រាជធានីភ្នំពេញ ៖ ទីស្នាក់ការក្រុមហ៊ុនម៉ី ហុង ដឹកអ្នកដំណើរដែលមានទីតាំងស្ថិតនៅអគារលេខ២១៣ ផ្លូវលេខ២៨៩ មុខសាលាបឋមសិក្សាទួកគោកស្ថិតក្នុងសង្កាត់បឹងកក់ទី១ ខណ្ឌទួកគោកត្រូវអគ្គិភ័យឆាបឆេះយ៉ាងសន្ធោសន្ធៅកាលពីវេលាម៉ោង៧និង២០នាទីព្រឹកថ្ងៃទី២៣ ឧសភា បណ្តាលឱ្យឆេះខូចខាតសម្ភារ ឯកសារ និងគ្រឿងសង្ហារិម ស្ថិតនៅជាន់ទី១ទាំងស្រុង ។ ក្នុងហេតុការណ៍អគ្គិភ័យនេះបានបង្កឱ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ ជាពិសេសអាជ្ញាធរមូលដ្ឋាន សមត្ថកិច្ចប៉ូលិសនិងកងរាជអាវុធហត្ថរហូតឈានដល់ការបិទកំណាត់ផ្លូវលេខ២៨៩ទាំងព្រឹកដើម្បីបង្កលក្ខណៈងាយស្រួលដល់រថយន្តពន្លត់អគ្គិភ័យ និងសមត្ថកិច្ចពាក់ព័ន្ធចូលទៅជួយអន្តរាគមន៍ពន្លត់អគ្គិភ័យនោះ ។
សមត្ថកិច្ចបានឱ្យដឹងថា ទោះជាយ៉ាងណា គ្រោះអគ្គិភ័យនេះមិនបានបណ្តាលឱ្យមនុស្សបាត់បង់ជីវិត ឬរងរបួសឡើយ ហើយក្នុងហេតុការណ៍នេះសមត្ថកិច្ចបានប្រើរថយន្តពន្លត់អគ្គិភ័យរបស់កងរាជអាវុធហត្ថ និងស្នងការដ្ឋាននគរបាលរាជធានីភ្នំពេញចំនួន១៦គ្រឿងដែលនៅ ជិតដើម្បីទៅអន្តរាគមន៍បាញ់ទឹកពន្លត់ទាន់ពេល ។ មន្ត្រីប៉ូលិសឱ្យដឹងទៀតថា ទីស្នាក់ការក្រុមហ៊ុនខាងលើមានម្ចាស់ឈ្មោះបួន សុមុនី ភេទប្រុស អាយុ៤១ឆ្នាំ ជាមន្ត្រីនៅទីស្តីការគណៈរដ្ឋមន្ត្រីបានជួលទៅឱ្យឈ្មោះម៉ី ហុង ភេទប្រុស អាយុ៤៧ឆ្នាំមានលំនៅក្នុងសង្កាត់ទួលសង្កែ ខណ្ឌឫស្សីកែវ បើកធ្វើជាទីស្នាក់ការក្រុមហ៊ុនម៉ី ហុង ដឹកអ្នកដំណើរ ។
ទាក់ទិននឹងការកើតអគ្គិភ័យនេះត្រូវបុគ្គលិកឱ្យដឹងថា បណ្តាលមកពីទុស្សេចរន្តអគ្គិសនី ចេញពីពិតាននៅជាន់ទី១ ហើយឆេះរាលដាលយ៉ាងរហ័សនិងសន្ធោសន្ធៅហុយផ្សែងខ្មួលខ្មាញ់ចេញពីអគារស្នាក់ការជាន់ខាងលើធ្វើឱ្យបុគ្គលិកទាំងអស់ដែលកំពុងតែធ្វើការនាំគ្នារត់ចេញ ។ បុគ្គលិកដដែលបន្តទៀតថា សម្ភារ ឯកសារ និងគ្រឿងសង្ហារិមការិយាល័យនៅជាន់ទី១ត្រូវភ្លើងបំផ្លាញទាំងស្រុង ចំណែកជាន់ក្រោមពុំរងការខូចខាតឡើយ ។
នៅពេលកើតមានអគ្គិភ័យ គេឃើញលោកឧត្តមសេនីយ៍ឯកជួន សុវណ្ណ អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ យ៉ា គឹមអីុ មេបញ្ជាការរងកងរាជអាវុធហត្ថលើផ្ទៃប្រទេសនិងជាមេបញ្ជាការកងរាជអាវុធហត្ថរាជធានីភ្នំពេញបានចុះទៅដល់កន្លែងកើតហេតុដើម្បីបញ្ជាដល់កងកម្លាំងជួយអន្តរាគមន៍ក្នុងការបាញ់ទឹកពន្លត់និងសម្រួលចរាចរណ៍ផងដែរ ។
នៅព្រឹកនោះ កំណាត់វិថីមហាសេនាប្រមុខគឹម អ៊ីលស៊ុង (ផ្លូវលេខ២៨៩)ត្រង់ចំណុចកើតមានអគ្គិភ័យត្រូវបានបិទចរាចរណ៍អស់រយៈពេលប្រមាណជិត១ម៉ោង ។ លោកវរសេនីយ៍ទោ នេត វន្ថា ប្រធានការិយាល័យនគរបាលបង្ការនិងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញបានឱ្យដឹងថា រថយន្តពន្លត់អគ្គិភ័យចំនួន១៦គ្រឿង បានទៅអន្តរាគមន៍ភ្លាមៗហើយបាញ់ពន្លត់បានទាន់ពេលមិនបណ្តាលឱ្យឆេះរាលដាលទៅលំនៅឋាននៅក្បែរនោះឡើយ ។ នៅក្នុងនោះមានរថយន្តរបស់ស្នងការដ្ឋាននគរបាលរាជធានីភ្នំពេញចំនួន៨គ្រឿងនិងរថយន្តរបស់កងរាជអាវុធហត្ថលើផ្ទៃប្រទេសនិងកងរាជអាវុធហត្ថរាជធានីភ្នំពេញចំនួន៨គ្រឿងបានបាញ់ទឹកអស់ចំនួន៣២រថយន្ត ។
លោកវរសេនីយ៍ទោ នេត វន្ថា បានឱ្យដឹងទៀតថា នៅក្នុងរាជធានីភ្នំពេញនាដើមឆ្នាំ២០១៣ នេះ មានអគ្គិភ័យកើតឡើងចំនួន៥១លើក ហើយបណ្តាលឱ្យឆេះស្លាប់មនុស្ស៤នាក់ និងរបួសចំនួន៧នាក់ ។ ជាមួយគ្នានេះ លោកក៏បានអំពាវនាវដល់ប្រជាពលរដ្ឋឱ្យមានការប្រុងប្រយ័ត្ន នៅពេលចាកចេញពីលំនៅឋានត្រូវបិទភ្លើងអគ្គិសនី ពន្លត់ភ្លើងចង្ក្រាន ទៀន ធូប ចៀសវាងការកើតមានអគ្គិភ័យបំផ្លាញផ្ទះខ្លួនឯងនិងអ្នកដទៃ ៕
ចែករំលែកព័តមាននេះ