ក្រុមហ៊ុន Ford Motor Co នឹងបញ្ឈប់ការផលិតរថយន្តនៅប្រទេសអូស្រ្តាលីបន្ទាប់ពីរូបិយប័ណ្ណដុល្លារអូស្ត្រាលីឡើងថ្លៃបង្កឲ្យប៉ះពាល់ធ្ងន់ធ្ងរដល់សមត្ថភាពឧស្សាហកម្មក្នុងស្រុកប្រកួតប្រជែងជាមួយការនាំចូល ។ ការបិទរោងចក្រផលិតនេះជាលើកដំបូងក្នុងរយៈពេល៩ទសវត្សបន្ទាប់ពីស្ថាបនិកក្រុមហ៊ុនលោកហ៊ែនរី ហ្វដបានចាប់ផ្តើមផលិតម៉ូដែលTsលើកដំបូងនៅក្នុងប្រទេសនេះ។
ក្រុមហ៊ុនហ្វដអូស្រ្តាលីបានប្រឈមមុខនឹងតម្លៃដើមកើនឡើងមួយទ្វេជាពីរបើធៀបនឹងក្រុមហ៊ុននៅអឺរ៉ុប និងកើនឡើង៤ដងធៀបនឹង ក្រុមហ៊ុននៅអាស៊ី នេះបើយោងតាមប្រធានក្រុមហ៊ុនក្នុងស្រុកលោក Bob Graziano ឱ្យដឹង ។ លោកបានប្រកាសថាចាប់ពីខែតុលាឆ្នាំ២០១៦ទៅរោងចក្រពីរនៅទីក្រុងមែលប៊ន និងទីក្រុងហ្គីឡង នឹងបាត់បង់ការងារ១.២០០កន្លែង ។
ក្រុមហ៊ុនផលិតរថយន្ត៣នៅអូស្រ្តាលីបានប្រឹងប្រែងទាំងត្រដរក្នុងគ្រាដែលប្រាក់ដុល្លារក្នុងស្រុកឡើងថ្លៃ២៩%ធៀបនឹងប្រាក់យ៉េនជប៉ុនអំឡុងពេល១ឆ្នាំកន្លងទៅនេះដោយបានលើកទឹកចិត្តឲ្យមានការលក់រថយន្តនាំចូលកាន់តែថោកហើយកាត់បន្ថយការនាំចេញ ។ការបិទរោងចក្រមួយបង្កការគំរាមកំហែងដល់ភាពអាចរស់បាននៃឧស្សាហកម្មទាំងមូលនិងជាឧបសគ្គធ្ងន់ធ្ងរចំពោះនាយករដ្ឋមន្ត្រីជូលៀហ្គីលឡាដ ដែលគណបក្សពលកររបស់លោកស្រីកំពុងមានសំឡេងឆ្នោតគាំទ្រតិចតួចនៅមុនការបោះឆ្នោតថ្ងៃទី១៤ កញ្ញា ខាងមុខ ។
អ្នកស្រី Katrina Ell អ្នកសេដ្ឋសាស្ត្រប្រចាំក្រុមហ៊ុន Moody’s Analytics ប្រចាំទីក្រុងស៊ីដនីថ្លែងថា វិស័យផលិតកម្មរបស់អូស្រ្តាលីមិនអាចទ្រាំទ្រនឹងស្ថានភាពលំបាកបានទេ ។ ថ្លៃដើមពលកម្មខ្ពស់មានន័យថា យើងមិនអាចប្រកួតប្រជែងរយៈពេលវែងជាមួយប្រទេសដែលមានថ្លៃដើមទាបបានទេ ជាពិសេសប្រទេសនៅអាស៊ី។អត្រាប្តូរប្រាក់ខ្ពស់កំពុងតែធ្វើឲ្យកង្វះខាតការប្រកួតប្រជែងរបស់អូស្ត្រាលីកាន់តែធ្ងន់ធ្ងរ ៕
ចែករំលែកព័តមាននេះ