វាជារឿងកម្រមួយដែលថា មនុស្សស្រីវ័យក្មេង៣នាក់ត្រូវជនអាក្រក់ចាប់បង្ខាំងទុកក្នុងទីឃុំឃាំងតែមួយ (ផ្ទះវីឡា) សម្រាប់រំលោភសេពសន្ថវៈទៅតាមតម្រេកតណ្ហារបស់ពួកគេអស់រយៈពេលយ៉ាងហោចណាស់១០ឆ្នាំទម្រាំនឹងពួកនាងរើបង្រះ (គេចខ្លួនរួច) ចេញពីក្រញាំបិសាចនោះ បើទោះជាដឹងថាគ្មានសល់អ្វីក្រៅពីសំបកជីវិតចុងក្រោយនោះយ៉ាងណាក៏ដោយ ក៏វាប្រសើរជាងរស់ដូចនៅក្នុងឋាននរកដែរ ។
អំពើចាប់បង្ខាំងនារីវ័យក្មេងនេះកើតឡើងនៅទីក្រុង Cleveland រដ្ឋអូហៃយ៉ូសហរដ្ឋអាមេរិក ។ នារីរងគ្រោះម្នាក់ក្នុងចំណោម៣នាក់ឈ្មោះ Amanda Berry បានបាត់ខ្លួនកាលពីឆ្នាំ២០០៣នៅពេលនាងមានអាយុ១៦ឆ្នាំ ហើយនៅពេលថ្មីៗនេះនាងបានរត់គេចចេញពីផ្ទះជនចាប់បង្ខាំងដែលមានគ្នា៣នាក់បងប្អូន ដោយមានការជួយជ្រោមជ្រែងពីអ្នកជិតខាងស្របពេលដែលជនសង្ស័យមិននៅផ្ទះ ។ បន្ទាប់ពីនាង Amanda Berry គេចផុតពីបិសាចតណ្ហាក៏ប្រញាប់ទៅប្តឹងប៉ូលិសឱ្យជួយរំដោះមនុស្សស្រីផ្សេងទៀតដែលកំពុងជាប់ឃុំ។ ក្រោយមកប៉ូលិសបានចូលទៅជួយសង្គ្រោះស្ត្រី២នាក់ទៀតឈ្មោះ Gina DeJesus ដែលបានបាត់ខ្លួនកាលពីឆ្នាំ២០០៤នៅពេលនាងមានអាយុ១៤ឆ្នាំ និងម្នាក់ទៀតឈ្មោះ Michelle Knight បានបាត់ខ្លួនកាលពីឆ្នាំ២០០២នៅពេលនាងមានអាយុ១៩ឆ្នាំ ។
សូមបញ្ជាក់ថា ក្រៅពីនារីពេញវ័យ៣នាក់នោះ នៅមានក្មេងស្រីអាយុ៦ឆ្នាំម្នាក់ទៀតក៏ត្រូវបានសង្គ្រោះចេញពីផ្ទះជនល្មោភតណ្ហានោះដែរ ហើយប៉ូលិសគិតថា នាងជាកូនស្រីរបស់ Berry ដែលពួកគេរំលោភរហូតមានកូនស្រីមួយនេះ។ ក្រោយការរត់គេចខ្លួនដោយជោគជ័យ ប៉ូលិសក្នុងទីក្រុង Cleveland រដ្ឋអូហៃយ៉ូ និងភ្នាក់ងារ FBI បានស្រាវជ្រាវចាប់ខ្លួនជនសង្ស័យបាន៣នាក់បងប្អូនដែលមានម្នាក់ជាអ្នកបើកបររថយន្តដឹកសិស្សសាលា។ មានន័យថា ពេលពួកជនអាក្រក់ទាំងនោះដឹកសិស្សសាលា ពួកគេបានកត់សម្គាល់សិស្សស្រីណាស្អាតៗរួចទៅហើយ លុះមានឱកាសពួកគេក៏ចាប់បង្ខាំងទុកតែម្តង ។
ទោះជាយ៉ាងណាគេឆ្ងល់ថា ហេតុអ្វីបានជាពួកជនអាក្រក់ទាំង៣នាក់បងប្អូននោះមានឱកាសបង្ខាំងស្រីពេញវ័យទុករំលោភយូរម៉្លេះ(រហូតដល់១០ឆ្នាំ)? ហេតុអ្វីប៉ូលិសស្រាវជ្រាវមិនឃើញភ្លាមៗ ពីព្រោះតែអាមេរិកជាប្រទេសស្តេចទំនើប?
ស្ត្រីរងគ្រោះឈ្មោះ Berry បានរៀបរាប់ប្រាប់ប៉ូលិសថា រយៈពេល១០ឆ្នាំនៃការឃុំឃាំងនោះ នាងនិងនារីរងគ្រោះដទៃទៀតត្រូវជនអាក្រក់ទាំង៣នាក់បង្ខំរួមភេទរំលោភសេពសន្ថវៈរហូតម្នាក់ៗមានផ្ទៃពោះ៥-៦លើក ដោយក្នុងនោះថែមទាំងមានការរំលូតកូនច្រើនដងទៀតផង៕
ចែករំលែកព័តមាននេះ