ខេត្តកំពត ៖ ភ្នំខ្យងគឺជាភ្នំតូចមួយស្ថិតនៅក្នុងភូមិភ្នំខ្យង ឃុំប្រាសាទភ្នំខ្យង ស្រុកកំពង់ត្រាច ។ ភ្នំនេះមានរូងខ្វាត់ខ្វែង តែមានរូងមួយឈ្មោះរូងប្រាសាទភ្នំខ្យង ។ កាលពីទសវត្សឆ្នាំ៩០ មានជនទុច្ចរិតជាច្រើននាក់បានយកឧបករណ៍រាវរកវត្ថុបុរាណ និងបានជីកកកាយរកវត្ថុមានតម្លៃផ្សេងៗទៀត ។ សូមរំឭកថា កាលពីមុនភ្នំខ្យងស្ថិតនៅក្នុងឃុំកន្ថោរខាងជើង ក៏ប៉ុន្តែកាលពីប៉ុន្មានឆ្នាំមុន ក៏បានប្តូរមកឈ្មោះឃុំប្រាសាទភ្នំខ្យងវិញម្តង ព្រោះនៅក្នុងរូងភ្នំខ្យងមានប្រាសាទបុរាណមួយ ហើយក្រសួងវប្បធម៌ និងវិចិត្រសិល្បៈក៏បានដាក់ឈ្មោះរូងប្រាសាទភ្នំខ្យងនេះជាផ្លូវការផងដែរ ។
បច្ចុប្បន្ន រូងប្រាសាទភ្នំខ្យងនេះមានភ្ញៀវជាតិ និងអន្តរជាតិទៅហូរហែមិនដាច់ ។ នៅមានភ្នំតូចមួយទៀតដែលតភ្ជាប់ពីភ្នំខ្យង ត្រូវបានអ្នកជំនួញមានអំណាចម្នាក់ដែលសូម្បីតែអត្តសញ្ញាណក៏មិនហ៊ានប្រាប់ផងនោះ បានបង្ហាញដល់អាជ្ញាធរឃុំ និងស្រុកថា ភ្នំតូចដែលជាប់នឹងភ្នំខ្យងនេះពួកគេមានអាជ្ញាប័ណ្ណ ហើយបានជួលអ្នកជំនាញជនជាតិវៀតណាមប្រមាណ១៥នាក់ឱ្យមកធ្វើការរុករកវត្ថុមានតម្លៃនៅភ្នំតូចមួយជាប់នឹងភ្នំខ្យងនេះរយៈពេល១ខែ ដោយគ្មានរដ្ឋអំណាចណារារាំងទេ ។ ការរុករករបស់ក្រុមជំនាញវៀតណាមនោះក៏បានយកគ្រឿងចក្រមកជីកកាយផងដែរ ។
ជាមួយនឹងការកាយរុករកនោះ ក៏មានការដាក់បម្រាមមិនឱ្យប្រជាពលរដ្ឋដែលធ្លាប់តែទៅកើបយកថ្មកញ្ចក់លក់ត្រូវបញ្ចប់ ។ ប៉ុន្តែអ្វីដែលជាការកត់សម្គាល់នោះ គឺជម្រករបស់ក្រុមជំនាញជាជនជាតិវៀតណាមដែលជាកន្លែងស្នាក់នៅនោះ ត្រូវបានជនមិនស្គាល់មុខលួចដុតបំផ្លាញចោលអស់ ដែលសង្ស័យថាការលួចដុតនេះជាកំហឹងរបស់អ្នកស្រុក ។ អ្នកគ្រប់គ្រងកូនភ្នំតូចនេះដែលគេអះអាងថា មានអាជ្ញាប័ណ្ណនោះបានចំណាយប្រាក់យ៉ាងច្រើនមកជីកកាយរកថ្មមានតម្លៃខ្ពស់ ប៉ុន្តែក្រោយមកមិនដឹងជាយ៉ាងដូចម្តេច ក៏បានដកសម្ភារចាកចេញពីភ្នំនេះអស់ទៅ ។ បន្ទាប់ពីក្រុមអ្នកគ្រប់គ្រងភ្នំនេះប្រមូលសម្ភារចេញវិញអស់ ស្រាប់តែអ្នកភូមិភ្នំខ្យង និងអ្នកភូមិព្រៃកឹកនិយាយតៗគ្នាពីមាត់មួយទៅមាត់មួយថា ភ្នំខ្យងនេះត្រូវបានគេជីកកកាយ និងប្រមូលយកបានវត្ថុបុរាណជាច្រើនទៅបាត់យ៉ាងស្ងៀមស្ងាត់ ។
ពលរដ្ឋម្នាក់រស់នៅភូមិភ្នំខ្យងនិយាយថា ក្រុមអ្នករុករកថ្មកញ្ចក់ ប្រហែលជីកកាយប្រទះឃើញវត្ថុបុរាណមានតម្លៃដូចជាគេនិយាយមែន ព្រោះឃើញពួកគេប្រឹងណាស់ ។ ប៉ុន្តែអ្នកភូមិព្រៃកឹកម្នាក់ទៀតនិយាយថា ខ្លួនគាត់ជាអ្នកធ្វើការងារឱ្យអ្នករុករកនៅភ្នំនោះដែរ មិនបានរកឃើញអ្វីដូចគេនិយាយនោះទេ ។ គាត់និយាយថា នៅក្នុងរូងភ្នំមួយនោះមានថ្មរាងដូចរូបចម្លាក់ផ្សេងៗ ប៉ុន្តែក្នុងនោះបើសិនជាចូលទៅជ្រៅទៀតអាចប្រឈមនឹងគ្រោះថ្នាក់ ព្រោះសម្បូរទៅដោយពស់អាសិរពិសធំៗដែលរស់នៅ ។
ទាក់ទងទៅនឹងគេនិយាយតៗគ្នាថា ភ្នំខ្យងត្រូវបានគេរកឃើញវត្ថុបុរាណច្រើន ហើយដាក់រថយន្តយកទៅបាត់នោះ លោកហ៊ុន តេង មេឃុំប្រាសាទភ្នំខ្យងនិយាយថា នៅភ្នំខ្យងគ្មានអ្នកណារកវត្ថុបុរាណបានដូចដែលគេនិយាយតៗគ្នានោះទេ ហើយបើមិនជឿសួរអ្នកដែលធ្លាប់ចូលទៅធ្វើការនៅភ្នំនោះទៅ ។ រីឯលោកអេវ សំអឿន មេភូមិភ្នំខ្យងបានប្រាប់ដែរថា ភ្នំខ្យងមិនត្រូវបានគេរុករកឃើញវត្ថុបុរាណអ្វីទេ គឺគេកើបយកតែថ្មកញ្ចក់ ។ ចំណែកការលួចដុតរោងស្នាក់នៅរបស់ក្រុមជំនាញជនជាតិវៀតណាមកន្លងមកនេះទំនងជារឿងជម្លោះផ្ទៃក្នុងតែប៉ុណ្ណោះ ។
ទោះជាយ៉ាងណា តាមពាក្យចចាមអារ៉ាមនិយាយតៗគ្នាមកដល់សព្វថ្ងៃនេះថា គេបានរកឃើញគជ់ខ្យងដ៏ធំមួយ ដែលដាក់តាំងលើជើងទម្រធ្វើអំពី
ថ្ម ។ ពេលនេះនៅសល់តែជើងទម្រប៉ុណ្ណោះ ឯគជ់បុរាណនោះគេយកទៅបាត់ហើយ ។ គេយកទាំងគងជ័យមួយធ្វើពីសំរិទ្ធទៅបាត់ដែរ នៅសល់តែស្នាមព្យួរ ។ ប៉ុន្តែមន្ត្រីនៅថ្នាក់មូលដ្ឋាននោះបានបដិសេធ ៕
ចែករំលែកព័តមាននេះ