ពលរដ្ឋអីុតាលីរាប់លាននាក់បានធ្លាក់ទៅក្នុងភាពក្រីក្ររហូតដល់មិនមានប្រាក់ទិញអាហារបរិភោគបាន នៅគ្រាដែលប្រទេសនេះទទួលរងការប៉ះពាល់ធ្ងន់ធ្ងរដោយសារវិបត្ដិសេដ្ឋកិច្ច និងភាពអត់ការងារធ្វើចេះតែកើនឡើង ។ នេះបើយោងតាមរបាយការណ៍មួយដែលបានរកឃើញថា ពលរដ្ឋទាំងនោះកំពុងជួបភាពក្រីក្រកាន់តែខ្លាំងក្នុងរយៈពេល២ឆ្នាំចុងក្រោយនេះ ។
ការរកឃើញពីវិទ្យាស្ថានស្ថិតិជាតិ ISTAT បានគូសបញ្ជាក់ពីវិសាលភាពនៃបញ្ហាដែលរដ្ឋាភិបាលចម្រុះថ្មីរបស់លោក Enrico Letta បានប្រឈមមុខ ។ រដ្ឋាភិបាលនេះបានសច្ចាថា នឹងជំរុញកំណើនសេដ្ឋកិច្ចហើយដោះស្រាយអត្រាអត់ការងារធ្វើរបស់យុវជនដែលមានស្ទើរតែ៤០ភាគរយ ។
បានប៉ះពាល់ធ្ងន់ធ្ងរដល់ពលរដ្ឋអីុតាលីសាមញ្ញដែលកំពុងចំណាយប្រាក់យ៉ាងច្រើន ។ យោងតាមការសិក្សាបានបង្ហាញថា ប្រទេសអីុតាលីមានពលរដ្ឋវ័យក្មេងដែលគ្មានទាំងការអប់រំ និងការងារធ្វើខ្ពស់បំផុតនៅអឺរ៉ុប ពោលគឺមានដល់ទៅ២៣,៩ភាគរយ ។ នៅតំបន់ក្រីក្រភាគខាងត្បូង មនុស្សម្នាក់ក្នុងចំណោម៣នាក់ដែលមានអាយុ១៥-២៩ឆ្នាំធ្លាក់ទៅក្នុងក្រុមនេះ ។ ISTAT និយាយថា ចំនួនពលរដ្ឋរស់នៅក្នុងគ្រួសារដែលចាត់ទុកថា ខ្វះខាតអាហារធ្ងន់ធ្ងរបានកើនឡើងមួយទ្វេជាពីរដល់៨,៦លាននាក់ ឬប្រហែល១៤ភាគរយនៃចំនួនពលរដ្ឋសរុបក្នុងរយៈពេល២ឆ្នាំចុងក្រោយនេះ ។
យោងតាមរបាយការណ៍ដដែលរាយការណ៍ថា គ្រួសារដែលជួបនឹងសូចនាករភាពក្រីក្រ៤ក្នុងចំណោមសូចនាករ៩ត្រូវបានគេចាត់ទុកថាខ្វះខាតស្បៀងអាហារធ្ងន់ធ្ងរបំផុត ។ ភាគរយពលរដ្ឋក្នុងគ្រួសារដែលមិនអាចលៃលកទិញអាហារដែលមានជាតិប្រូតេអីុនបរិភោគដូចជាសាច់រៀងរាល់ថ្ងៃកើនឡើងដល់១៦,៦%កាលពីឆ្នាំ២០១២ធៀបនឹង១២,៤%កាលពីឆ្នាំ២០១១ និង៦,៧%កាលពីឆ្នាំ២០១០ ។ ចំណែកជាង៥០%មិនអាចលៃលកចំណាយពេលធ្វើដំណើរកម្សាន្ដមួយសប្ដាហ៍បានកាលពីឆ្នាំទៅមិញ ហើយតួលេខបានកើនដល់៦៩%នៅភាគខាងត្បូង ។
ពលរដ្ឋប្រហែល១៤,៩លាននាក់ ឬ១/៤នៃពលរដ្ឋអីុតាលី៦១លាននាក់កំពុងតែរស់នៅក្នុងគ្រួសារដែលជួបនឹងសូចនាករភាពក្រីក្រ៣ក្នុងចំណោមសូចនាករភាពក្រីក្រជាច្រើនទៀតរបស់ISTAT ។ កាលពីឆ្នាំមុន ពលរដ្ឋវ័យក្មេងត្រឹមតែ៥៧,៦%ប៉ុណ្ណោះ ដែលបានបញ្ចប់ការសិក្សាក្នុងរយៈពេល៣ឆ្នាំចុងក្រោយមានការងារធ្វើ ។ អំណាចនៃការទិញរបស់ពលរដ្ឋអីុតាលី(Purchasing Power)បានធ្លាក់ចុះ៤,៨%កាលពីឆ្នាំមុន ។ ការធ្លាក់ចុះនេះបង្កឡើងដោយការដំឡើងពន្ធខ្ពស់ហួសហេតុសំដៅពង្រឹងហិរញ្ញវត្ថុសាធារណៈបន្ទាប់ពីបានធ្លាក់ចុះអស់៤ឆ្នាំ ៕
ចែករំលែកព័តមាននេះ