រាជធានីភ្នំពេញ៖ រថយន្តម៉ាកតូយ៉ូតាស៊ីលីកាមួយគ្រឿង បានបើកបរក្នុងល្បឿនគួរសម តែដោយសារអ្នកបើកបរមានជំងឺរលាកឆ្អឹងខ្នងទើបបណ្តាលឲ្យងងឹតមុខ ខណៈពេលកំពុងបើកបរក៏បានរេចង្កូតជ្រុលទៅបុករនាំងដែកពុះចែកទ្រូងផ្លូវបាក់អស់ចំនួន៥ផ្ទាំង ហើយរថយន្តរងការខូចបន្តិចបន្តួចប៉ុណ្ណោះ។ ឧប្បត្តិហេតុគ្រោះថ្នាក់ខាងលើនោះបានកើតឡើងកាលពីវេលាម៉ោង៥និង៥នាទីល្ងាច ថ្ងៃទី២៣ ខែឧសភា ឆ្នាំ២០១៣នៅលើកំណាត់មហាវិថីសហព័ន្ធរុស្ស៊ីត្រង់ចំណុចមុខធនាគារអេស៊ីលីដា ស្ថិតក្នុងសង្កាត់កាកាប ខណ្ឌពោធិ៍សែនជ័យ។
រថយន្តបង្កហេតុខាងលើនេះ ម៉ាកតូយ៉ូតាស៊ីលីកា ពណ៌សំបកឪឡឹក ពាក់ស្លាកលេខ ភ្នំពេញ2B.5142 បើកបរដោយបុរសម្នាក់ឈ្មោះ លុក សីហមន្នី អាយុ៣៦ឆ្នាំ មុខរបរបុគ្គលិក អង្គការខេវីអេ(KVA)ស្នាក់នៅក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ។ តាមប្រភពព័ត៌មានពីកន្លែងកើតហេតុ បានឲ្យដឹងថានៅមុនពេលកើតហេតុ រថយន្តមួយគ្រឿងនោះបានបើកបរធ្វើដំណើរក្នុងទិសដៅពីកើតទៅលិច ក្នុងល្បឿនលឿនគួរសម ខណៈមកដល់ត្រង់ចំណុចកើតហេតុស្រាប់តែរេចង្កូត ជ្រុលទៅបុករនាំងដែកពុះចែកទ្រូងផ្លូវពេញទំហឹងបណ្ដាលឲ្យបាក់អស់ចំនួន៥ផ្ទាំង និងខូចខាតរថយន្តបន្តិចបន្តួច។
ប្រភពដដែលបានបន្តថាក្រោយពេលកើតហេតុ អ្នកបើកបររថយន្តមិនបានចុះចេញពីក្នុងរថយន្តភ្លាមៗនោះទេ ទោះបីជាសមត្ថកិច្ចប៉ូលិសគោះទ្វារហៅឲ្យចេញយ៉ាងណាក៍ដោយ រហូតក្រោយមកទើបបើកទ្វារ ហើយស្ត្រីជាប្រពន្ធក៏បានប្រាប់សមត្ថកិច្ចថាប្ដីរបស់នាងមានជំងឺរលាកឆ្អឹងខ្នង ទើបងងឹតបើករថយន្តជ្រុលទៅបុករនាំងដែកបែបនេះ។ ក្រោយពេលកើតហេតុសមត្ថកិច្ចប៉ូលិសការិយាល័យចរាចរផ្លូវគោករាជធានីភ្នំពេញបានចុះធ្វើការវាស់វែងនិងនាំយករថយន្តនោះទៅរក្សាទុករង់ចាំការដោះស្រាយគ្នាតាមផ្លូវច្បាប់៕យន់ស៊ីថា
ចែករំលែកព័តមាននេះ