផុតគឺនាយកសាលាដែលម៉ាសារីនរៀនសូត្រ បន្ទាប់មកដល់ឪពុកម្ដាយ មិត្ដភក្ដិរបស់ម៉ាសារីន ពួកអាជីវករគ្រាក់ៗនៅផ្លូវ Jacob និងម្ចាស់ភោជនីយដ្ឋាន Les Assassins នៅទល់មុខផ្ទះម៉ាសារីន ដែលឧស្សាហ៍បានឃើញលោកប្រធានាធិបតីហ្វ្រង់ស្វ៊័រ មីតតេរ៉ង់ទ្រដៃកូនស្រី(ម៉ាសារីន) ឡើងរថយន្ដ ចុះរថយន្ដ…។ ប៉ុន្ដែទោះដូច្នេះក្ដី អាថ៌កំបាំងនេះនៅតែអាចរក្សាទុករហូតដល់ថ្ងៃទី៣ វិច្ឆិកា ១៩៩៤ ទើបធ្លាយសុសសាយ ពេលទស្សនាវដ្ដី Paris Match ចុះផ្សាយរូបថតនាងម៉ាសារីន និងឪពុកដើរចេញពីភោជនីយដ្ឋានម្ហូបសមុទ្រ Le Divellec នៅទីលាន Inialides ៕
ចែករំលែកព័តមាននេះ