ខេត្តកណ្តាល ៖ ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា រួមដំណើរជាមួយលោកទេសរដ្ឋមន្ត្រី ញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ កាលពីព្រឹកថ្ងៃទី២២ ខែឧសភាបានអញ្ជើញចុះពិនិត្យគម្រោងការស្តារឡើងវិញក្រោយពីគ្រោះទឹកជំនន់នៅស្រុកពញាឮ ។
យោងតាមរបាយការណ៍របស់លោកជាវ តាយ អភិបាលរងខេត្តកណ្តាលឱ្យដឹងថា ទឹកជំនន់ឆ្នាំ២០១១ បានធ្វើឱ្យប៉ះពាល់ដល់ស្រុកចំនួន៩ទូទាំងខេត្តកណ្តាល ដែលបានបំផ្លិចបំផ្លាញទ្រព្យសម្បត្តិសាធារណៈ សម្លាប់ជីវិតមនុស្ស សត្វ និងធ្វើឱ្យខូចខាតហេដ្ឋារចនាសម្ព័ន្ធជាច្រើន ។ ដោយឡែកក្នុងស្រុកពញាឮ ទទួលរងនូវផលប៉ះពាល់លើវិស័យមួយចំនួនដូចជា សង្គមកិច្ច សេដ្ឋកិច្ច និងហេដ្ឋារចនាសម្ព័ន្ធ ។ ប៉ុន្តែបន្ទាប់ពីស្រុកពញាឮទទួលរងនូវផលប៉ះពាល់ដោយទឹកជំនន់ សហភាពអឺរ៉ុបតាមរយៈអង្គការអាក់តិដ ភីអេស អេហ្វ បានផ្តល់ជំនួយកសាង និងស្តារនូវផលិតផលជាច្រើនក្នុងឃុំមួយចំនួនរួមមាន ជួសជុលទំនប់ទឹកស្រែប្រាំងប្រវែង១៤.៧៣៥ម៉ែត្រ លើកទីទួលសុវត្ថិភាពឱ្យខ្ពស់ចំនួន៣កន្លែង កសាងទំនប់ទឹកប្រវែង២៧.៦១២ម៉ែត្រ កសាងច្រាំងទន្លេ កសាងផ្លូវលំក្នុងភូមិ ចែកជូននូវធុងចម្រោះទឹកចំនួន៣.៣៣៣គ្រួសារ រួមទាំងកសាងបង្គន់អនាម័យ។
លោកហ្វង់ហ្វ្រង់ស័រ កូតាំង ឯកអគ្គរដ្ឋទូតសហភាពអឺរ៉ុបប្រចាំកម្ពុជា មានប្រសាសន៍ថា សហភាពអឺរ៉ុបបានផ្តល់ថវិកាចំនួន៥២៥.០០០អឺរ៉ូ តាមរយៈទីភ្នាក់ងារសហប្រតិបត្តិការ និងអភិវឌ្ឍន៍បច្ចេកទេស ។ ទន្ទឹមនោះ ក៏កំពុងតែជួយដល់សហគមន៍ដែលទទួលរងផលប៉ះពាល់ដោយសារទឹកជំនន់នៅក្នុងភូមិចំនួន៣៦ក្នុងឃុំចំនួន១១ ដែលស្ថិតក្នុងស្រុកចំនួន៣ គឺស្រុកពញាឮ ស្រុកខ្សាច់កណ្តាល និងស្រុកល្វាឯម ដើម្បីស្តារលទ្ធភាពពីគ្រោះទឹកជំនន់ ។
មានប្រសាសន៍នាឱកាសនោះ លោកញឹម វណ្ណដា បានថ្លែងអំណរគុណសហគមន៍អឺរ៉ុប និងអង្គការអាក់តិដ (ACTED) ដែលបានជួយគាំទ្រដល់រាជរដ្ឋាភិបាលកម្ពុជា ក្នុងការផ្តល់ជំនួយសង្គ្រោះដល់ប្រជាពលរដ្ឋដែលរងគ្រោះដោយគ្រោះធម្មជាតិនានា ក៏ដូចជារួមចំណែកជាមួយរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានកាកបាទក្រហមកម្ពុជាដែលតែងតែគិតគូរពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋនៅតាមទីជនបទក្នុងការកាត់បន្ថយភាពក្រីក្ររបស់ប្រជាពលរដ្ឋ ។
ក្នុងអំឡុងពេលចុះទៅពិនិត្យមើលនោះដែរ ឯកអគ្គរដ្ឋទូតសហភាពអឺរ៉ុប និងអ្នកសារព័ត៌មាន បានជួបប្រជុំជាមួយគណៈកម្មាធិការអភិវឌ្ឍន៍ភូមិ និងអ្នកទទួលផលពីគម្រោងនៅក្នុងស្រុកពញាឮ។ គណៈប្រតិភូក៏បានទៅធ្វើទស្សនកិច្ចទីកន្លែងគម្រោងមួយចំនួន ក្នុងនោះរួមមានអណ្តូងទឹក ទំនប់ទឹក អាងស្តុងទឹក និងបង្គន់អនាម័យផងដែរ ៕
ចែករំលែកព័តមាននេះ